ބޯކޮށް ވާރޭވެހުމާއި އެކު އުދައަރައި 6 ރަށެއްގައި ފެންބޮޑުވެއްޖެ

ބޯކޮށް ވާރޭވެހި، އުދައެރުމުގެ ސަބަބުން މިހާތަނަށް ހަ ރަށެއްގައި ފެންބޮޑުވެފައިވާ ކަމުގެ ރިޕޯޓު ލިބިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

އެންޑީއެމްއޭއިން ހުކުރު ދުވަހު "އެކްސް" ގައި ކުރި ޕޯސްޓެއްގައި ބުނީ ބޯކޮށް ވާރޭވެހުމާއި އުދައެރުމުގެ ސަބަބުން މިހާތަނަށް 6 ރަށެއްގައި ފެންބޮޑުވެފައިވާ ކަމުގެ ރިޕޯޓު ލިބިފައިވާ ކަަމަށެވެ.

އެންޑީއެމްއޭ ގެ ރިޕޯޓުގައި ވާގޮތުން އުދައަރައިގެން ރިޕޯޓުކޮށްފައި ވަނީ ށ. ނަރުދޫ އަދި ރ. އިނގުރައިދޫން ކަމަށާއި ވާރޭވެހި ފެންބޮޑުވެގެން ދ. ކުޑަހުވަދޫ އާއި އެ އަތޮޅު މީދޫ އަދި ފ. ނިލަންދޫ އާއި އެ އަތޮޅު މަގޫދޫން ކަމަށެވެ.

ބައެއް ރަށްރަށުގައި ފެން ހިންދުމުގެ މަސައްކަތުގައި ސިފައިން ހަރަކާތްތެރިވަމުން އަންނަ ކަމަށް ވެސް އެންޑީއެމްއޭ އިން ބުނެއެވެ.

ނަރުދޫއަށް އުދައަރައި ރަށު ތެރޭގައި ފެންބޮޑުވެފައިވާތީ އެހީތެރިކަން ފޯރުކޮށްދިނުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ނޮދަން އޭރިއާ ކޮމާންޑްގެ ޓީމެއް މިއަދު ހެނދުނު އެ ރަށަށް ގޮސްފައިވާކަމަށް ވަނީ ރިޕޯޓުކޮށްފައެވެ.

އަދި ނިލަންދޫ އާއި ކުޑަހުވަދޫއަށް ބޯކޮށް ވާރޭވެހި މަގުތަކުގައި ފެންބޮޑުވުމާ ގުޅިގެން ފެން ހިންދުމުގެ މަސައްކަތުގައި އެހީތެރިވާން އެމްއެންޑީއެފް ސެންޓްރަލް އޭރިއާ ކޮމާންޑުން ދަނީ ހަރަކާތްތެރިވަމުންނެވެ.

އޭގެ އިތުރުން މާމިގިއްޔަށް ބޯކޮށް ވާރޭވެހި ބައެއް ގޭގޭގައި ފެންބޮޑުވެގެން، އެހީތެރިކަން ފޯރުކޮށްދިނުމުގައި އެމްއެންޑީއެފް މާލެ އޭރިއާ ކޮމާންޑާއި އދ. މާމިގިލި ފަޔަރ ސްޓޭޝަނުގެ ސިފައިން އަންނަނީ ހަރަކާތްތެރިވަމުންނެވެ.

އެންޑީއެމްއޭއިން ބުނި ގޮތުގައި ރަށްތަކުގައި ފެންބޮޑުވި ހާދިސާތަކުގައި ބޯހިޔާވަހިކަން ގެއްލި، އިންސާނީ އެހީތެރިކަން ފޯރުކޮށްދޭން ޖެހިފައި ނުވާ ކަަމުގަ އެވެ.