މައްސަލަ ތަކެއް ޖެހި، ސަރުކާރު ކޯލިޝަނުން އެމްޑީއޭ ވަކިވެއްޖެ
4 މެއި 2025 | އާދީއްތަ 08:57ރިޔާސީ އިންތިޚާބުގެ ދެ ވަނަ ބުރުގައި އެމްޑީއޭ އިން ވަނީ ރައީސް ޞާލިޙު ދޫކޮށް، ރައީސް މުޢިއްޒުގެ ފަހަތަށް އެރުމަށް ނިންމައިފަ
ރައީސް މުޢިއްޒު އަދި އެމްޑީއޭގެ ލީޑަރު ސިޔާމް
ސަރުކާރު ހިންގާ ކޯލިޝަނުން، މޯލްޑިވިން ޑިވެލޮޕްމަންޓް އެލަޔަންސް (އެމްޑީއޭ) ވަކިވެފައިވާ ކަމަށް، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވިދާޅުވީ، ސަރުކާރު ކޯލިޝަންގައި މިހާރު އެމްޑީއޭ ނެތް ކަމަށެވެ. އެމަނިކުފާނު ވިދާޅުވީ ސަރުކާރު ކޯލިޝަންގައި ހަމައެކަނި އޮތީ، ޕީޕަލްސް ނެޝަނަލް ކޮންގްރެސް (ޕީއެންސީ) ކަމަށެވެ.
ނަމަވެސް، ސަރުކާރު ކޯލިޝަން އިން އެމްޑީއޭ ވަކިވެފައިވާ ސަބަބެއް ސާފުކޮށް ރައީސް މުޢިއްޒު ވިދާޅުވެފައި ނުވެ އެވެ. އޭގެ ބަދަލުގައި ރައީސް މުޢިއްޒު ވިދާޅުވީ، މައްސަލައެއް ނުޖެހޭ ކަމަށާއި، ކޮންމެ ވެސް ވަރެއްގެ ޚިޔާލު ތަފާތުވުންތަކެއް އުފެދުނު ކަމަށެވެ.
އެންމެ ފަހުން 2023 ވަނަ އަހަރު އޮތް ރިޔާސީ އިންތިޚާބުގެ ފުރަތަމަ ބުރުގައި އެމްޑީއޭ އިން ކޯލިޝަން ހެދީ އޭރުގެ ރައީސް އިބްރާހިމް މުޙައްމަދު ޞާލިޙާ އެކު އެވެ. އެ ކޯލިޝަން އުވާލީ އިންތިޚާބުގެ ދެ ވަނަ ބުރުގަ އެވެ.
ދެ ވަނަ ބުރުގައި އެމްޑީއޭ އިން ވަނީ ރައީސް ޞާލިޙު ދޫކޮށް، ރައީސް މުޢިއްޒުގެ ފަހަތަށް އެރުމަށް ނިންމައިފަ އެވެ. އޭގެ ފަހުން އިންތިޚާބުގެ ދެ ވަނަ ބުރުގައި އެ ޕާޓީ އިން މަސައްކަތް ކުރީ ރައީސް މުޢިއްޒު އިންތިޚާބު ކުރުމަށެވެ.
ރިޔާސީ އިންތިޚާބަށް ފަހު، 2024 ވަނަ އަހަރު އޮތް ރައްޔިތުންގެ މަޖިލީހުގެ އިންތިޚާބުގައި ޕީއެންސީ އާއި އެމްޑީއޭ އޮތީ ކޯލިޝަންގަ އެވެ. އެގޮތުން އެމްޑީއޭގެ ލީޑަރު އަދި މީދޫ ދާއިރާގެ މެމްބަރު އަހުމަދު ސިޔާމް މުޙައްމަދުގެ ދާއިރާ އަށް ޕީއެންސީ އިން ވާދަ ވެސް ނުކުރެ އެވެ.
ނަމަވެސް މަޖިލިސް އިންތިޚާބަށް ފަހު ސަރުކާރު ހިންގާ ޕީއެންސީ އާއި އެމްޑީއޭއާ ދެމެދު މައްސަލަތަކެއް ޖެހިފައިވާ ވާހަކަ ދެކެވެ އެވެ. މިއީ އެމްޑީއޭ ސަރުކާރު ކޯލިޝަން އިން ވަކިވެފައިވާ ކަމަށް ހާމަ ކުރި ފުރަތަމަ ފަހަރެވެ.
