ލުއި ފީޗަރތަކާއި އެކު، "އަވަސް އެޕް" ލޯންޗުކޮށްފި

ރާއްޖޭގެ އެންމެ ކާމިޔާބުކަމާއި އެކު ޓެކްސީގެ ޚިދުމަތް ދެމުން އަންނަ އަވަސްގެ ފަރާތުން ލުއި ފީޗަރތަކާއި އެކު، "އަވަސް އެޕް" ލޯންޗުކޮށްފިއެވެ.

މުޅިން އަލަށް ތައާރަފްކުރި އެ އެޕް ލޯންޗްކޮށްފައި ވަނީ ހުޅުމާލޭ ސެންޓްރަލް ޕާކުގައި ހުކުރު ދުވަހުގެ ރޭ ބޭއްވި ކުލަގަދަ ހަފްލާއެއްގައެވެ.

އެ އިވެންޓު ޝަރަފުވެރިކޮށް ދެއްވާ، އަވަސް އެޕް ރަސްމީކޮށް އިފްތިތާހުކޮށްދެއްވާފައި ވަނީ ބީއެމްއެލްގެ ސީއީއޯ މުހައްމަދު ޝަރީފުއެވެ.

މީގެ އިތުރުން އެ އިވެންޓްގައި ބައިވެރިވި މީހުންގެ ތެރެއިން، އަވަސް އެޕް ފޯނަށް ޑައުންލޯޑުކޮށް، އެ ސަރަހައްދުގައި ހުރި ކިއުއާރްކޯޑް ސްކޭން ކުރި މީހުންގެ ތެރެއިން ގުރުއަތުން ހޮވުނު ފަރާތަށް ހަދިޔާއެއްގެ ގޮތުން ޕީއެސް 5 އެއް ވަނީ ދީފައެވެ.

އަވަސްގެ ފަރާތުން ވަނީ މި އެޕާއި އެކު މުހިންމު ލުއިތަކެއް ކަސްޓަމަރުންނަށް ލިބިދޭކަން ފާހަގަކޮށްފައެވެ. އަދި ކަސްޓަމަރުންނާއި ޑްރައިވަރުންނަށް ވެސް ދަތުރާއި މެދު އިތުރަށް ރައްކާތެރިކަން ލިއްބާދޭނެ ފީޗަރތައް މި އެޕްގައި މިހާރު ހިމެނޭ ކަމަށް އަވަސް އިން ބުނެއެވެ.

އެގޮތުން މިހާރު ދަތުރު ފެށުމުގެ ކުރިން ކަސްޓަމަރުގެ ފޯނަށް އަންނަ މެސެޖު ޑްރައިވަރާއި ހިއްސާކުރަން ޖެހެއެވެ. ދަތުރު ފެށެނީ އެ ހިސާބުންނެވެ. އަދި ޑްރައިވަރުގެ އެކައުންޓް މައުލޫމާތު އެޕް އިން ފެނުމާއި، ކަސްޓަމަރާއި ޑްރައިވަރުގެ ނަމްބަރު މާސްކްކޮށް ސިއްރު ކުރުމުގެ ފީޗަރ މި އެޕްގައި ހިމެނޭކަން ފާހަގަކޮށްލެވެއެވެ.

ހަމައެހެންމެ ދުރާލާ ދަތުރުތައް ވަކި ވަގުތަކަށް ބުކް ކުރުމުގެ ފީޗަރގެ ސަބަބުން ގަޑިއަށް ތަނަކަށް ދާން ބޭނުންވާ ކަސްޓަމަރުންނަށް އެ ގަޑިއަކަށް އުޅަނދެއް ބުކް ކުރުމުގެ ފުރުސަތު ލިބިގެންދެއެވެ. މީގެ އިތުރުން އަވަސް އިން ވަނީ ދަތުރުތައްކޮށްގެން އިނާމުތައް ލިބޭ ފަދަ ޚާއްސަ ޕްރޮމޯޝަނެއް ވެސް ފަށާފައެވެ.

އަވަސް އިން ބުނީ އުންމީދަކީ ކަސްޓަމަރުންނަށް ލުއިފަސޭހަ ރައްކާތެރި ޚިދުމަތް އަވަސް މިނެއްގައި ފޯރުކޮށްދިނުން ކަމަށެވެ.

ހުކުރު ދުވަހު ހަވީރު އަވަސްގެ ފަރާތުން ވަނީ ޚާއްސަ ހަވީރެއް ބާއްވާފައެވެ. ކުޑަކުދިންނަށް ކަމުދާ ގިނަ ހަރަކާތްތަކާއި އެކު ކުރިއަށް ގެންދިޔަ މި ހަރަކާތުގައި ރޮބޯމެންގެ ނެށުމާއި، ހަރަކާތްތައް ވަނީ ދައްކާލާފައެވެ.

ހުކުރު ދުވަހުގެ ރޭގެ އިވެންޓް ނިންމާލާފައި ވަނީ ހަވާގެ ކުލަ ގަދަ ހަރަކާތާއި އެކުގައެވެ.