ގެދޮރުވެރިޔާ ސްކީމް: މާލޭގަ އުޅޭ މުއްދަތަށް މެދުކެނޑުމެއް އައިކަމަށް ބަލާނީ 1 އަހަރަށް ވުރެ ދިގު ނަމަ: މުއްތަލިބް
އޭސީސީން ކުރިއަށް ގެންދިޔަ ފްލެޓު ލިސްޓުގެ ތަހުގީގުގައި އެންމެ ބޮޑަށް ފާހަގަވި އެއް ކަމަކީ މާލޭގައި މެދުނުކެނޑި ދިރއުޅެމުންދާ މުއްދަތު ބެލުމުގައި ދިމާވި މައްސަލަ
ަކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ އަބްދުﷲ މުއްތަލިބު
"ގެދޮރުވެރިޔާ" ސްކީމުގެ ދަށުން ހުޅުމާލޭގައި އަޅާ 4000 ފްލެޓް ލިސްޓުގެ ވެރިފިކޭޝަން ޕްރޮސެސް ކުރުމުގެ މަސައްކަތް ފަށައި، މާލޭގައި ދިރިއުޅޭ މުއްދަތަށް މެދުކެނޑުމެއް އައި ކަމަށް ބަލާނީ 1 އަހަރު ދުވަހަށްވުރެ ދިގުނަމަ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ އަބްދުﷲ މުއްތަލިބު އަންގާރަ ދުވަހު ވިދާޅުވެއްޖެ އެވެ.
ފްލެޓް ލިސްޓާ ގުޅޭ އެންމެ ފަހުގެ މައުލޫމާތު ހާމަކުރުމަށް ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަދައްކަވަމުން މިނިސްޓަރު މުއްތަލިބު ވިދާޅުވީ އޭސީސީން ކުރިއަށް ގެންދިޔަ ފްލެޓު ލިސްޓުގެ ތަހުގީގުގައި އެންމެ ބޮޑަށް ފާހަގަވި އެއް ކަމަކީ މާލޭގައި މެދުނުކެނޑި ދިރއުޅެމުންދާ މުއްދަތު ބެލުމުގައި ދިމާވި މައްސަލަކަމަށެވެ. އެގޮތުން އެ މުއްދަތު އެއް ހަމައެއްގައި ގެންގުޅެފައިނުވާކަން ފާހަގަކުރެވިފައިވާ ކަމަށް މިނިސްޓަރު ވިދާޅުވިއެވެ.
ވަކިން ހާއްސަކޮށް މެދުނުކެނޑި މާލޭގައި ދިރިއުޅުން މާނަކޮށްފައި ނުވާތީ، އެކި ގޮތް ގޮތުން އިވެލުއޭޓް ކުރި ފަރާތްތަކުން އަމަލުކޮށްފައިވާކަންވެސް ފާހަގަވި ކަމަށް މިނިސްޓަރު ވިދާޅުވި އެވެ.
އޭސީސީން މީގެ ކުރިން ބުނެފައިވަނީ ޝަރުތު ހަމަވިނަމަވެސް މައްސަލަތައް ހުރި ފޯމުތަކުން ފާހަގަކުރެވުނު ކަންތައްތަކުގެ ތެރޭގައި ފޯމުގައި ދީފައިވާ މައުލޫމާތު ފުށުއެރުމާއި، ޝަކުވާގެ މުއްދަތުގައި އާ ލިޔެކިޔުންތައް ހުށަހެޅުމާއި، ޕޮއިންޓް ދިނުމުގައި މައްސަލަތައް ހުރުމުގެ އިތުރުން ހާއްސަ އެހީއަށް ބޭނުންވާ ފަރާތްތަކުގެ ބަޔަށް އުސޫލާ ޚިލާފަށް ޕޮއިންޓްދިނުން ހިމެނޭ ކަމަށެވެ.
ނަމަވެސް މިނިސްޓަރު މުއްތަލިބު ވިދާޅުވީ ފްލެޓް ލިސްޓު ވެރިފިކޭޝަން ކުރިއަށް ގެންދިޔަ އިރު، ބަލާނީ މާލޭގައި ދިރިއުޅޭ މުއްދަތަށް ކަމަށެވެ. އެގޮތުން ލިސްޓުގެ ވެރިފިކޭޝަން ކުރިއަށް ގެންދާއިރު މާލޭގައި ދިރިއުޅޭ މުއްދަތަށް މެދުކެނޑުމެއް އައި ކަމަށް ބަލާނީ 1 އަހަރު ދުވަހަށްވުރެ ދިގު މުއްދަތަކުގެ މެދުކެނޑުމެއް އައުން ކަމަށް މުއްތަލިބު ވިދާޅުވި އެވެ.
އެގޮތަށް ނިންމި މައިގަނޑު ސަބަބަކީ އެ މެދުކެނޑުން ބޯހިޔާވަހިކަމުގެ ސްކީމުގައި މާނަކޮށްފައި ނުވާތީ އާއި 2015 އަހަރުގެ ގެދޮރުވެރިކަމުގެ ޕްރޮގްރާމްގައި މެދުކެނޑުމެއް ކަމަށް ބާލަފައިވަނީ އެއް އަހަރު ދުވަހުގެ މެދުކެނޑުމެއް ކަމަށް ވާތީ އެވެ.
އަދި އެއީ ކުރިން ކަންކޮށްފައިވާ ގޮތަށް ވަޒީފާއެއް ނެތުމުގެ ސަބަބުން ނުވަތަ އެހެންވެސް ސަަބަބަކާ ހެދި މާލޭގައި އުޅޭ ކަމުގެ ލިޔުން ނެތް މުއްދަތުގެ ސަބަބުން ޝަރުތު ހަމާނުވާ ފަރާތްތައް ލިސްޓުން އުނިވުމުގެ ފުރުސަތު ކުޑަކުރުމަށްޓަކައި ކަމަށްވެސް މުއްތަލިބު ވިދާޅުވި އެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ވެރިކަމުގެ ފަހުކޮޅު "ގެދޮރުވެރިޔާ" ސްކީމްގެ ދަށުން ހުޅުމާލޭގައި އަޅާ ފްލެޓްތަކުގައި 3 ކޮޓަރީގެ 2,712 އެޕާޓްމަންޓާއި 2 ކޮޓަރީގެ 1,188 އެޕާޓްމަންޓް ހިމެނެއެވެ.
