މުއިއްޒުގެ މަތިއޮމާން "ކުރީ ސަރުކާރުގެ ބަޖެޓް"
ރައީސް މުއިއްޒުގެ ސަރުކާރުން ރައްޔިތުންނަށް ކަމެއް ކޮށް ނުދިނީމާ ރައްޔިތުން ދައްކާ ވާހަކަތަކުގެ މަތިޖަހާން ސަރުކާރުން ގެންގުޅުއްވާ އަތްމަތީ ބަހަކީ ކުރީ ސަރުކާރެވެ.
ރައީސް ގުޅީގެ ރައްޔިތުންނާއި މުޚާތަބުކުރައްވާ ވާހަކަދެއްކެވުން
މީލާދީ އާއަހަރު ފަށަމުންވެސް ރައީސް މުއިއްޒު ދެއްވީ ވަރަށް ބަލާޣާތްތެރި އެހާމެ ކާފިޔާ ހަމަ ފިލިކޯޅިތައް ހަމަކުރަމުން ދެއްވި އަސަރުގަދަ ބަސްމޮށުންތެރިކަމުގައި އަރާހުރި ޚިތޯބެކެވެ. ހީވީ ދެން މި ނިމުނީހެންނެވެ. ދިވެހިންނަށް ފާގަތިކަން އައިސް އޮހިގަތީ ހެންނެވެ. ކުރީގެ ހާސަރުތައް ނިންމާލައި ގައުމައިގެން މެކުހަށް ޖައްސަވަނީ ކަމެވެ.
އެކަމަކު އޭގެ ހަފްތާއެއް ނުވެއެވެ. އަނެއްކާވެސް އެއްކަލަ ރައިވަރުފޮތް ނަންގަވައިފިއެވެ. އޭރު ވިދާޅުވަމުންދިޔަ ގޮވެލިފަތި އިހުހިރި ގޮތައް ދެފަށްކުރާން ފަށްޓަވައިފިއެވެ. ހަމަ ރަނގަޅަށްވެސް ކުރީސަރުކާރުން ނުނެއްޓި އޮތް އޮތުން އަދިވެސް ދޫކޮށް ނުލެއްވޭކަން ރައްޔިތުންނަށް ތިލަކޮށްދެއްވައިފިއެވެ. ވެރިކަމުގެ އާރާއި ބާރާ، މުށުތެރެއަށް ޖަމާވެފައި އޮތް މަޖިލީހުގެ ސުޕަރ މެޖޯރިޓީއާއެކު ހައްދަވައިގެން ކަމެއް ނުކުރެވި ފަނުފުލުން ދުއްވާލި އަހަރާ ގުޅޭގޮތުން ސަލާމަތުގެ އަމާޒުފަތްގަނޑަކަށް ބޭނުންކުރާ އެއްކަލަ "ކުރީ ސަރުކާރުގެ ބަޖެޓް" ބޭނުންކުރައްވަން ފަށްޓަވައިފިއެވެ.
ރައީސް މުއިއްޒުގެ ސަރުކާރުން ރައްޔިތުންނަށް ކަމެއް ކޮށް ނުދިނީމާ ރައްޔިތުން ދައްކާ ވާހަކަތަކުގެ މަތިޖަހާން ސަރުކާރުން ގެންގުޅުއްވާ އަތްމަތީ ބަހަކީ ކުރީ ސަރުކާރެވެ. ކުރިން ކަށްކޮށްފައި އޮތް ގޮތެވެ. ޚާއްޞަކޮށް ވިދާޅުވާ ބޮޑު ބަހަނާއަކީ ކުރީ ސަރުކާރުން ދިން ބަޖެޓެވެ.
ބަލަ ރައީސް މުއިއްޒޫއެވެ. ތިޔަ ލަވަ މިހާރު ބޮޑުތަނުން ބާވެއްޖެއެވެ. ކުޑަކުއްޖަކު ނިންދަވާލަން އުނދޯއްޔަށް އަރާ މަންމައަކުވެސް މިހާރު ތިޔަ ފަރިއްސެއް ނުކިޔާނެއެވެ. ތިޔައީ ބޮޑުތަނުން ބާވެ، ތީގެ ހަގީގަތް އެންމެނަށް އެނގި ދެންވާ ކިޔާން ހެޔޮނުވާވަރުގެ "ބެރެކި ރައިވަރަކަށް" ތިޔައެއްޗެއް ތިޔަވަނީ ވެފައެވެ.
ރައީސް މުއިއްޒޫއެވެ. މިބުނާ އެއްޗެއް މަނިކުފާނަށްވެސް ވަރަށް ސާފުވެ ލައްވާނެއެވެ. އަދި އަހަރެްނ ބުނީތީ މާބޮޑު އެއްޗަކަށް ނުހަދާ ދޫކޮށްލެއްވިއަސް ގާތުގައިތިޔަ ތިބި ޚަލީލުމެން ކުރެން އައްސަވާލިއަސް އަލިފުން ޔާއަށް ތަފްސީލް ކޮށްދެއްވާނެއެވެ.
ރައީސް މުއިއްޒޫއެވެ. ވެރިކަމަށް އަންނާންވެގެން ދެއްކި ވާހަކައިން އަެކިނިވެސް ތިޔަ ހާސަރުތަކުގެ މުއާލާ ކެނޑިއްޖެއެވެ. އޭރު ވިދާޅުވީ ހާލަތު އެނގިވަޑައިގަންނަވާކަމަށެވެ. ފައިސާ ހޯދާނެ ގޮތްތަތަކާއި ހިސާބު ކިތާބުހުރީ ޖެހިފައިކަމަށެވެ. ޕްލޭންތައް ނިމި ފައިސާ ދޭނެ ފަރާތްތައް ހޯދި ފައިސާ ހުރީ އަމިއްލަ ފައިކޭޓާ ހިސާބުގައި ކަމަށެވެ. ރައްޔިތުންނަށް ކަންކޮށްލާން ބޭނުމީ ވެރިކަން އެކަނިކަމަށެވެ.
އެއަވައިގައި ޖެހި މަނިކުފާނު ވެރިކަމަށްލިއެވެ. ދެން އައީ މަނިކުފާނު ވެރިކަމާ ހަވާލުވާން އެއައި އިންތިގާލީ ދުވަސްވަރެވެ. ނިމިދިޔަ ސަރުކާރުން ފާސްކުރި ބަޖެޓް ހެދީ މަނިކުފާނު ބޭނުންވިގޮތައް ބުނިއްޔާ ބުނިކަމެއް ހިމަނައިގެން ސީދާ މަނިކުފާނު ދެއްވި ފޯމެޓަށް އެތައްގަނޑަށެވެ. އޭގައި ނުހިމެނީ މަނިކުފާނު ބަޖެޓުން އެންމެ ލޯލާރިއެއްގައި ވައިވެސްނޭޅީ ނިންމާލާނެކަމަށް ވިދާޅުވެ އުނަގަނޑުގައި ބަންނަވައިގެން ތިޔަ އުޅުއްވާ" ރަސްމާލެ" ޕްރޮޖެކްޓް އެކަންޏެވެ. ދެން މަނިކުފާނު އެދުނިއްޔާ އެދުނު ކަމަކަށް ފައިސާ އެބަޖެޓުގައި ހިމެނިއެވެ. މިއީ އެންމެ ކުޑަކުދިންވެސް ދަންނަ ހަގީގަތެކެވެ.
ރައީސް މުއިއްޒޫއެވެ. ތިޔަ ވިދާޅުވާ ވާހަކަ ގަބޫލު ނުކުރާނެ އެހެން ކަމެއްވެސް މަ އަޅެ ބުނެލަ ދެން ހެއްޔެވެ. އެއޮށްބޮޑު ބަޖެޓް ތިޔަ ވަނީ ހުސްކޮށްލާފައެވެ. އަދި އެވަރުން ނުވެގެން ސަޕްލިމެންޓްރީ ބަޖެޓެއްވެސް ފާސްކޮށްފައި ދިނީތީ އެވެސް އެއްކޮށް ހުސްކޮށްލީއެވެ. ގައިމު އެފައިސާ ދިނީ ކަންކަމެއް މަތިކޮށް މަޝްރޫއުތަކެއް ހިންގަން ލިޔެފައެވެ. އެކަމަކު ބަޖެޓް ހުސްވިއިރު އެއިން ކަމެއް ނުފެނުނީމާ ދެން ތިޔަ ވިދާޅުވާ ލަވައެއްގެ މާނަ އަރައިރުމެއް ނުވޭ ހެއްޔެވެ. ހަމައެކަނި އައްޔަންކުރި ސިޔާސީ މުވައްޒަފުން ހޭހަންކޮށްދީފައި، މުލިއާގެ ގަނޑުވަރެއްހެން ހަދާފައި ދެއިރު ދެދަޅައަށް ދަތުރުކޮށް ބަޖެޓް ހުސްކޮށްލީމާ ތިޔަ ވިދާޅުވާ ވާހަކަތައް ދެކޮޅެއް ނުޖެހެއެވެ.
ރައީސް މުއިއްޒޫއެވެ. އަދި އެއްވާހަކަ ބުނެލަން ހެއްޔެވެ. ވެރިކަމަށްފަހު ދެން އެދުނީ މަޖިލިސް ނަގައިދޭށޭވެ. އޭރުން ހުރިހާކަމެއް ނިމުނިއްޔޭ އޭރު ވިދާޅެއް ނުވަމުހެއްޔެވެ.ރައްޔިތުން އަނެއްކާ އެކޮސްވެސް ހެދީއެވެ. ބޮޑުތަނުން އެމަޖިލިސްވެސް ހިތަކަށް ދިނީއެވެ. މަގޭ ޕޮއިންޓަކީ އަދި އެއެއްވެސް ނޫނެވެ. އެމަޖިލީސް ބޭނުންކޮށްގެން މަނިކުފާނު ކޮށާނެ ގޮތަކަށް ކޮށާން މަށާނެ ގޮތަކަށް މަށާން ގައުމުތިވަނީ އުނގުތެރެއަށް ލެވިފައެވެ. ކަންކުރަނީވެސް އެގޮތަށެވެ. ދެން ތިޔަ ވިދާޅުވާގޮތައް ކަންކަން ނުވީ ކުރީ ސަރުކާރުގެ ބަޖެޓުގެ ސަބަބުންނޭ ވިދާޅުވީމާ އަންނަނީކީ އަމަށަކު ހިންޏެއް ނޫނެވެ. ހަމަޔަގީނުންވެސް އަނބިކަނބަލުންނާއި ގާތުއި ތިޔަ ތިބި ކުދިންވެސް ހީހީ ބަނޑުގައި ގޮށްލާނެވެ.
ކޮންމެއަކަސް ރައްޔިތުންނަށް ކަމެއް ކޮށްދޭންވީމާ ނުވަތަ ކަމެއް ނުވީމާ އޭގެ މަތި އޮމާންކުރާން ދައްކާ ބަހަނާއަކަށް ކުރީ ސަރުކާރާއި އެސަރުކާރުގެ "ބަޖެޓް" އެ ބުނެގެން މިހާރު ފުއްދާލެވޭކަން ނެތެވެ. ޅަފަޅޮލޭ، ވައި ނުސާފުވީއޭ، އޮއިވަރު ބާރޭ، ކަނޑުގަދަވެ މަސްނުބޭނުނިއްޔޭ ބުނެ ތިޔަ ގޮވާ ހާސަރުތައް މިހާރު ދެނެއް ނުވިކޭނެއެވެ.
