ސައުދީ ލީގުގައި ދެމި ހުރުމާ މެދު ނޭމާ ވަކި ގޮތެއް ނުނިންމާ
18 ޖެނުއަރީ 2025 | ހޮނިހިރު 05:44އެއްބަަސްވުމުގައި ބާކީ ހަ މަސް ދުވަސް އޮތްއިރު، އެ މުއްދަތުގައި ވެސް ކޮންމެ ފަދަ ގޮތަަކަށް ވެސް ކަންތައް ވެދާނެ ކަމަށް ނޭމާ ބުންޏެވެ.
އަލް ޙިލާލަށް ކުޅެމުން އަންނަ ބްރެޒިލްގެ ނޭމާ
ސައުދީ ޕްރޯ ލީގުގައި ދެމި ހުރުމާއެކު މިހާތަނަށް ވަކި ނިންމުމެއް ނުނިންމާ ކަމަށް، އަލް ޙިލާލަށް ކުޅެމުން އަންނަ ބްރެޒިލްގެ ނޭމާ ޖޫނިއާ ބުނެފި އެވެ.
ފްރާންސްގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު، ނޭމާ އަލް ޙިލާލަށް ބަދަލުވީ 2023 ވަނަ އަހަރު އެވެ. އެ ކުލަބާ އެކު ނޭމާ ސޮއި ކޮށްފައި ވަނީ ދެ އަހަރު ދުވަހުގެ އެއްބަަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ މި ހިނގާ 2025 ވަނަ އަހަރުގެ އޯގަސްޓު މަހަށެވެ.
އަލް ޙިލާލަށް ބަދަލުވީ ފަހުން ނޭމާ އަށް ވަނީ އަނިޔާގެ މައްސަލަތަކާ ކުރިމަތިލާން ޖެހިފަ އެވެ. މިހާތަނަށް އަލް ޙިލާލްގައި ނޭމާ ކުޅެފައި ވަނީ ވެސް އެންމެ ހަތް މެޗެވެ. މިހާރު ކުރިއަށްދާ ސައުދީ ޕްރޯ ލީގުގެ ދެ ވަނަ ހާފަށް ނޭމާ ރަޖިސްޓްރީ ނުކުރަން ވެސް އެ ކުލަބުން މިހާރު ވަނީ ނިންމައިފަ އެވެ.
އެކަމާ ގުޅޭ ގޮތުން އަލް ޙިލާލްގެ ކޯޗު ޖޯޖް ޖީސުސް ބުނީ، ލީގުގެ ދެ ވަނަ ބުރަށް ނޭމާ ރަޖިސްޓްރީ ނުކުރާނެ ކަމަށެވެ. ނަަމަވެސް އޭޝިއަން ޗެމްޕިއަންސް ލީގުގައި ބައިވެރިވުމުގެ ފުރުސަތު ނޭމާ އަށް އޮންނާނެ ކަމަށް ވެސް އޭނާ ބުންޏެވެ. ނޭމާ އަކީ ދުނިޔޭގެ ފެންވަރުގައި ވެސް ފާހަގަކޮށްލެވޭ ވަރުގެ ކުޅުންތެރިޔަކަށްވީ ނަމަވެސް، މިހާރު އެންމެ މަތީ ފަންތީގައި ވާދަކުރެވޭ ވަރަށް ޖިސްމާނީ ގޮތުން ނޭމާ ފިޓު ނޫން ކަމަށް އޭނާ ބުންޏެވެ.
ނޭމާގެ މުސްތަޤުބަލާ ގުޅޭ ގޮތުން ގިނަ ސުވާލުތަކެއް އުފެދިފައި ވަނިކޮށް، މިފަހުން ނޭމާ ދިން އިންޓަވިޔުއެއްގައި އޭނާ ބުނީ ސައުދީ ލީގުން އޭނާ އަށް ބޮޑު ހައިރާންކަމެއް ލިބުނު ކަމަށެވެ. އަލް ޙިލާލާ އެކު އޭނާ ސޮއި ކޮށްފައިވާ އެއްބަސްވުން ހަމަވުމުން، ސައުދީ ލީގުގައި ދެމި ހުރުމާ މެދު ވާނެ ގޮތެއް ބުނަން ނޭނގޭ ކަމަށް ވެސް ނޭމާ ވަނީ ބުނެފަ އެވެ. އެއްބަަސްވުމުގައި ބާކީ ހަ މަސް ދުވަސް އޮތްއިރު، އެ މުއްދަތުގައި ވެސް ކޮންމެ ފަދަ ގޮތަަކަށް ވެސް ކަންތައް ވެދާނެ ކަމަށް ނޭމާ ބުންޏެވެ.
އަނިޔާގެ ސަބަބުން އަލް ޙިލާލްގައި ނޭމާ އަށް އެކަށީގެންވާ މިންވަރަަކަށް ނުކުޅެވޭތީ، ކުލަބުން ވެސް ބޭނުން ވަނީ އެއްބަސްވުމުގެ މުއްދަތު ހަމަވުމުން ނޭމާ ދޫކޮށްލަން ކަމަށް ބައެއް މީޑިއާ ތަކުގައި ވަނީ ރިޕޯޓުކޮށްފަ އެވެ.
