ކުރީގެ ރައީސް ޔާމީންގެ ވެރިކަން ނިމުނުއިރު ރައްޔިތުން ތިބީ ކިރިޔާ ނޭވާ ލެވޭ ހިސާބުގައި، އެހާލަތަށް ގެންދިއުމަށް ދަނީ މަސައްކަތް ކުރަމުން: މޫކޭ
ޑީއާރްޕީ، ޕީޕީއެމް، ޕީއެންސީ ފިކުރަށް ވެރިކަން ލިބޭ ކޮންމެ ފަހަރަކު ވެސް ގާނޫނު އަސާސީގެ ދިފާއުގައި ދިވެހި ރައްޔިތުން ނުކުންނަން ޖެހޭ
ގައުމީ މަޖިލީހުގެ ބައްދަލުވުމެއްގައި މަޑުއްވަރީ ދާއިރާގެ މެމްބަރު މޫސާ އަލީ މަނިކު ވާހަކަދައްކަވަނީ
ކުރީގެ ރައީސް އަބްދުﷲ ޔާމީންގެ ވެރިކަން ނިމުނުއިރު، ދިވެހި ރައްޔިތުންނަށް ކިރިޔާ ނޭވާ ލެވޭ ހިސާބުގައި ކަމަށާއި، އެހާލަތަށް ގައުމު ގެންދިއުމަށް މިސަރުކާރުން މަސައްކަތް ކުރާ ކަމަށް އެމްޑީޕީގެ ގައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ ގާނޫނުއަސާސީގެ ދިފާއުގައި - ބޮޑު ސައްލާގައި ވާހަކަދައްކަވަމުން މޫކޭ ވިދާޅުވީ ޑީއާރްޕީ، ޕީޕީއެމް، ޕީއެންސީ ފިކުރަށް ވެރިކަން ލިބޭ ކޮންމެ ފަހަރަކު ވެސް ގާނޫނު އަސާސީގެ ދިފާއުގައި ދިވެހި ރައްޔިތުން ނުކުންނަން ޖެހޭ ކަމަށާއި، އެ ފިކުރުގެ ވެރިކަމެއްގައި ގާނޫނު އަސާސީއަށް ބޯނުލަބާ ކަމަށެވެ. އަދި އެފިކުރުގެ ވެރިކަންތަކުގައި ކޮންމެ ފަހަރަކު ވެސް ދިވެހި ރައްޔިތުންނަށް ގާނޫނު އަސާސީން ލިބިފައިވާ ހައްގުތަކަށް އަރައިގަންނަ ކަމަށާއި، މަޑުމަޑުން ހައްގުތައް ނިގުޅައިގަތުމަށް މަސައްކަތް ކުރާ ކަމަށް މޫކޭ ވިދާޅުވިއެވެ.
މާޒީއަށް އިޝާރާތް ކުރައްވައި މޫކޭ ވިދާޅުވީ ޑީއާރްޕީ، ޕީޕީއެމް، ޕީއެންސީ ފިކުރަށް ތާއީދުކުރާ މީހުންނަކީ ގާނޫނު އަސާސީން ދިވެހި ރައްޔިތުންނަށް ހޯދައިދިން ހައްގުތައް ލިޔުމާއި ދެކޮޅަށް އަދި އެހައްގުތައް ނުދިނުމަށް ނުވަތަ އެކަންކަން ވިޔަނުދިނުމަށް ގިނަގުނަ މަސައްކަތްތައް ކުރި މީހުން ކަމަށެވެ.
މީގެ އިތުރުން މޫކޭ ވިދާޅުވީ މިސަރުކާރު މިދަނީ އަނިޔާވެރިކަމާއި ދިމާލަށް ކަމަށާއި، މިވެރިކަމުގައި މިހާތަނަށް ނުހައްގުން މީހުން ހައްޔަރުނުކުރާ ކަމަށެވެ. ނަމަވެސް ފާޅުކުރާ ހިޔާލަކާއި ގުޅިގެން ސޯޝަލް މީޑިއާގެ އެކްޓިވިސްޓުން ފުލުހުންގެ އޮފީހަށް ހާޒިރުކުރަން ފަށާފައިވާ ކަމަށާއި، މިއީ މިކަމުގެ ފެށުން ކަމަށް އޭނާ ވިދާޅުވިއެވެ. އަދި ވިދާޅުވީ ކުރީގެ ރައީސް ޔާމީންގެ ވެރިކަން ނިމުނުއިރު ދިވެހި ރައްޔިތުންނަށް ކިރިޔާ ނޭވާ ލެވޭ ހާލަތަށް ގައުމުގެ ހާލަތު ގެންގޮސްފައިވާ ކަމަށެވެ.
މޫކޭ ވިދާޅުވީ ގާނޫނު އަސާސީގައި ދިވެހި ރައްޔިތުންނަށް ދީފައިވާ ހައްގުތައް ކަށަވަރު ކުރުމަށް ރައްޔިތުން މަސައްކަތް ކުރަންޖެހޭ ކަމަށެވެ. އެހެންނޫން ނަމަ ގައުމުގެ ހާލަތު ދާނީ ދަށަށް ކަމަށް އޭނާ ވިދާޅުވިއެވެ.
