އެމްޑީޕީ އަށް ނިސްބަތްވާ ވައިކަރަދޫ ދާއިރާގެ ރައްޔިތުންގެ މަޖިލީހުގެ މެންބަރު ހުސެއިން ޒިޔާދު (ފިއްޓޭ) ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވައްދަން ފުރި ވަގު ފޯމުގައި ޖަހާފައިވާ ފޮޓޯ އަކީ ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގެ ޑޭޓާ ބޭސް އިން ނޫން ގޮތަކަށް ލިބޭނެ ފޮޓޯ އެއް ނޫންކަން ކަށަވަރު ވެއްޖެއެވެ.

ޕީއެންސީ އިން ހުށަހެޅި ފިއްޓޭގެ ފޯމުގައި ޖަހާފައިވާ ފޮޓޯ އަކީ، އޭނާ މިހާރު ގެންގުޅުއްވާ އައިޑީ ކާޑުގެ ކުރިން ގެންގުޅުއްވި އައިޑީ ކާޑުގައި އިން ފޮޓޯކަން ވަނީ ޔަގީން ކުރެވިފައެވެ. ބާތިލު ކޮށްފައިވާ ކާޑު އެހެން އެއްވެސް ފަރާތަަކަށް ނުލިބޭނެ ކަމަށާއި އެ ކާޑު އޮތީ ރައްކާތެރި ކަމާއެކު ފޮރުވާފައި ކަމަށް ފިއްޓޭ ވަނީ ޔަގީންކޮށްދެއްވާފައެވެ.

މި ނޫހަށް ލިބިފައިވާ މިހާރު ބާތިލު ކޮށްފައިވާ ފިއްޓޭގެ އައިޑީ ކާޑުގެ ކޮޕީއަކުން ފެންނަ ގޮތުގައި އެކާޑުގައި އިން ފޮޓޯ އާއި ފޯމުގައި އިން ފޮޓޯ އާ އެއްވެސް ތަފާތެއް ނެތެވެ. އޭގެ އިތުރުން، ކާޑު ބާތިލު ކޮށްލުމުގެ ގޮތުން ޑީއެންއާރުން ޕަންޗު ކޮށްފައިވަނީ ކާޑުގައި އިން ފިއްޓޭގެ ފޮޓޯގެ ކަނާތްފަރާތު ގިރުވާނާ ދިމާލުން ކަމަށްވާއިރު، ފިއްޓޭ އަތުގައި މިހާރު އޮތް ބާތިލުކޮށްފައިވާ ކާޑުން ފޮޓޯ އުފެއްދި ނަމަ ޕަންޗު ކުރިތަން އަރާނެ ކަމަށް ފެނެއެވެ. އެހެން ނަމަވެސް ފޯމުގައި އިން ފޮޓޯގައި ގިރުވާން ފުރިހަމަ އަށް ފެނެއެވެ. އައިޑީކާޑު ފޮޓޯ އަކީ ސީދާ ޑީއެންއާރުން ނަގާ ފޮޓޯ އެއް ކަމަށް ވެފައި، ފޯމުގައި ޖަހާފައިވާ ފޮޓޯގައި ޕަންޗް ކުރިތަން ފެންނަން ނެތީ އޭގެ އޮރިޖަނަލް ލިބިގެން އުފެއްދި ފޮޓޯ އަކުން ވުމުން ކަމަށް ގަބޫލު ކުރެވެއެވެ. އެއީ ސީދާ ޑީއެންއާރު ނޫން ތަނަކުން ލިބޭނެ ފޮޓޯއެއް ނޫނެވެ.

މި މައްސަލަ ފެންމަތިވުމުގެ ކުރިން ޑީއެންއާރުގެ ތެރޭގައި ޕީއެންސީގެ އޮފިޝަލުން ތިބެގެން ފޯމު ފުރާ ފޮޓޯ ތަކެއް މީގެ ދުވަސްކޮޅެއް ކުރިން ވަނީ ސޯޝަލް މީޑިއާ ގައި ލީކުވެފައެވެ.

މިކަމާ ބެހޭ ގޮތުން ފިއްޓޭ ވިދާޅުވީ، އޭނާގެ އާއިލާގެ އިތުރު 4 މީހެއްގެ ފޯމުގައި ވެސް ހުރީ އައިޑީ ކާޑުގައި އިން ފޮޓޯކަން އޭނާ އަށް ވެސް ފާހަގަ ކުރެއްވިފައިވާ ކަމަށެވެ.

ވަގު ފޯމު ހުށަހަޅައިގެން ޕިއެންސީ އަށް މެމްބަރުން އިތުރު ކުރަމުންދާ މައްސަލަ ސީރިއަސްވެ ގިނަ ބަޔަކު ގަބޫލު ކުރަނީ މިއީ ޕީއެންސީ އާއި ދައުލަތުގެ ކަމާބެހޭ މުއައްސަސާތައް ގުޅިގެން ހިންގާ ކަމެއްގެ ގޮތުގައެވެ.

އަނެއްކޮޅުން، ޒިޔާދުގެ ފޯމުގައި ހެކިވެރިންގެ ގޮތުގައި ސޮއި ކޮށްފައިވަނީ ރ. އަލިފުށީ، ކިޔުބާ އައިމިނަތު އަލީ އާއި ސ.ހުޅުދޫ ސުވާސާގޭ އަލީ އިޒްހާން ކަން ވަނީ ހާމަވެފައެވެ.

މި ދެމީހުން ހެކިންގެ ގޮތުގައި ސޮއި ކޮށްފައިވާ އިރު، ފޯމުގައި އެމީހުން ސޮއިކުރި ގޮޅީގެ މަތީގައި "ޕާޓީ އަށް ވަނުމަށް ސޮއިކޮށްފައި އެވަނީ އަހުރެމެންގެ ހާޒިރުގައި" ކަމަށް ލިޔެފައިވެއެވެ.

ފޯމުގައިވާ ހުރިހާ މައުލޫމާތަކީ ސައްހަ ތެދު މައުލޫމާތު ކަމަށާއި ފޯމުގައިވާ މައުލޫމާތުގެ ސައްހަ ކަމާމެދު އުފެދޭ ކޮންމެ ސުވާލަކަށް ޕާޓީން ޒިންމާވާނެ ކަމަށް ލިޔެ ޕީއެންސީގެ ރަޖިސްޓްރަރ މުހައްމަދު އަފޫ ހާމިދު ސޮއިކޮށް ޕާޓީގެ ތައްގަނޑު ޖަހާ ތައްޔާރު ކޮށްފައިވާ ފިއްޓޭގެ ފޯމު އިލެކްޝަންސް ކޮމިޝަނަށް ހުށަހަޅާފައިވަނީ 24 ޑިސެމްބަރު 2024 ގައެވެ.

ގިނަ އަދަދެއްގެ އެމްޑީޕީ މެމްބަރުން އެމީހުންނަށް ނޭގި ވަގު ފޯމު ފުރައިގެން ޕިއެންސީ އަށް ވައްދާފައިވާ މައްސަލަ އެމްޑީޕީ އިން ވަނީ ކުށްވެރި ކޮށްފައެވެ.

ކުރީގެ ރައީސް ސޯލިހް މި ކަމާ ގުޅިގެން ކުރެއްވި ޕޯސްޓެއްގައި ވިދާޅުވީ އިލެކްޝަންސް ކޮމިޝަނަކީ ރައްޔިތުން ފުރިހަމައަށް އިތުބާރުކުރާ ތަނަކަށް ވާން އެބަޖެހޭ ކަމަށެވެ. އާންމު އެތައް ރައްޔިތެއްގެ ޒާތީ މަޢުލޫމާތު ނަހަމަ ގޮތުގައި ބޭނުންކޮށް އޮޅުވާލައިގެން ޕީއެންސީ އަށް ވައްދަމުންދާ ކަމަށް ވެސް ކުރީގެ ރައީސް ވަނީ ފާހަގަ ކުރައްވާފައެވެ.