ސިޔާސީ މަގާމުތަކުގައި ތިބި ބައެއް ފަރާތްތަކަށް އިސްތިއުފާ ދޭން އަންގަމުން އެބަދޭ
ޑރ. މުޢިއްޒުގެ ސަރުކާރުން އައްޔަނުކުރި ސިޔާސީ މުވައްޒަފުންގެ ޖުމުލަ އަދަދު މިހާތަނަށް ހާމަކޮށްފައެއްނުވޭ، 228 ސިޔާސީ މީހުން ވަކިކުރާނެ ކަމަށް ރައީސް ވިދާޅުވެފައިވޭ
ރައީސް އިންޑިއާއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންނެވުމުން މިނިސްޓަރުން ސަލާން ކުރައްވަނީ - ގިނަ ބަޔަކު މަތިބަރު ސަރުކާރެއްގެ ގޮތުގައި ޑރ. މުއިއްޒުގެ ސަރުކާރު ސިފަ ކުރޭ
ސަރުކާރުގެ ސިޔާސީ މަގާމުތަކުގައި ތިބި ބައެއް ފަރާތްތަކަށް މަގާމުން އިސްތިއުފާ ދޭން އަންގަމުންދާ ކަމަށް މަޢުލޫމާތު ލިބިއްޖެއެވެ.
ނަން ހާމަނުކުރުމަށް ޝަރުތުކޮށް މި ނޫހަށް މަޢުލޫމާތު ދެމުން ސަރުކާރުގެ މިނިސްޓްރީއެއްގެ ސިޔާސީ މަގާމެއްގައި ހުންނެވި ބޭފުޅަކު ބުދަ ދުވަހު ވިދާޅުވީ، ރައީސް އޮފީހުން ގުޅާ އޭނާ މަގާމުން އިސްތިއުފާ ދިނުމަށް އަންގާފައިވާފައިވާ ކަމަށެވެ.
"ބުނީ ފޯނުން ގުޅާފައިި މިހާރު ހުރި މަގާމުން އިސްތިއުފާ ދޭން ރައީސް ވިދާޅުވިއޭ" އޭނާ ވިދާޅުވިއެވެ.
މީދޫ ދާއިރާގެ މެންބަރު އަހްމަދު ސިޔާމް މުހައްމަދުގެ މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) ގެ ސްލޮޓެއްގައި ހުރި މި ފަރާތުން އިތުރަށް މަޢުލޫމާތު ދެމުން ހާމަކުރެއްވި ގޮތުގައި ރައީސް އޮފީހުން ގުޅާފައި އިސްތިއުފާ ދޭން އެންގި އިރު، އެހެން ވަޒީފާއެއް ހަމަޖައްސައިދޭނެ ކަމަށްވެސް ބުނެފައިވެއެވެ. އެހެން ނަމަވެސް އެކަމުގެ ތަފްސީލެއް ނުދޭ ކަމަށްވެސް އޭނާ ވިދާޅުވިއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން އައްޔަނުކުރި ސިޔާސީ މުވައްޒަފުންގެ ޖުމުލަ އަދަދު މިހާތަނަށް ހާމަކޮށްފައި ނުވިނަމަވެސް، 228 ސިޔާސީ މުވައްޒަފުން ވަކިކުރަން ވަނީ ނިންމަވާފައިވާ ކަމަށް ރައީސް ޑރ. މުޢިއްޒު ވަނީ އިޢުލާން ކުރައްވާފައެވެ.
މިކަން ހާމަކުރެއްވުމާ ގުޅިގެން ފާޑުކީ ބައެއް ފަރާތްތަކުން ބުނެފައިވަނީ ވަކިކުރާ އެންމެންނަކީ އެއްވެސް ބޭނުމެއް ނެތި ވަޒީފާތަކަށް ލާފައިވާ މީހުންކަން މިކަމުން ދޭހަވާ ކަމުގައެވެ.
