ސާފް ޗެމްޕިއަންޝިޕް ކުޅޭ ފޯމެޓަށް ބަދަލު ގެނެސްފި

ސާފް ޗެމްޕިއަންޝިޕް ފުޓުބޯޅަ މުބާރާތް ކުޅެމުން އަންނަ ފޯމެޓަށް ބަދަލު ގެންނަން ނިންމައިފި އެވެ.

ސާފް ޗެމްޕިއަންޝިޕް ކުޅެމުން އަންނަ ފޯމެޓަށް ބަދަލު ގެންނަން ނިންމީ ސާފްގެ ހިންގާ ކޮމެޓީގެ ރަސްމީ ބައްދަލުވުމަކުންނެވެ. އެގޮތުން ނިންމާފައި ވަނީ މިއަހަރުން ފެށިގެން ސާފް ޗެމްޕިއަންޝިޕް ހޯމް އެންޑް އަވޭ ފޯމެޓުގެ ދަށުން ކުޅުމަށެވެ. އެ ފޯމެޓުގެ ދަށުން ކުޅޭ ފުރަތަަމަ މުބާރާތް އޮންނާނީ މިއަހަރުގެ ޖޫން މަަހުގެ 15 އިން، ޖުލައި މަހުގެ 25 ވަނަ ދުވަހުގެ ނިޔަލަށެވެ.

މިއަހަރުގެ މުބާރާތް ހޯމް އެންޑް އަވޭ އުސޫލުން ކުރިއަށް ގެންދަން ނިންމާފައިވާއިރު، އިންޑިއާ އާއި ޕާކިސްތާން ބައްދަލު ކުރާ މެޗު ނިއުޓްރަލް ދަނޑެއްގައި ކުޅުމަށް ނިންމާފައިވާ ކަމަށް ސާފްގެ ޖެނަރަލް ސެކްރެޓަރީ އަންވާރުލް ހައްގު ވަނީ ވިދާޅުވެފަ އެވެ. އޭނާ ވިދާޅުވީ ހޯމް އެންޑް އަވޭ އުސޫލުން މުބާރާތް ބޭއްވުމުގައި އެއްވެސް މައްސަލައެއް ނުވަތަ ދަތިކަމެއް ކުރިމަތިވެއްޖެ ނަމަ، މުބާރާތް ބާއްވާނީ ސެންޓްރައިޒްކޮށް ކަމަށެވެ.

މީގެ އިތުރުން ސާފްގެ ހިންގާ ކޮމެޓީގެ ބައްދަލުވުމުގައި ވަނީ ބައެއް އެހެން ކަންކަން ވެސް ނިންމައިފަ އެވެ. އެގޮތުން ސާފް ކުލަބު ޗެމްޕިއަންޝިޕް ފުޓުބޯޅަ މުބާރާތް 2026 ވަނަ އަހަރު ބާއްވަން ވަނީ ނިންމައިފަ އެވެ. މީގެ އިތުރުން 23 އަހަރުން ދަށުގެ ސާފް މުބާރާތެއް ބޭއްވުމާއި، ސާފް އަންހެން ކުލަބު ޗެމްޕިއަންޝިޕް ބޭއްވުމަށް ވެސް ވަނީ ނިންމައިފަ އެވެ.