ސިންގަޕޫރު ކައިރިން އެމެރިކާގެ މަނަވަރެއް ޓޭންކަރެއްގައި ޖެހި 10 މީހުން ގެއްލި އެތައް ބަޔަކު ޒަޚަމްވެއްޖެ

އެމެރިކާގެ މަނަވަރެއް ސިންގަޕޫރު ބޭރުން ޓޭންކަރެއްގައި ޖެހި ހިނގި އެކްސިޑެންޓްގައި ދިހަ މީހުން ގެއްލި، އެތައް ބަޔަކު ޒަޚަމް ވެއްޖެއެވެ.

އެކްސިޑެންޓްގައި މަނަވަރަށްވަނީ ގެއްލުން ލިބިފައެވެ.

މިއީ މި އަަހަރުގެ މިހާތަނަށް އެމެރިކާގެ މަނަވަރުތަކަށް ކުރިމަތިވި ހަތަރުވަނަ އެކްސިޑެންޓެވެ.

މިސައިލް ހަލާކު ކޮށްލުމަށް ޚާއްސަ ކޮށްފައިވާ ޔޫ.އެސް.އެސް ޖޯން އެސް. މެކެއިން އެކްސިޑެންޓްވީ، އެލްނިކް އެމް.ސީ ނަމަކަށް ކިޔާ ތެލާއި، ކެމިކަލް އުފުލާ ލައިބީރިއާގައި ރަޖިސްޓްރީ ކޮށްފައިވާ ޓޭންކަރުގައި ޖެހިއެވެ.

މި ހާދިސާގައި 10 މީހުން ގެއްލުމުގެ އިތުރުން 5 މީހަކަށް އެކި ވަރުގެ އަނިޔާ ލިބިފައިވާ ކަމަށް އެމެރިކާގެ ނޭވީން ހާމަ ކޮށްފައިވެއެވެ.

މީހުން ސާލާމަތް ކުރުމާއި ހޯދުމުގެ މަސައްކަތުގައި ހެލިކޮޕްޓަރާއި، ޓަގްބޯޓާއި، ކޯސްޓްގާޑް އުޅަނދުފަހަރު ދަނީ ހަރަކާތްތެރި ވަމުންނެވެ.

ހާދިސާ ހިނގީ ހޯމަ ދުވަހުގެ ފަތިހުގެ ވަގުތެއްގައި މަނަވަރު ސިންގަޕޫރުގެ ބަނދަރަށް ވަންނަން ދަނިކޮށްނެވެ.

އެކްސިޑެންޓް ހިނގި ސަރަހައްދަކީ ފާއިތުވި ދިހަ އަހަރަށް ބަލާއިރު ގިނަ އެކްސިޑެންޓް ތަކެއް ހިނގާފައިވާ ސަރަހައްދެއްކަން ފާހަގަ ކުރެވެއެވެ.

ޔޫ.އެސް.އެސް ޖޯން އެސް. މެކެއިން އަކީ އެމެރިކާގެ ސެވަންތް ފްލީޓްގައި ހިމެނޭ މަނަވަރަކެވެ. މަނަވަރު ހަރަކާތްތެރިވާ މަރުކަޒަކީ ޖަޕާންގެ ޔޮކުސުކާއެވެ.

އެކްސިޓެންޑްގައި ޓޭންކަރަށްވެސް ގެއްލުނު ލިބުނެވެ. ނަމަވެސް ޓޭންކަރުން ތެޔޮ ބޭރުވެފައެއް ނުވެއެވެ.