ބޯކޮށް ވާރޭވެހި ފެން ބޮޑުވާނެ ކަމަށް ލަފާކޮށް ހުވަދޫއަށް އޮރެންޖް އެލާޓް ނެރެފި
9 ޖެނުއަރީ 2025 | ބުރާސްފަތި 10:40ގުގުރުމާ އެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް އޮރެންޖް އެލާޓް ނެރުނީ މެންދުރު 12:50 އިން ފެށިގެން 15:00 ޖަހަންދެން
ދ.މީދޫއަށް ބޯކޮށް ވާރޭވެހި ފެން ބޮޑުވެގެން އެހީތެރިކަން ފޯރުކޮށްދިނުމުގައި އެމްއެންޑީއެފް އިން ހަރަކާތްތެރިވަނީ
ގުގުރުމާ އެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކޮށް ގއ. އާއި ގދ. އަތޮޅަށް އޮރެންޖް އެލާރޓް މިއަދު ނެރެފި އެވެ.
މޫސުމާ ބެހޭ ގައުމީ އިދާރާ (މެޓް އޮފީސް) އިން ބުނީ ގުގުރުމާ އެކު ބޯކޮށް ވާރޭވެހި ފެންބޮޑުވާނެ ކަމަށް ލަފާކޮށް އޮރެންޖް އެލާޓް ނެރުނީ މެންދުރު 12:50 އިން ފެށިގެން 15:00 ޖަހަންދެންނެވެ.
މެޓް އޮފީހުން ވަނީ އޮރެންޖް އެލާރޓް ނެރުމުގެ އިރުކޮޅެއް ކުރިން އެ ސަރަހައްދަށް ޔެލޯ އެލާރޓް ވެސް ނެރެފައެވެ. އެލާޓް ލެވަލް މަތިކުރީ އޭގެ 15 ވަރަކަށް މިނެޓު ފަހުންނެވެ. އޭގެ 15 ވަރަކަށް މިނެޓު ކުރިން އެ ސަރަހައްދަށް ވައިޓް އެލާޓް ވެސް ނެރުނެވެ.
އަދި ބޯކޮށް ވާރޭވެހި ގުގުރާނެ ކަމަށް ލަފާކޮށް 12:15 އިން އިން ފެށިގެން 18:00 ޖަހަންދެން ވައިޓް އެލާޓް ވެސް ނެރުނެވެ.
މިއީ މި އަހަރު އޮރެންޖް އެލާރޓް ނެރުނު ދެވަނަ ފަހަރެވެ. ޖެނުއަރީ 3، ގައި މެދުރާއްޖެ ތެރެއަށް މޫސުން ގޯސްވެ، ބ. އަތޮޅުން ފެށިގެން ތ. އަތޮޅަށް އޮރެންޖް އެލާޓް ނެރުނެވެ.
ރާއްޖޭގައި މޫސުން ދަރަޖަ ކޮށްފައި އޮންނަ ގޮތުން ނެރެނީ ވައިޓް، ޔެލޯ، އޮރެންޖް، ރެޑް އަދި ވިއްސާރަ އަލިވުމުން، ގްރީން އެލާރޓެވެ. އޮރެންޖް އެލާރޓް ނެރެނީ އެއް ގަޑިއިރު ތެރޭގައި 90 މިލިމީޓަރުގެ ވާރޭވެހި، ގަޑިއަކު 63 މޭލަށް ވައި ޖެހޭނެ ކަމަށް ލަފާކުރެވުމުންނެވެ.
މިދިޔަ ހުކުރު ދުވަހު ވެސް ވަނީ ފެންބޮޑުވާނެ ކަމަށް ލަފާކޮށް ރާއްޖޭގެ ބޮޑު ސަރަހައްދަކަށް އޮރެންޖް އެލާރޓް ނެރެފަ އެވެ. އެ ދުވަހު ވެހުނު ވާރޭގައި އެންމެ ބޮޑު ގެއްލުމެއް ލިބުނީ މާލެއަށެވެ. މާލޭގައި ވަރަށް ބޮޑަށް ފެންބޮޑުވެ، ގޭގެއަށާއި ފިހަރާތަކަށް ވަރަށް ބޮޑަށް ފެންވަދެ، ގެއްލުންވި އެވެ.
