"އިންޓަރެކްޓިވް މިއުޒިއަމް" އެއްގެ ގޮތުގައި އުސްގެކޮޅު ތަރައްޤީ ކުރުމުގެ މަޝްވަރާތައް ކުރަން ނިންމައިފި

"އިންޓަރެކްޓިވް މިއުޒިއަމް" އެއްގެ ގޮތުގައި އުސްގެކޮޅު ތަރައްޤީ ކުރުމުގެ މަޝްވަރާތައް ކުރަން ނިންމައިފިއެވެ.

މިގޮތަށް ނިންމާފައިވަނީ ސަލްޓަން ޕާކުގައި ހުންނަ ރާއްޖޭގެ އެންމެ ގިނަ ދުވަސްވީ އެއް އާސާރީ ބިނާ ކަމުގައިވާ އުސްގެކޮޅާ ގުޅޭގޮތުން މާލޭ ސިޓީ ކައުންސިލްގެ 4 ވަނަ ދައުރުގެ 179 ވަނަ ޖަލްސާގައެވެ.

އުސްގެކޮޅާ ގުޅޭގޮތު ކައުންސިލުން މަޝްވަރާކުރީ، "އިންޓަރެކްޓިވް މިއުޒިއަމް" އެއްގެ ގޮތުގައި އުސްގެކޮޅު ތަރައްޤީ ކުރުމުގެ މަސައްކަތް ދިވެހިބަހާ ސަޤާފަތާއި ތަރިކައާބެހޭ ވުޒާރާއިން ކުރިއަށް ގެންދިއުމަށް ބޭނުންވާތީ، އެކަމަށް އިޖާބަ ދިނުމުގެ ގޮތުން ކައުންސިލުން މިއަދު ބޭއްވި ޖަލްސާގައެވެ.

މިކަމާ ގުޅޭގޮތުން ވާހަކަ ދައްކަވަމުން މޭޔަރ އާދަމް އާޒިމް ވިދާޅުވީ އާސާރީ ގޮތުން މާލޭގައި މިވަގުތު ފެންނަން އެއްޗެއްސާއި ބިނާތައް ވީހާވެސް ރަނގަޅަށް ބެލެހެއްޓުމާއި އޭނގެން ނަފާ މާލޭގެ ރައްޔިތުން ލިބޭނެ ގޮތް ހެދުމަކީ ކައުންސިލުން ވެސް އެދޭ ކަމެއް ކަމަށެވެ. އަދި މިފަދަ ތަރިކަތައް ބެލެހެއްޓުމަކީ އެކައުންސިލްގެ މައްޗަށް އޮތް ޤާނުނީ ޒިންމާއެއް ކަމަށް ވީއިރު، މިކަމާ ގުޅޭ ގޮތުން އިތުރަށް ތަރިކައާބެހޭ ވުޒާރާއާއެކު ވާހަކަ ދައްކަވާނެ ކަމަށް މޭޔަރ ވިދާޅުވި އެވެ.

މިކަމަށް ބަހުސްކުރައްވާ ޑެޕިއުޓީ މޭޔަރ އަހުމަދު ނަރީޝް ވިދާޅުވީ މީގެ ކުރިން ވެސް އުސްގެކޮޅު ތަރައްޤީ ކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ތަރިކައާ ބެހޭ ވުޒާރާއާ ގުޅިގެން މަސައްކަތްތަކެއް ކުރައްވަން މަސައްކަތް ކުރެއްވި ކަމަށާއި އެހެން ނަމަވެސް މިއަދާ ހަމައަށް އާއިރުވެސް މިކަމުގެ އަމަލީ އެއްވެސް މަސައްކަތެއް ކުރެވިފައި ނުވާކަމަށެވެ.

އަދި މިވަގުތަށް އެންމެ ރަނގަޅު ގޮތަކީ ކައުންސިލާއި މިނިސްޓްރީއާ އެކު ވަހާކަ ދެކެވި، މިގޮތަށް ހުންނަ އާސާރީ ކޮންމެ ބިނާ އަކީ ޤައުމަށް އެންމެ ފާދާ ބޮޑުކަމަކަށް ފެންނާތީ އާމްދަނީއެއް ލިބޭނެ ގޮތަށް ތަރުތީބުވެގެން ދިއުމަށް އެންމެ މަތިން ފެށިގެން މަސައްކަތް ކުރު ކަމަށެވެ.

އުސްގެކޮޅަކީ ދިވެހި ރަސްކަމުގެ 800 އަހަރަށް ވުރެ ގިނަ ދުވަސްވީ ގަނޑުވަރެކެވެ. އަދި އެ ގަނޑުވަރުގެ ސަލާމަތުން ހުރި ބައި މިހާރުވެސް ސަލްޓަން ޕާކުގައި ފެންނަން އެބަހުއްޓެވެ.