މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޯޑުގައި ހިމެނޭ ޕްރައިވެޓް ސެކްޓަރގެ ދެ މެމްބަރުން ކަމަށްވާ އަލްއުސްޡާޛް މުޙައްމަދު ޝަހުދީ އަންވަރު އާއި އައްސަދު އަލީ މަޤާމުން ވަކިކޮށްފިއެވެ.
މައުލޫމާތު ލިބިފައިވާ ގޮތުގައި ޝަހުދީއާއި އައްސަދު މަޤާމުން ވަކިކޮށްފައިވަނީ ހޮނިހިރު ދުވަހުގެ ވަގުތެއްގައެވެ.
މި ދެ ބޭފުޅުންނަކީ އެމްއެމްއޭ ބޯޑުގައި ޕްރައިވެޓް ސެކްޓަރ ތަމްސީލުކުރުމަށް އައްޔަންކޮށްފައިވާ ހަމައެކަނި ދެ މެންބަރުންނެވެ.
އައްސަދު އާއި ޝަހުދީ ވަކިކުރި ސަބަބެއް އެމްއެމްއޭއިން ހާމަކޮށްފަ ނުވި ނަމަވެސް އެ އޮތޯރިޓީގެ ބޯޑަށް މީގެ ކުރިންވެސް ބަދަލުގެންނަކަމަށް ވެއެވެ.
އައްސަދު އަލީއަކީ މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީގެ ޑެޕިއުޓީ ސެކްރެޓަރީ ޖެނެރަލްއެވެ. އަދި އަލްއުސްޡާޛް މުޙައްމަދު ޝަހުދީ އަންވަރަކީ މަޝްހޫރު ޤާނޫނީ ވަކީލެކެވެ. މީގެ އިތުރުން މޯލްޑިވްސް އިންޓަނޭޝަނަލް އާބިޓްރޭޝަން ސެންޓަރުގެ ޗެއަރމަންކަން ވެސް ކުރައްވައެވެ.
މި ދެ މެންބަރުން ވަކިކުރުމާ ގުޅިގެން އެމްއެމްއޭ ބޯޑުގެ އޮނިގަނޑަށް ބަދަލުތަކެއް އަންނާނެ ކަމަށް ބެލެވެއެވެ. އަދި މި ދެ މަޤާމަށް އައު މެންބަރުން އައްޔަންކުރާނެއެވެ.
