ނޫސްވެރިން އިހުތިޖާޖުކުރަން ތިއްބާ ސަރުކާރުން ބޭނުންވާ އިސްލާހުތަކާއެކު މީޑިއާ ކޮންޓްރޯލް ކުރާ ބިލު ކޮމިޓީ އިން ފާސްކޮށްފި
މެންބަރު މީކާއިލް ހުށަހެޅުއްވި އެއްވެސް އިސްލާހެއް ބަލައިގަނެފައި ނުވޭ
މިނިވަން މުއައްސަސާތަކުގެ ކޮމިޓީގައި ނޫސްވެރިން އިހުތިޖާޖުކުރަނީ
މީޑިއާތަށް ކޮންޓްރޯލްކޮށް ސަރުކާރުގެ ވައްކަން ފޮރުވާ ބިލުގެ މަސައްކަތް ކުރާ ކޮމިޓީގައި ނޫސްވެރިން އިހުތިޖާޖުކުރަމުން ދަނިކޮށް ސަރުކާރުން ބޭނުންވާ އިސްލާހުތައް ހުށަހަޅައި ބިލު ކޮމިޓީ އިން ފާސްކޮށްފިއެވެ.
މީޑިއާތައް ކޮންޓްރޯލް ކުރާ ބިލު ދިރާސާކުރުމުގެ މަސައްކަތް ކުރިއަށް ގެންދިޔަ މިނިވަން މުއައްސަސާތަކުގެ ކޮމިޓީ އިން ސަރުކާރުން ބޭނުންވާ އިސްލާހު ގެނެސް ބިލު ފާސްކުރީ ކޮމިޓީގައި ތިބި ނޫސްވެރިން އިހުތިޖާޖުކުރަމުން ދަނިކޮށެވެ. ނޫސްވެރިން އިހުތިޖާޖުކުރީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި އިސްލާހުތައް ކޮމިޓީ އިން ބަލައި ނުގަނެ، ކެލާ ދާއިރާގެ މެންބަރުން އަބްދުﷲ ޝަރީފުގެ ހުށަހެޅުން ބަލައިގަނެ އެ އިސްލާހުތަކާއެކު ބިލު ކޮމިޓީން ފާސްކުރުމުންނެވެ.
ކެލާ ދާއިރާގެ މެންބަރު ޝަރީފް ވަނީ ސަރުކާރުން ބޭނުންވާ ގިނަ އިސްލާހުތަކަށް ބިލަށް ހުށަހަޅާފައެވެ. މީގެ ކުރިން މި ކޮމިޓީ ކުރިއަށް ގެންދިޔައީ ނޫސްވެރިންނަށް ވަނުމުގެ ފުރުސަތު ނުދީ މަޖިލީހުގެ ގަވާއިދާ ހިލާފަށް ސިއްރުކޮށްގެންނެވެ.
ކޮމިޓީގައި ނޫސްވެރިން އިހުތިޖާޖުކުރަން ފެށުމުން ވޯޓަށް އެހި އިރު، ކޮމިޓީގެ މުގައްރިރު މާފުށީ ދާއިރާގެ މެންބަރު ހުސައިން ރިޒާ ކައިރީގައި އިންނަވާ ބާރަށު ދާއިރާގެ މެންބަރު އިބްރާހިމް ޝުޖާއު ގެންދެވީ ވަކި ގޮތަކަށް ކަންކަން ކުރައްވަން އިރުޝާދު ދެއްވަމުންނެވެ. އަދި ނޫސްވެރިން އިހްތިޖާޖުކުރަމުން ދަނިކޮށް ވޯޓު ނަގާ ބިލު އިސްލާހުތަކާއެކު ބިލު ފާސްކުރުމަށްފަހު މެންބަރުން ވަނީ ކޮމިޓީ ދޫކޮށް ވަޑައިގަންނަވާފައެވެ.
މެންބަރު ޝުޖާއުގެ އިތުރުން ދިއްދޫ ދާއިރާގެ މެންބަރު އަބްދުލް ލަތީފް މުހައްމަދު އަދި ފުނަދޫ ދާއިރާގެ މެންބަރު މުހައްމަދު މަމްދޫހު ވަނީ ކޮމިޓީއަށް ހަމަޖައްސާފައެވެ. މި ތިން މެންބަރުން ކޮމިޓީއަށް ހަމަޖެއްސީ ބިލުގެ މަސައްކަތް ނިންމަން ކަނޑައެޅި ކޮމިޓީގެ ކުރިންނެވެ. އޭގެ ކުރިން ކޮމިޓީގައި ތިއްބެވި ތުލުސްދޫ ދާއިރާގެ މެންބަރު އިބްރާހިމް ނަސީމާއި، ފެލިދޫ ދާއިރާގެ މެންބަރު އާދަމް ޒާހިރު އަދި މުލަކު ދާއިރާގެ މެންބަރު އިބްރާހިމް ނައުފަލު ވަނީ ކޮމިޓީން ވަކިކޮށްފައެވެ.
ކޮމިޓީ އިން މީޑިއާ ތަޅުއަޅުވާ ބިލު ފާސްކުރި އިރު، 151 ނޫސްވެރިއަކު ސޮއިކޮށް ރައީސް އޮފީހާއި މަޖިލީހަށް ހުށަހެޅީ ޕެޓިޝަން، ޕެޓިޝަން ކޮމިޓީން އޮތީ ބިލު ދިރާސާކުރި މިނިވަން މުއައްސަސާތަކުގެ ކޮމިޓީއަށް ފޮނުވަން ނިންމާފައެވެ. ނަމަވެސް އެ ޕެޓިޝަނަށް އެއްވެސް ވަރަކަށް މިނިވަން މުއައްސަސާތަކުގެ ކޮމިޓީ އިން ރިއާޔަތްކޮށްފައި ނުވެއެވެ.
ޕެޓިޝަން ކޮމިޓީން މިނިވަން މުއައްސަސާތަކުގެ ކޮމިޓީއަށް ފޮނުވުމަށް ނިންމި އިރު، މިނިވަން މުއައްސަސާތަކުގެ ކޮމިޓީއަށް ފޮނުވާނީ ޕެޓިޝަނުގައި ހުރި ނޫސްވެރިންގެ ކަންބޮޑުވުންތަކަށް އެ ކޮމިޓީން ރިއާޔަތްކުރުމަށް ލަފާ ދިނުމަށާއި، މިނިވަން މުއައްސަސާތަކުގެ ކޮމިޓީން ގޮތެއް ނިންމުމުން، އެ ނިންމުމުގައި ޕެޓިޝަންގައި ހުރި ކަންކަމަށް ރިއާޔަތްކުރި ވަރު ޕެޓިޝަން ކޮމިޓީން ފަހުން ބެލުމަށްފަހު މިނިވަން މުއައްސަސާތަކުގެ ކޮމިޓީން ގޮތެއް ނިންމުމުން، ނޫސްވެރިންގެ ކަންބޮޑުވުންތަކަށް ރިއާޔަތްކުރި ވަރު ބެލުމަށްފަހު ޕެޓިޝަން ކޮމިޓީން ތަޅުމަށް ރެކޮމެންޑޭޝަންތަކެއް ފޮނުވަން ޕެޓިޝަން ކޮމިޓީ އިން އޮތީ ނިންމާފައެވެ.
