މޭޖަރލީގުގައި ޝްވައިންސްޓައިގާގެ ފުރަތަމަ މެޗު ލަނޑަކާއެކު

މެންޗެސްޓަރ ޔުނައިޓެޑް ދޫކޮށްލުމަށްފަހު އެމެރިކާގެ މޭޖަރލީގުގެ ޝިކާގޯ ފަޔަރއަށް ބަދަލުވި ޖަރުމަނުގެ ތަރި ބަސްޓިއަން ޝްވައިންސްޓައިގާ އެޓީމަށް ކުޅުނު ފުރަތަމަ މެޗު ލަނޑަކާއެކު ފަށައިފިއެވެ.

މޭޖަރ ލީގަށް ބަދަލުވުމަށްފަހު ކުޅުނު ފުރަތަމަ މެޗުގައި ޝްވައިންސްޓައިގާ ލަނޑު ޖަހާފައިވަނީ މެޗުގެ 17 ވަނަ މިނެޓުގައެވެ.

މި ލަނޑަކީ ޑޭވިޑް އަކަމް ގޯލް ކުރިމައްޗަށް ހުރަސްކޮށްލިން ބޯޅައަކުން ޝްވައިންސްޓައިގާ ކާމިޔާބުކުރި ލަނޑެކެވެ.

ޖަރުމަނާއެކު ވޯލްޑްކަޕް ކާމިޔާބުކޮށްފައިވަ 32 އަހަރުގެ ޝްވައިންސްޓައިގާ މޭޖަރ ލީގުގެ ޝިކާގޯ ފަޔަރއަށް ބަދަލުވީ ހިލޭ ޓްރާންސްފާއެއްގައި މާޗް މަސްތެރޭގައެވެ.

ޝިކާގޯ ފަޔަރ އަށް ޝްވައިންސްޓައިގާ ބަދަލުވުމާއެކު މެންޗެސްތަރ ޔުނައިޓެޑްގެ ކޯޗު މޮރީއޯވަނީ ޝްވައިންސްޓައިގާއާ މެދު ކަންތައްތައް ކުރެވުނު ގޮތާއިމެދު އޭނާގެ ކިބައިން މާފަށް އެދިފައެވެ.

ޝްވައިންސްޓައިގާ ޔުނައިޓެޑަށް ސޮއިކުރީ ލުއި ވެންހާލްގެ ކޯޗުކަމުގައި ހުރިއިރުއެވެ. 2015 ވަނަ އަހަރު ޔުނައިޓެޑާއި ގުޅުނު ޝްވައިންސްޓައިގާއަށް މޮރީނިއޯގެ ކޯޗުކަމުގެ ދަށުގައި ގިނަ ޕްރެކްޓިސްތަކެއް ކުރަންޖެހުނީ ޔުނައިޓެޑްގެ 23 އަހަރުން ދަށުގެ ޓީމާއިއެކުއެވެ.

ޔޫތު ޓީމާއިއެކު ޕްރެކްޓިސްތަކުގައި ބައިވެރިވުމަށްފަހު ސީނިއަރ ޓީމުގެ ޕްރެކްޓިސްގައި ޝްވައިންސްޓައިގާ ބައިވެރިވެވުނީ ޔޫރޮޕާ ލީގުގައި ފެނެބާޗޭއާ ދެކޮޅަށް ކުޅުނު މެޗުގައެވެ.

ނުވަދިހަ މިނެޓު ޝްވައިންސްޓައިގާ ކުޅުނު މިމެޗު ނިމުނީ 2-2 އެއްވަރު ވެގެންނެވެ.