ލައިފް ފެން އުފައްދާ ފެކްޓްރީގެ މުވައްޒަފަކު މަރުވި މައްސަލައެއް ތަހުގީގު ކުރަނީ!
މަރުވީ ހޮނިހިރު ދުވަހު ކަމަށް ފުލުހުން ބުނޭ
ލައިފް ފެން އުފައްދާ ފެކްޓްރީ ހުންނަ ހިންމަފުށި
ކ. ހިންމަފުށީ ގައި ހުންނަ ލައިފް ފެން އުފައްދާ ފެކްޓްރީގައި ބިދޭސީއަކު މަރުވި މައްސަލަ ފުލުހުން ތަހުގީގު ކުރަން ފަށައިފި އެވެ.
ލައިފް ފެން އުފައްދާ ފެކްޓްރީ ގައި މަސައްކަތް ކުރަމުންދިޔަ އުމުރުން 38 އަހަރުގެ ބަންގްލަދޭޝްގެ ރައްޔިތަކު މަރުވީ ހޮނިހިރު ދުވަހު އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ހިންމަފުށީ ސިއްހީ މަރުކަޒަށް ގެންދިޔަ ބިދޭސީއަކު މަރުވި މައްސަލައެއް ތަހުގީގު ކުރަމުންދާ ކަމަށާއި، މިހާރު އެ މީހާގެ ހަށިގަނޑު އޮތީ މޯޗަރީގައި ކަމަށެވެ.
މިކަމާ ގުޅޭގޮތުން ލައިފް ކުންފުނީގެ ސީއީއޯ އަލީ އިހުސާން ވިދާޅުވީ އެއީ ކުއްލި މަރަކަށް ވުމުން އެ މައްސަލަ ތަހުގީގު ކޮށްދިނުމަށް އެދުނީ ކުންފުނިން ކަމަށެވެ.
އިހުސާން ވިދާޅުވި ގޮތުގައި އެ މީހާގެ ހަށިގަނޑު ފުރަތަމަ ގެންދެވުނީ ހިންމަފުށީ ސިއްހީ މަރުކަޒަށް ކަމަށާއި އޭގެ ފަހުން މާލެ ގެނެސް އައިޖީއެމްއެޗާއި އޭޑީކޭއަށް ގެންގޮސް ޓެސްޓްތައް ހެދި ކަމަށެވެ. ހޮސްޕިޓާތަކާ ހަވާލާދީ އޭނާ ވިދާޅުވީ ބިދޭސީ މުވައްޒަފު މަރުވީ ހިތްހުއްޓިގެން ކަމަށެވެ.
އިހުސާން ވިދާޅުވީ އެ މީހާގެ ހަށިގަނޑުން ޖިސްމާނީ އަނިޔާއެއް ލިބިފައިވާކަމުގެ ނިޝާނެއް ފެންނަން ނެތް ކަމަށެވެ.
މިކަމާ ގުޅޭގޮތުން ހިންމަފުށީ ސިއްހީ މަރުކަޒުގެ ބަހެއް ލިބޭ ގޮތް ވަނީ ނުވެފަ އެވެ.
