ޑިމޮކްރަޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަމަށް ދެކެން ދަތި - ހަސަން ލަތީފް
12 ޖެނުއަރީ 2025 | އާދީއްތަ 19:38ޑިމޮކްރަޓްސްއަށް ތާއީދު ހޯދާ މަގުބޫލު ޕާޓީއަކަށް ހެދުމަށް ވަރަށް ގިނަ މަސައްކަތްތަކެއް ކުރެވުނު
ހެންވޭރު ހުޅަނގު ދާއިރާގެ މެންބަރު ހަސަން ލަތީފް
ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދެވި ޑިމޮކްރަޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަމަށް ދެކެން ދަތި ކަމަށް އެމްޑީޕީގެ ކުރީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ހަސަން ލަތީފް ވިދާޅުވީ ދެ ޕާޓީއަށް ބަލާއިރު އަސާސީ ގަވާއިދުގައި އަދި ލިޔެފައިވާ އުސޫލުތަކުގައި ވެސް މާބޮޑު ތަފާތުތަކެއް ނެތް ކަމަށެވެ. އަސާސްތަކާއި އުސޫލުތަކާއި ހަމަތަކަށް ބަލާއިރު ލިޔެފައި ހުރީ ދާދި އެއްވާހަކައެއް ކަމަށާއި، އެއިރު ފެނިގެންދިޔަ ކަންކަމުގެ މައްޗަށް ބަލާ އެމްޑީޕީ ސަރުކާރު އޮތް އިރު ފާޑުކިއުންތައް އަމާޒުކޮށްފައިވަނީ ކަންކަން އިސްލާހުކުރުމަށް ކަމަށެވެ. ޑިމޮކްރަޓްސްއިން ވަކިވި ސަބަބަށް އަލިއަޅުވާލައްވާ ހަސަން ލަތީފް ވިދާޅުވީ ޑިމޮކްރެޓްސްއަށް ތާއިދު ހޯދާ މަގުބޫލު ޕާޓިއަކަށް ހެދުމަށް ވަރަށް ގިނަ މަސައްކަތްތަކެއް ކުރެވުނު ކަމަށެވެ.
ނަމަވެސް އެކިއެކި ސަބަބުތަކަށްޓަކައި މިއަދާ ހަަމައަށް ދިޔައިރުވެސް އެކަމެއް ކުރެވިފައި ނުވާކަމަށް ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ ސިޔާސީ ޕާޓީތަކަކީ ރައްޔިތުންނަށް ހިދުމަތްކުރުމަށް އުފައްދާ ތަންތަން ކަމަށެވެ. އަދި ސިޔާސީ ޕާޓީތަކުން ރައްޔިތުންނަށް ހިދުމަތްކުރެވެނީ ސިޔާސީ ޕާޓީއެއް ސަރުކާރަށް އައިސްގެން ކަމަށެވެ. އަނެއް ގޮތަކީ އިދިކޮޅު ސިޔާސީ ޕާޓީއެއްގެ ގޮތުގައި އޮވެގެން ސަރުކާރު ޖަވާބުދާރީކޮށްގެން ރައްޔިތުންނަށް ހިދުމަތްކުރުން ކަަމަށް ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ ޑިމޮކްރަޓްސްއަށް ސަރުކާރެއް ގާއިމްކޮށްގެން، ޑިމޮކްރަޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަމަށް ދެކެން ދަތިކަމަށެވެ.
ހަސަން ލަތީފް އެމްޑީޕީގައި ވިސްނުންތަކެއް އެބަހުރި ކަމަށެވެ. އޭގެ ތެރޭގައި ދައުލަތަށް ވާންޖެހޭ ގޮތާއި، ސަރުކާރާއި، ރައްޔިތުންގެ މަޖިލީހަށް ވާންޖެހޭގޮތުގެ ވިސްނުންވެސް އެބަހުރި ކަމަށާއި، އަދި މުޅިނިޒާމަށް ގެންނަންޖެހޭ ބަދަލުތަކުގެ ވިސްނުންވެސް އެބަހުރިކަމަށެވެ. މީގެ އިތުރުން އާންމު ރައްޔިތު މީހާއަށް ވަމުންދާގޮތާއި ގައުމަށް ވަމުންދާގޮތުގެ ބަދަލުތަކެއް ގެންނާނެ ކަހަލަ ގޮތަކަށް ސިޔާސަތުތަކެއް ބައްޓަންކޮށްގެން އިންތިހާބަށް ކުރިމަތިލައިގެން ރައްޔިތުންގެ ތާއިދާއެކީގައި ވޯޓުން ހޮވިގެން ސަރުކާރެއް އުފަންކުރުމުގެ ވިސްނުމެއް އެބައޮތް ކަމަށެވެ.
އޭނާ ވިދާޅުވީ މި ވިސްނުމާއެކު އެމްޑީޕީގެ ތެރޭގައި މަސައްކަތް ކުރުމުގެ ފުރުސަތު އޭނާއަށް ލިބޭނެކަމަށް ގަބޫލުކުރައްވާ ކަމަށެވެ.
ހަސަން ލަތީފް މިފަދައިން ވިދާޅުވެފައިވާއިރު، މެދުހެންވޭރު ދާއިރާގެ ކުރީގެ މެމްބަރު އަލީ އާޒިމް ވެސް ވަނީ އެމްޑީޕީ އާއި ގުޅިވަޑައިގަންނަވަން ނިންމެވީ ސިޔާސީ ގޮތުން ކުރިއަށް ދާން ބޭނުންވެވަޑައިގަންނަވާތީ ކަމަށް ވިދާޅުވެފައެވެ.
ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރަޓްސްގެ ރައީސްގެ މަގާމުން އިސްތިއުފާ ދެއްވި ހަސަން ލަތީފް އާއި އެ ޕާޓީގެ ނައިބު ރައީސްގެ މަގާމުން އިސްތިއުފާ ދެއްވި މުހައްމަދު ޝިފާޒް (ޝިއްޕެ) އެމްޑީޕީގެ މެމްބަރޝިފް ފޯމް ޕާޓީގެ އޮފީހަށް ވަނީ ހުށަހަޅުއްވާފައެވެ.
