ރައީސް މުއިއްޒު އަކީ ރާއްޖޭގެ ތާރީހު ދެކެފައި ނުވާ ވަރުގެ އަންޕޮޕިއުލަރ ވެރިއެއް - ޝިފާޒް
ޝިފާޒް ވިދާޅުވީ ރައީސް މުއިއްޒުގެ މި ވެރިކަން ފަސް އަހަރު ވަންދެން އޮތުން އެއީ އަތް އުރާލައިގެން ތިބެވޭނެ ކަމެއް ކަމަށް ޤަބޫލު ނުކުރައްވާ ކަމަށް
ދި ޑިމޮކްރަޓްސް ޕާޓީގެ ކުރީގެ ނައިބް ރައީސް މުޙައްމަދު ޝިފާޒް (ޝިއްޕެ)
ރައީސް ޑރ.މުހައްމަދު މުއިއްޒު އަކީ ރާއްޖޭގެ ތާރީހު ދެކެފައި ނުވާ ވަރުގެ މަގްބޫލްކަން ކުޑަ ރައީސެއް ކަަމަށް އެމްޑީޕީ އަދި ދަ ޑިމޮކްރަޓްސްގެ ކުރީގެ ނައިބު ރައީސް މުހައްމަދު ޝިފާޒް ވިދާޅުވެއްޖެއެވެ.
އޭނާ އެފަދައިން ވިދާޅުވީ ހޯމަ ދުވަހު ހެނދުނު، ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.
އެ ޕްރޮގްރާމްގައި ވާހަކަދައްކަވަމުން ޝިފާޒް ވަނީ އޭނާ މި ވެރިކަމާއި މެދު ދެކެވަޑައިގަންނަވާ ގޮތް ހާމަކުރައްވާފައެވެ.
މި ވެރިކަމަށް އަހަރަކަށް ވުރެ ގިނަ ދުވަސް ވެގެންދާއިރު މިހާބޮޑަށް، މިހާ އަވަހަށް އާއްމުންގެ މަގްބޫލްކަން ގެއްލިފައިވާ ސަރުކާރެއް ފެނިފައި ނުވާ ކަމަށް ޝިފާޒް ވިދާޅުވިއެވެ. ސަރުކާރު ނާޤާބިލްކަމަށް ބުނަނީ އިދިކޮޅު ފަރާތްތަކުގެ ތާއީދު ނެތުމުން ނޫން ކަމަށް ވެސް ޝިފާޒް ވިދާޅުވިއެވެ. އިދިކޮޅުގައި ތިބޭ ބަޔަކު އަބަދުވެސް މަސައްކަތް ކުރާނީ ކަންކަން ރަނގަޅުކޮށް ޖަވާބުދާރީކުރުވަންކަމަށް ވުމާއި އެކު އިދިކޮޅުގައި ތިބޭ ބަޔަކަށް ސަރުކާރުގެ ރަނގަޅު ކަންކަން ނުފެނިދާނެ ކަމަށް ޤަބޫލުކުރައްވާ ކަމަށް ޝިފާޒް ވިދާޅުވިއެވެ. އެހެންކަމުން ވެރިކަމުގެ މަގްބޫލްކަން ކުޑަކަމަށް ބުނަނީ އިދިކޮޅުން ދެކޭ ގޮތަށް ބިނާކޮށް ނޫންކަން އޭނާ ވަނީ ފާހަގަކުރައްވާފައެވެ.
އެހެންނަމަވެސް މި ވެރިކަން ޤާއިމްކުރުމަށް ސީދާގޮތުން މަސައްކަތްކުރެއްވި ބޭފުޅުންގެ ބޮޑު އިންސައްތައެއް ވެރިކަމާއި މެދު ނުރުހުމުން، އެ ހިސާބުން އެއީ ނާޤާބިލް ސަރުކާރެއް ކަމަށް ޤަބޫލުކުރަން ވާނެ ކަމަށް ޝިފާޒް ވިދާޅުވިއެވެ. ޝިފާޒް ވިދާޅުވީ ރައީސް މުއިއްޒު އަށް ވޯޓުދެއްވި ބޭފުޅުންގެ 60% ތާއީދުވެސް މިހާރު އެ މަނިކުފާނަށް އޮންނާނެ ކަމަށް ޤާބޫލު ނުކުރައްވާ ކަމަށެވެ.
ޝިފާޒް ވަނީ ސަރުކާރުގެ ޢަމަލުތައް ހުރި ގޮތަށް ވަރަށް ބޮޑަށް ފާޑު ވިދާޅުވެފައެވެ. ސަރުކާރުގެ ކަންކަން ރަނގަޅަށް ނުދާކަމަށް ފާހަގަކުރައްވާ ޝިފާޒް ވިދާޅުވީ ރައީސް މުއިއްޒުގެ މި ވެރިކަން ފަސް އަހަރު ވަންދެން އޮތުން އެއީ އަތް އުރާލައިގެން ތިބެވޭނެ ކަމެއް ކަމަށް ޤަބޫލު ނުކުރައްވާ ކަމަށެވެ. މީގެ އިތުރުން ވެރިކަން ބަދަލުކުރުމުގެ ބާރަކީ ރައްޔިތުންގެ މަޖިލީހަށް ލިބޭ ބާރެއް ކަމަށާއި އުސޫލާއި އެއް ގޮތަށް މަޖިލީހުން ވެރިކަން ބަދަލުކުރުމަކީ އެއީ ބަޣާވާތެއް ކަމަށް ސަރުކާރުން ސިފަކުރާތީ އެކަމާއި މެދު ޝިފާޒް ވަނީ ކަންބޮޑުވުން ފާޅުކޮށްފައެވެ. އެހެންނަމަވެސް ރާއްޖޭގެ ޤާނޫނުތައް އޮތްގޮތުން މަޖިލީހުން ރައީސަކު ވަކި ކުރުމަކީ ބަޢާވާތެއް ކަމަށް ބެލެވޭނެ ގޮތެއް ނެތްކަން އޭނާ ވަނީ ފާހަގަކުރައްވާފައެވެ.
