ރައުދާގެ ކްރައިމް ސީން ވީޑިއޯ އާންމުކޮށްފި
ރައުދާ އުޅުނު ކޮޓަރީގެ ދޮރަށް އެއްވެސް ގެއްލުމެއް ލިބިފައިވާކަމުގެ ނިޝާނެއް ފެންނާކަށް ނެތް
މޮޑެލް ރައުދާ
މިދިޔަ މާޗް މަހުގެ 29 ވަނަ ދުވަހު ބަންގްލަދޭޝްގައި މަރުވި ރައުދާ އާތިފް މަރުވެފައި އޮތް ވީޑިއޯއެއް ބަންގްލަދޭޝްގެ ނިއުސް ސާވިސް 71 ބަންގްލަ ޓީވީން އާންމު ކޮށްފިއެވެ.
މި ވީޑިއޯ ބަންގްލަދޭޝްގެ ފުލުހުން އާންމުކޮށްފައި ވަނީ ރައުދާގެ މަރުގެ މައްސަލާގައި އެތަކެއް ސުވާލު އުފެދެމުންދާ ދަނޑިވަޅެއްގައެވެ.
ބަންގްލާ ޓީވީން ވަނީ ޔޫޓިއުބްގައި ވެސް އެ ވީޑިއޯ އާންމުކޮށްފައެވެ. އެ ވީޑިއޯ އިން ފެންނަނީ ބަންގްލަދޭޝްގެ ކްރައިމް ސީން ޔުނިޓްގެ ފުލުހުން ރައުދާ އުޅޭ ކޮޓަރިއަށް ދޮރުހުޅުވާފައި ވަންނަ ތަނެވެ. ރައުދާ މަރުވެފައި ހުއްޓާ ފެނިގެން އެކުވެރިން އެ ކޮޓަރިއަށް ވަނީ ދޮރު ހަލާކުކޮށްލައިގެން ކަމަށް ބުނި ނަމަވެސް ވީޑިއޯ އިން ފެންނަ ގޮތުން އެއްވެސް ގެއްލުމެއް ދޮރަށް ލިބިފައެއް ނުވެއެވެ.
ކޮޓަރީގެ ދޮރުގެ އެތެރެއިންނާއި ބޭރުން ގަދަކަމުން ވަދެފައި ހުރިކަމުގެ އެއްވެސް ނިޝާނެއް ފެންނަން ނެތް ކަމަށް ރައުދާގެ ބައްޕަ ވެސް ވަނީ ބުނެފައި ވެއެވެ.
ކޮޓަރިއަށް ވަންނަތަނުން ފެންނަނީ މަރުވެފައި އޮތް ރައުދާ އެނދުމަތީގައި ބާއްވާފައި އޮއްވައެވެ. އަދި ގޮނޑި ކައިރީގައި ބާލީހެއް ބާއްވާފައި އޮވެއެވެ. ކޮޓަރީގެ ފަންކާގައި ރައުދާ ދަންޖެހުނު ކަމަށް ބުނާ ސްކާފެއް އައްސާފައި ހުއްޓެވެ. އަދި އެނދުކައިރީގައި ފެން ހޫނުކުރާ އެއްޗަކާއި ފެން ފުޅިއެއް އެނދުކައިރީގައި ހުއްޓެވެ. ބަންގްލަދޭޝްގެ ފުލުހުން އާންމު ކޮށްފައިވާ ވީޑިއޯގައި ރައުދާގެ ހަށިގަނޑު އެހާ ކައިރިން ދައްކާފައެއް ނުވެއެވެ. އެ ވީޑިއޯއިން ދައްކާފައިވަނީ ރައުދާގެ ދެފައި އަދި އަތެވެ. މަރުވެފައި އޮތް ހަށިގަނޑު އެނދުމަތީގައި ބާއްވާފައި އޮތް މަންޒަރު ދައްކާފައި ވަނީ ސާފުނުވާ ގޮތަށް ދުރުންނެވެ.
ރައުދާ މަރުވީ ދަންޖެހިގެން ކަމަށް އޮޓޮޕްސީ ރިޕޯޓުގައި ބަންގްލަދޭޝްގެ ފުލުހުން ވަނީ ބުނެފައެވެ. އެހެން ނަމަވެސް ރައުދާގެ ބައްޕަ ޑރ. އާތިފް ވިދާޅުވެފައި ވަނީ ރައުދާ މަރުވީ ދަންޖެހިގެން ކަމަށް އާއިލާ އިން ގަބޫލުނުކުރާ ކަމަށެވެ. އެކަމުގައި ފޮރުވިފައިވާ އެތައް ކަމެއް އެބަ ހުރި ކަމަށް ގަބޫލުކުރައްވާ ކަމަށް އާތިފް ވަނީ ރާއްޖެ އެމްވީއަށް ވިދާޅުވެފައެވެ.
ރައުދާގެ ބައްޕަ ޑރ. އާތިފް ވިދާޅުވެފައި ވަނީ ޝޯލްއެއް ބޭނުން ކޮށްގެން ދަންޖެހުމުން ހުންނަ ނިޝާނާއި ރައުދާ ކަރުގައި ހުރި ނިޝާނާއި ތަފާތު ކަމަށާއި ދަންޖެހިގެން މަރުވާ މީހުންގެ އަނގައިން ސޮނި ބޭރުވެފައި ހުންނާނެ ކަމަށެވެ. އެެހެން ނަމަވެސް ރައުދާގެ ހަށިގަނޑުން އެކަހަލަ އެއްވެސް ނިޝާނެއް ފެންނަން ނެތް ކަމަށެވެ.
ފުލުހުން ރައުދާގެ ކޮޓަރީގައި ހަރަކާތްތެރި ވަމުން ދިޔައިރު އާންމުންގެ ބަޔަކު ވެސް ހަރަކާތްތެރިވަމުން ދިޔައެވެ. އާންމުކޮށް ކްރައިމް ސީނަކަށް އާންމުންނަށް ވަދެވޭނީ ފުލުހުން ހުއްދަ ދިނުމުންނެވެ. އަދި ހަމަ އެހެންމެ ކްރައިމް ސީންއެއްގައި އާންމުންނަށް ތިބެވުމަކީ ތަހުގީގަށް ގެއްލުން ވެދާނެކަމެކެވެ.
އަނެއްކޮޅުން އޮޓޮޕްސީ ހެދި ޓީމުގައި ރައުދާ އުޅުނު ކޮލެޖުގެ މުވައްޒަފަކު ހިމެނޭތީ ރާޖްޝާހީ މެޑިކަލް ކޮލެޖުގެ ފިޒިޝަނަކު ވެސް ވަނީ އެކަމާ ސުވާލު އުފައްދަވާފަ އެވެ.
ކޮންމެ އަކަސް ރައުދާގެ މަރަށް ޖަވާބު ނުލިބޭ އެތަށް ސުވާލުތަކެއް އެބަހުއްޓެވެ. ދިވެހި ފުލުހުންގެ ޓީމުން ވަނީ ރައުދާގެ މަރުގެ ތަހުގީގުގައި ބަންގްލަދޭޝްގައި ހަރަކާތްތެރިވަމުންނެވެ.
