އެމްޑީޕީ ސަރުކާރުގެ ޔޫތު މިނިސްޓަރ އަހްމަދު މަހްލޫފްގެ ބައްފަ ޕީއެންސީ އަށް ވަގަށް ވައްދާފައިވާކަން ހާމަ ވެއްޖެއެވެ.
އެކްސްގައި ކުރެއްވި ޕޯސްޓެއްގައި މަހްލޫފް ވިދާޅުވީ، އޭނާގެ ބައްޕަ އަދި ކޮއްކޮއެއްވެސް މިވަނީ އޮޅުވާލައިގެން ޕީއެންސީ އަށް ވައްދާފައި ކަމަށެވެ.
"މިއީ ވަރަށް ޒިންމާދާރުކުޑަކޮށް ބަޔަކު ހިންގާފައިވާ އަމަލެއް." މަހްލޫފް ވިދާޅުވިއެވެ.
މީހުންގެ ޒާތީ މައުލޫމާތު ނަހަމަ ގޮތުގައި ބޭނުން ކޮށްގެން ސޮއި ފޯޖް ކޮށްގެން އަދި ދޮގު ހެކި ދީގެން ގިނަ އަދަދެއްގެ ބަޔަކު ޕީއެންސީ އަށް ވައްދާފައިވާ ކަން ވަނީ ފަޅާ އަރާފައެވެ. ގިނަ ބަޔަކު ސޯޝަލް މީޑިއާ ގައި ގެންދަނީ މިކަމުގެ ނުރުހުން ފާޅު ކުރަމުންނެވެ.
މަހްލޫފް ވިދާޅުވީ "މެންބަރުން ތިޔަ އިތުރުކުރައްވަނީ ވަރަށް އާދަޔާހިލާފު ގޮތަކަށް،" ކަމަށެވެ.
ޕާޓީ އަށް 100،000 މެންބަރުން ހަމަކުރަން ޕާޓީގެ ރައީސް ވިދާޅުވީމަ، ރައްޔިތުންގެ ސިއްރު މައުލޫމާތު ނަހަމަގޮތުގައި ބޭނުންކޮށްގެން އެއެއް، މިއެއް ނުބަލާ ޕީއެންސީ އަށް ވަގަށް ރައްޔިތުން ވެއްދި ފަރާތްތަކުގެ މައްސަލަ ބަލާ ފިޔަވަޅުއަޅަންޖެހޭ ކަމަށްވެސް މަހްލޫފް ވިދާޅުވިއެވެ.
އެމްޑީޕީގެ ދަފްތަރުގައި ހިމެނޭ ގިނަ އަދަދެއްގެ މެމްބަރުން ޕީއެންސީ އަށް ވަގަށް ބަދަލު ކޮށްފައިވާ އެތައް މައްސަލަ އެއް ފެންމަތިވެފައިވާއިރު، އޭގެ ތެރޭގައި އެމްޑީޕީ އަށް ނިސްބަތްވާ މިހާރުގެ މަޖިލިސް މެމްބަރަކާއި، ކުރީގެ ބައެއް މެމްބަރުންނާއި އެޕާޓީގެ ގައުމީ މަޖިލިސް މެމްބަރުންވެސް ހިމެނެއެވެ.
