އިކޮނޮމިކް ކްރައިމް ޑިޕާޓްމެންޓްގެ ހެޑް ރަޖުނީއަށް ފުލެޓް ލިބުމުގައި އުސޫލުން ބޭރުން ކަމެއް ހިނގާފައި ނެތް - ފުލުހުން
ރަޖްނީއަކީ ވަގަށް ގޯތި ދޫކުރި މައްސަލަ ތަހުގީގުކުރަމުންދާ އިސްފަރާތް
ފުލުހުންގެ ނޫސްވެރިންގެ ބައްދަލުވުން
އިކޮނޮމިކް ކްރައިމް ޑިޕާޓްމެންޓްގެ ހެޑް ރަޖުނީއަށް ފުލެޓް ލިބުމުގައި އުސޫލުން ބޭރުން ކަމެއް ހިނގާފައި ނެތް ކަމަށް ފުލުހުން ބުނެފިއެވެ.
ކޮރަޕްޝަންގެ ތެރެއިން ވިނަރެސް ފްލެޓު ގަތް ކަމަށް ސޯޝަލް މީޑިއާ ގައި ތުހުމަތު ކޮށްފައިވާ ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބުގެ މައްސަލަ ފުލުހުން ވަނީ ތަހުގީގުކޮށްފައެވެ. އަދި އޭނާ ރަސްމީ މަސައްކަތުން 31 ޑިސެމްބަރުގައި އެކަހެރިކުރިއެވެ.
އޭނާ މަސްއޫލިއްޔަތު ތަކުން އެކަހެރި ކުރީ އުސޫލުން ބޭރުން ވިނަރެސް ފްލެޓް ހޯދި ކަމަށް ތުހުމަތުވާ ގޮތައް ސޯޝަލް މީޑީއާ ގައި މައުލޫމާތު ދައުރުވާން ފެށުމާ ގުޅިގެންނެވެ.
މި މައްސަލައާއި ގުޅޭގޮތުން ފުލުހުން ބުނީ ދިވެހި ފުލުހުންގެ ޚިދުމަތުގެ ހެޑް އޮފް އިކޮނޮމިކް ކްރައިމްގެ މަގާމު އަދާކުރައްވަމުން ގެންދެވި ސުޕްރިންޓެންޑެންޓް އޮފް ޕޮލިސް ރަޖުނީ ޝުޢައިބަށް، ވިނަރެސް ހައުސިންގ މަޝްރޫއުން އުސޫލާ ހިލާފަށް ފްލެޓެއް ލިބިފައިވާ ކަމަށް ބުނެ އާންމު މީޑިއާގައި ފެތުރުނު މަޢުލޫމާތާ ގުޅިގެން، ސުޕްރިންޓެންޑެންޓް އޮފް ޕޮލިސް ރަޖުނީ ޝުޢައިބު، މަސްއޫލިއްޔަތު ތަކުން އެކަހެރިކޮށް، ފްލެޓެއް ލިބުމުގައި އެއްވެސް އުސޫލަކާ ހިލާފު އަމަލެއް ހިނގާފައިވޭތޯ ކަމާބެހޭ އިދާރާތަކުން ހިއްސާކޮށްފައިވާ މައުލޫމާތައް ދިރާސާކޮށް ބެލިބެލުމުން އެފަދަ ކަމެއް ފާހަގަކުރެވިފައި ނުވާ ކަމަށެވެ.
ވިނަރެސް ފްލެޓް ދިނުމުގައި ނުހައްގުން އެކި ފަރާތްތަކަށް ފްލެޓް ދީފައިވާ ކަމަށާއި، ބައެއް ފަރާތްތަކަށް ރިޝްވަތުގެ ގޮތުގައި ފައިސާ ނަގައިގެން ފްލެޓް ހަމަ ޖައްސާދީފައިވާ ކަމުގެ ވާހަކަތައް ވަނީ އާންމު ވެފައެވެ. ބައެއް ފަރާތްތަކުން ފޭކު ލިޔުން ހުށަހަޅައިގެން ފްލެޓް ހޯދި ކަމަށާއި އޭގެ ތެރޭގައި ފައިސާ ނުދައްކާ ފޭކް ސްލިޕް ހަދައިގެން ފްލެޓް ހޯދި ކަމަށްވެސް ވެއެވެ.
