ހަމަލާއެއް ދީފާނެ ކަމުގެ އިންޒާރާއެކު ލަންކާގެ ސެކިއުރިޓީ މައްޗަށް ޖައްސައިފި

ލަންކާގައި ފަތުރުވެރިންގެ މެދުގައި މަގްބޫލު ސަރަހައްދަކަށް ހަމަލާއެއް ދީފާނެ ކަމުގެ އިންޒާރާ އެކު އެ ގައުމުގެ ސެކިއުރިޓީ މައްޗަށް ޖައްސައިފިއެވެ.

ކޮޅުނބުގައި ހުންނަ ލަންކާ އެމްބަސީން ވަނީ ޓެރަރިސްޓް ހަމަލާއެއް ދީފާނެ ކަމުގެ އިތުބާރު ހުރި މައުލޫމާތު ލިބިފައިވާ ކަމަށް ބުނެ ލަންކާގެ މަޝްހޫރު ސާފިންގ މަންޒިލަކަށް ޒިޔާރާތް ކޮށްފާނެ އެ ގައުމުގެ ރައްޔިތުންގެ ސަމާލު ކަމަށް އެކަން ގެނެސްފައެވެ.

އެމެރިކާ އެމްބަސީން ދަތުރުވެރިންނަށް އިންޒާރު ނެރެފައިވާ އިރު، އިޒްރޭލުގެ ބަޔަކު ހިންގާ އެ ރިސޯޓަށް ހަމަލާދޭނެ ކަމަށް ބުނެ އޮންލައިން ޕޯސްޓްތަކެއް ކޮށްފައިވާ ކަމަށް މީޑީއާ ރިޕޯޓްތައް ބުނެއެވެ.

ސްރީލަންކާގެ ފުލުހުންގެ ތަރުޖަމާނަކު ބުދަ ދުވަހު އެސޯޓިއޭޑެޓް ޕްރެސް (އޭޕީ) އަށް މައުލޫމާތު ދެމުން ބުނެފައިވަނީ އިޒްރޭލު ފަތުރުވެރިންނަށް އޮތް ނުރައްކަލެއްގެ މަޢުލޫމާތު ލިބުމާ ގުޅިގެން މަޝްހޫރު ސާފިންގ މަންޒިލެއްގެ ސަލާމަތީ ފިޔަވަޅުތައް ވަރުގަދަ ކޮށްފައިވާ ކަމަށެވެ.

ފުލުހުންގެ ތަރުޖަމާނު ނިހާލް ތަލްދުވާ ވިދާޅުވީ ޤައުމުގެ އިރުމަތީ ސަރަޙައްދުގައި އޮންނަ "އަރުގަމް ބޭގައި" ޚާއްޞަ ސަލާމަތީ ފިޔަވަޅުތަކެއް އަޅާފައިވާ ކަމަށެވެ.

އަރުގަމް ބޭ ސަރަޙައްދުގައި މަޝްހޫރު ފަތުރުވެރިކަމުގެ މަންޒިލްތަކަކަށް ހަމަލާއެއް ދޭން އުޅޭކަމުގެ އިތުބާރުހުރި މަޢުލޫމާތު ލިބިފައިވާތީ، ތަލްދުވާ ވިދާޅުވީ، ސަރަޙައްދީ ފުލުހުން ވޭތުވެދިޔަ ދުވަސްތަކުގައި ސަލާމަތީ ފިޔަވަޅުތައް ހަރުދަނާކޮށް، މަގުމަތީގެ ޗެކްޕޮއިންޓްތަކާއި އުޅަނދުފަހަރު ބަލައި ފާސްކުރުން އިތުރުކޮށްފައިވާ ކަމަށެވެ.                  

ލަންކާ ސަރުކާރުން އަދި މިކަމާ ބެހޭ ރަސްމީ އެއްޗެއް ބުނެފައެއް ނުވެއެވެ. އެހެން ނަމަވެސް އެ ސަރަހައްދުގައި ގިނަ އަދަދެއްގެ ފުލުހުން ހަތިޔާރާއެކު ހަރަކާތްތެރިވަމުންދާ މަންޒަރުތައް ވަނީ އާންމު ވެފައެވެ.