މާލޭގައި ފެން ބޮޑުވެއްޖެ
9 ސަރަހައްދެއްގައި ޕަމްޕް ބަހައްޓައިގެން ފެން ހިންދަނީ
11 ޖެނުއަރީ 2025 - މާލޭގެ މަގުތަކުގައި ފެންބޮޑުވެފައި
ހޮނިހިރު ވިލޭރޭ މާލެ އަށް ހުއްޓުމެއްނެތި ވެހެމުންދިޔަ ވާރޭގެ ސަބަބުން މާލޭގެ މަގުތަކުގައި ފެން ބޮޑުވެއްޖެއެވެ.
ފެން ބޮޑުވެފައިވާ މަގުތަކުން ފެން ހިންދުމުގެ މަސައްކަތުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ސިފައިން ދަނީ ހަރަކާތްތެރިވަމުންނެވެ.
ހޮނިހިރު ދުވަހުގެ ހެނދުނު 6:30 އާ ހަމައަށް މާލޭގެ 8 ސަރަހައްދެއްގައި 19 ޕަންޕު ބަހައްޓައިގެން 6835 ޓަނުގެ ފެން ހިންދާފައިވާ ކަމަށް ވެސް އެމްއެންޑީއެފް އިން ބުނެފައިވެއެވެ.
އެމްއެންޑީއެފް އިން ހާމަ ކޮށްފައިވާ ގޮތުގައި ފެން ހިންދުމުގެ މަސައްކަތް ވެސްޓް ޕާކު ސަރަހައްދާއި، އައިޖީއެމްއެޗް ސަރަހައްދާއި ވިލިމާލެ ފެރީ ޓާމިނަލް، ސަލްމާން މިސްކިތް ސަރަހައްދު، ބޮޑު ވަޅު، ދަރުބާރުގެ ސަރަހައްދު، ހަވީރީހިނގުން އަދި ސޯޝަލް ސެންޓަރު ކައިރީގައި ފެން ހިންދަމުން ދާއިރު، ވެލިބަސްތާ ޖެހުމުގެ މަސައްކަތް ވެސް ދަނީ ކުރަމުންނެވެ.
މާލެއަށް ކުރަމުންދާ ވިއްސާރައާއި ގުޅިގެން ހޮނިހިރު ދުވަހުގެ ހެނދުނު 7:00 އާ ހަމަ އަށް 58 ގެއަކަށް އެހީތެރިކަން ފޯރުކޮށްދެވިފައިވާ ކަމަށް ވެސް އެމްއެންޑީއެފް އިން ވަނީ ބުނެފައެވެ.
ޖެނުއަރީ މަހުގެ 3 ވަނަ ދުވަހު ވެސް މާލެ އަށް ބޯކޮށް ވާރޭ ވެހުމުގެ ސަބަބުން މަގުތަކުގައި ފެންބޮޑުވެ ފެން ހިންދުމުގެ މަސައްކަތް ވަނީ ކޮށްފައެވެ.
އެ ދުވަހުގެ ވިއްސާރައިގައި ރެކޯޑް މިންވަރަކަށް މާލެ އަށް ވާރޭވެހި، 24 ގަޑިިއިރު ތެރޭ 161.9 މިލިމީޓަރުގެ ވާރޭ ރެކޯޑް ކުރެވުނު ކަމަށް މޫސުމާ ބެހޭ އޮފީހުން ވަނީ ހާމަ ކޮށްފައެވެ.
ޖެނުއަރީ 3 ވަނަ ދުވަހުގެ ވިއްސާރައިގައި 20،000 ބަސްތާ ވެލި ފެންގަނޑު ކޮންޓްރޯލް ކުރުމަށް މާލޭ ސިޓީ ކައުންސިލުން ވަނީ ފޯރުކޮށްދީފައެވެ.
އެ ހާދިސާގައި އެހީތެރިކަމަށް 740 ފަރާތަކުން އެދުނު ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ ހާމަ ކޮށްފައެވެ. އަދި 27 ގޭބިސީ އެއްގެ 226 މީހުންނަށް ވަގުތީ ބޯހިޔާވަހިކަން ފޯރުކޮށް ދިން ކަމަށް ވެސް އެންޑީއެމްއޭ އިން ބުނެފައިވެއެވެ.
އެދުވަހުގެ އޮޕަރޭޝަނަށް 61،500 ރުފިޔާ ހޭދަވި ކަމަށާއި، ހާލުގައި ޖެހުނު މީހުންނަށް އެހީތެރިކަން ފޯރުކޮށްދޭން ދެ ލައްކަ ރުފިޔާ ހޭދަވި ކަމަށާއި އެއީ މިހާތަނަށް ހިންގުނު މިފަދަ އެންމެ ބޮޑު އޮޕަރޭޝަން ކަމަށް ވެސް އެންޑީއެމްއޭ އިން ހާމަކޮށްފައި ވެއެވެ.
މިހާރު ކުރަމުންއަންނަ ވިއްސާރަ މުޅި ރާއްޖެއަށް ކުރާނެކަމަށް މެޓުން ވަނީ ލަފާ ކޮށްފައެވެ.
މެޓް އޮފީހުން ވަނީ ބ. އަތޮޅުން ފެށިގެން ދ. އަތޮޅާ ހަމައަށް ރީނދޫ ސަމާލު ނެރެފައެވެ. މިސަރަޙައްދަށް ގުގުރުމާއެކު ބޯކޮށް ވާރޭ ވެހޭނެ ކަމަށް ކަމަވެސް މެޓް އޮފީހުން ބުނެއެވެ.
