ފަޒުލްގެ ގެއިން ގިނަ އަދަދެއްގެ ފައިސާ ފެނިފައިވާކަން ހާމަވެފައި ވަނިކޮށް، ލޯންޗެއް ބަންނަން 1.4 މިލިއަން ރުފިޔާ ލިބުނު ކަމަށް އޭނާ ބުނެފި

ޚިޔާނާތުގެ ތުހުމަތު ކުރެވިފައިވާ، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ގެއިން ގިނަ އަދަދެއްގެ ފައިސާ ފެނިފައިވާކަން ހާމަވެފައި ވަނިކޮށް، ލޯންޗެއް ބަންނަން 1.4 މިލިއަން ލިބުނު ކަމަށް އޭނާ ބުނެފިއެވެ.

ފަޒުލްގެ ގެއިން މިލިއަނަކަށް ވުރެ ގިނަ ފައިސާ ފުލުހުން ހޯދާފައިވާކަން ބުނެ މީޑިއާ އާއި މީސްމީޑިއާގައި ރިޕޯޓް ކުރަން ފަށާފައިވަނީ އާދިއްތަ ދުވަހުއެވެ. އެކަން ކަށަވަރުކުރުމަށް ފުލުހުންނަށް ރާއްޖެއެމްވީން ތަކުރާރުކޮށް ގުޅި ނަމަވެސް ފުލުހުންގެ މީޑިއާއިން ފޯނަށް ޖަވާބުދެއްވާފައެއް ނުވެއެވެ.

އެއާއި އެކު ރާއްޖޭގައި ފެރީގެ ޚިދުމަތް ދެމުން އަންނަ "ރިލެކްސް ފެރީ ސަރވިސް" އިން ވަނީ ފަޒުލްގެ ގެއިން ފެނުނު ފައިސާ އަކީ އެ ފެރީ ސަރވިސް އިން ދިން ފައިސާ ކަމަށް ދޭހަވާ މޭރުމަކުން ބަޔާނެއް ނެރެފައެވެ.

ރިލެކްސް ފެރީ އިން ބުނެފައި ވަނީ 2022 ވަނަ އަހަރު ފަޒުލްގެ ކުންފުންޏަކާއި އެކު މުއާމަލާތުކޮށް، ލޯންޗެއް ބަނދެފައިވާ ކަމަށެވެ. އަދި ފަޒުލްގެ ކުންފުނިން ބަން ލޯންޗްގެ ފެންވަރު ރަނގަޅުކަމުން ދެވަނަ ފަހަރަށް އިތުރު ލޯންޗެއް ބަންނަން ހަވާލުކޮށްފައިވާނެ ކަމަށް ވެސް ރިލެކްސް ފެރީ އިން ވަނީ ބުނެފައެވެ. މީގެ އިތުރުން ލޯންޗް ބަންނަން ހަވާލުކުރި ފައިސާ އަކީ 2024 ވަނަ އަހަރުގެ ކުރީކޮޅު ކުރި މަޝްވަރާ އާއި އެއްގޮތަށް ޑިސެމްބަރު މަހުގެ ކުރީކޮޅު ފަޒުލް އާއި ހަވާލުކުރި ފައިސާ ކަމަށާއި އެ ފައިސާ ހަވާލުކުރީ ނަގުދު ފައިސާ އިން ކަމަށް ވެސް ރިލެކްސް ފެރީ އިން ވަނީ ފާހަގަކޮށްފައެވެ.

އެހެންނަމަވެސް ލޯންޗް ބަނުމަށް ހަވާލުކުރީ ފަޒުލްގެ ކޮން ކުންފުންޏަކާއި ކަން ރިލެކްސް ފެރީ އިން ހާމަކޮށްފައެއް ނުވެއެވެ. އަދި މިހާ ގިނަ އަދަދެއްގެ ފައިސާ ނަގުދު ފައިސާއިން މުއާމަލާތު ކުރީ ފަޒުލް އެދިގެންތޯ ނުވަތަ ނޫންތޯ އަދި އެ މުއާމަލާތު އެގޮތަށް ކުރި ސަބަބު ރިލެކްސް ފެރީގެ ފަރާތުން ވެސް އަދި ފަޒުލް ވެސް ސާފުކޮށެއް ނުދެއްވައެވެ.

ފަޒުލް ވަނީ ރިލެކްސް ފެރީގެ މި ބަޔާން އޭނާގެ މީސްމީޑިއާގައި ހިއްސާކުރައްވާފައެވެ. އެހެންކަމުން ފަޒުލްގެ ގެއިން ފެނުނު ފައިސާ އަކީ މި ފައިސާކަމަށް ދެއްކުމަށް މަސައްކަތްކޮށްފައިވާ ކަމަށް ފާޑުކިޔާ ބައެއް މީހުން ދަނީ ބުނަމުންނެވެ. އަދި މި ފައިސާގެ ހަގީގަތް ހޯދާ ތަހުގީގުކުރަން ޖެހޭ ކަމަށް ވެސް އާއްމުން ދަނީ ބުނަމުންނެވެ.

މިކަމާއި ގުޅޭ އިތުރު މައުލޫމާތު ހޯދުމަށް ރާއްޖެއެމްވީން ފަޒުލް އަށް ގުޅި ނަމަވެސް ފޯނަށް ޖަވާބުދެއްވާފައެއް ނުވެއެވެ.

ޑިސެމްބަރު މަހުގެ ފަހުކޮޅު ފުލުހުން ވަނީ ބިންވެރިޔާ ސްކީމުގެ ދަށުން ވަގަށް ގޯތިތަކެއް ދޫކުރި މައްސަލައިގައި ޚިޔާނާތްތެރިވެފައިވާ ތުހުމަތުކުރެވޭ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ދިރިއުޅޭ، މ. ޒޭވަރު ބަލައިފާސްކޮށްފަ އެވެ.

"ރާއްޖެއެމްވީ" އަށް މައުލޫމާތުދެމުން ފުލުހުންގެ މީޑިއާ އޮފިޝަލް ވިދާޅުވީ ފަޒުލް ދިރިއުޅޭ، މ. ޒޭވަރުގެ ބަލައި ފާސްކުރުމުގެ ތެރޭގައި ބައެއް އިލެކްޓްރޯނިކް އައިޓަމްތައް ފުލުހުންގެ ބެލުމުގެ ދަށަށް ގެންގޮސްފައިވާކަމަށެވެ. އެހެންނަމަވެސް އެއީ ކޮން ބާވަތެއްގެ އިލެކްޓްރޯނިކް ސާމާނެއްކަމެއް ފުލުހުން ހާމައެއް ނުކުރެއެވެ.

ވަގަށް ގޯތިތައް ދޫކުރި މައްސަލައިގައި އެންމެ ބޮޑު ތުހުމަތެއް ކުރެވެނީ އެޗްޑީސީގެ ކުރީގެ އެމްޑީ ފަޒުލްއަށެވެ. މި މައްސަލައިގައި ހިމެނޭ ގޯތިތަކުގެ ތެރެއިން އެއް ގޯތީގެ ވަގު ލިޔެކިޔުންތަކެއް ހުށަހެޅި ކަމަށް ތުހުމަތުކުރެވެނީ އޭނާގެ ބޭބެ އަދި މިހާރު ސަސްޕެންޝަނުގައި ހުރި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދަށެވެ.

މި ތުހުމަތުތައް މިހެން ހުރި ނަމަވެސް، މި މައްސަލަ ފެންމަތިވުމާ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވަނީ މި ތުހުމަތުތައް ދޮގު ކުރައްވާފައިއެވެ. އެ ދުވަހު ނޫސްވެރިންނަށް މައުލޫމާތު ދެއްވަމުން ފަޒުލް ވިދާޅުވީ މި މައްސަލައިގެ ތެރޭގައި ބޭބެ ހިމެނުމަކީ އިއްތިފާގެއް ކަމަށާއި އެޗްޑީސީން އެއްވެސް ލިޔުމެއް ދޫކޮށްފައި ނުވާ ކަމަށެވެ. އަދި މައްސަލަ ޖެހުނު ގޯތީގައި ވަށާފާރު ރޭނުމުގެ ހުއްދަ ވެސް ދޫކޮށްފައި ނުވާ ކަމަށް އޭނާ ވިދާޅުވި އެވެ. ވަށާފާރު ރޭނުމުގެ ހުއްދަ ނުދޭ ކަމަށް ބުނި ނަމަވެސް މި ބުނާ ގޯތީގައި ވަށާފާރު ހުރީ ރާނާފަ އެވެ. ވަށާފާރު ރޭނި ކަމަށް ތުހުމަތުކުރެވެނީ ފަޒުލްގެ ބޭބެ، ފަޒީލަށެވެ.

ގޯތިތަކުގެ މައްސަލައިގެ އިތުރުން އެޗްޑީސީގައި ހުންނަވާ، މަގާމުގެ ބޭނުންކޮށްގެން ވިޔަފާރިވެރިންގެ އަތުން ފައިސާ ނަގައިގެން އަމިއްލަ ފައިދާއަށް މަސައްކަތް ކުރުމުގެ ތުހުމަތު ވެސް ފަޒުލްގެ މައްޗަށް ވަނީ ކުރެވިފައެވެ. އެގޮތުން މި ހިޔާނާތުގެ އަމަލުތައް ފާހަގަކޮށް، އެޗްޑީސީގެ ކުރީގެ ޗެއާޕާސަން އަހުމަދު ޒުހޫރު ވަނީ ރައީސް ޑރ. މުހައްމަދު މުއިއްޒުއަށް މީގެ ފަސް މަސް ކުރިން ސިޓީއެއް ފޮނުއްވާފަ އެވެ. ނަމަވެސް ޒުހޫރު ފޮނުވި އެ ސިޓީ ލިވަޑައިނުގަންނަވާކަމަށް ރައީސް މުއިއްޒު ވަނީ ވިދާޅުވެފައެވެ.