ރައީސުލްޖުމްހޫރިއްޔާ އެ ހުންނެވީ ރައްޔިތުންނަށް ހިޔާނާތްތެރިވެގެން: އިޙުސާން
3 ޖެނުއަރީ 2025 | ހުކުރު 08:16
އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެ ހުންނެވީ ރައްޔިތުންނަށް ހިޔާނާތްތެރި ވެގެން ކަމަށް ނިމިދިޔަ އެމްޑީޕީ ސަރުކާރުގެ ޑެޕިއުޓީ މިިނިސްޓަރ އަދި އެމްޑީޕީގެ ގައުމީ މަޖިލިސް މެމްބަރު މުޙައްމަދު އިހުސާން ވިދާޅުވެއްޖެއެވެ.
މި ސަރުކާރުގެ ހިޔާނާތުގެ ބޮޑެތި މައްސަލަތަކާއި އަދި އެ މައްސަލަތައް ހިނގާދިޔައީ ރައީސުލްޖުމްހޫރިއްޔާއަށް އެނގިވަޑައިނުގެން ކަމަށް ބުނާބުނުމަށް ރައްދުދެއްވާ ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި ވާހަދައްކަވަމުން އިހުސާން ވިދާޅުވީ ރައީސުލްޖުމްހޫރިއްޔާއަކީ ދިވެހި ރައްޔިތުން ވަރަށް ބޮޑު އުންމިދުތަކަކާއި އެކު ހޮއްވަވާދެއްވާ، އަދި ގައުމުގެ މަޝްޢޫލިއްޔަތުތައް ހަވާލުކޮށްފައިވާ ބޭފުޅެއް ކަމަށާއި، އެ ބޭފުޅާއަށް މުސާރަވެސް ދެއްވަނީ ރައްޔިތުން އަތުން ޓެކްސް ނަގައިގެންނާއި އެހެނިހެން ގޮތްގޮތުން ހޯދާ ފައިސާއިން ކަމަށެވެ. އެހެންކަމުން ގައުމުގެ ރައްޔިތުން ހަވާލުކުރައްވާފައިވާ މަޝްޢޫލިއްޔަތުތަކާއި ޒިންމާތައް އަދާ ނުކުރެވުމަކީ އެއީ ރައްޔިތުންނަށް ހިޔާނާތްތެރިވުން ކަމަށް އިހުސާން ވިދާޅުވިއެވެ.
އިޙުސާން ވިދާޅުވީ ގައުމުގެ ވެރިޔަކަށް ހުންނަ ރައީސުލްޖުމްހޫރިއްޔާ އަށް އެނގިވަޑައިނުގަންނަވާ ގޮތަކަށް ރައީސް އޮފީސްތެރޭގައި ވެސް އަދި ސަރުކާރުގެ އެހެން މުއައްސަސާއެއްގައި ވެސް ކަންކަން ނުހިނގާނެކަމަށާއި އެހެން ކަމުން ގައުމުގައި މި ހިގާ ބޮޑެތި ވައްކަންތައް ވެސް ވަރަށް ރަނގަޅަށް އެނގިވަޑައިގެންނަވާނޭ ކަމަށެވެ.
އެޗްޑީސީ ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ ގުޅޭ ގިނަ މައްސަލަތަކެއް ފާހަގަކޮށް އެ ކުންފުނީގެ ކުރީގެ ޗެއާމަން އަހުމަދު ޒުހޫރު ފޮނުއްވި ސިޓީ ނުލިބޭ ކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. އެކަމަށް ރައްދު ދެއްވާ އިހުސާން ވިދާޅުވީ ރައީސުލްޖުމްހޫރިއްޔާގެ އޮފީހަކީ ވަރަށް ގިނަ ބޮޑެތި ޚަރަދުތަކެއް ކޮށްގެން، އެކި ކަންކަމަށް މީހުން އައްޔަންކޮށްފައި ތިބޭ ތަނެއްކަމަށާއި އެގޮތުން ރައީސް އޮފީހުގައި ހިނގާ ކަންކަމުގެ ފުރިހަމަ މައުލޫމާތު ފޯރުކޮށްދިނުމަށް ޓަކައި އެކިވަރުން މީހުންލާފަ އެބަތިބޭ ކަމަށެވެ. އެހެން ކަމުން ރައީސަށް އެއްވެސް ކަމެއް އެނގިވަޑައި ނުގަންނަވާ ކަމަށް ވިދާޅުވުމުން ގަބޫލުނުކުރެވޭނޭ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ ރައީސް އޮހީހަށް ސިޓީއެއް ފޮނުވައިފި ނަމަ އެ ސިޓީއެއް އެއްތަނުން އަނެއްތަނަށް ގެންދާނޭ ބޮޑެތި މުސާރާ ދީފައި މުވައްޒަފުން ހަމަޖައްސާފައި އެބަ ތިބިކަމަށާއި އެހެންކަމުން ރައްޔިތުންގެ ކަންބޮޑުވުންތައް ހާމަކޮށް ފޮނުވާ ސިޓީއެއް ރައީސާއި ހަމައަށް ނުގޮސް ނޯންނާނޭ ކަމަށެވެ. އަދި ސިޓީ ނުލިބެ އޭ ވިދާޅުވާނެ ޖާގައެއް ވެސް ރައީސަށް ނޯންނާނޭ ކަމަށް އޭނާ ވިދާޅުވިއެވެ.
އިހުސާން އިތުރަށް ވިދާޅުވީ ރައީސް ޑރ. މުހައްމަދު މުއިއްޒަކީ ރާއްޖޭ އެންމެހާ ރައްޔިތުންގެ ކަންކަން ވަރަށް ރަނގަޅަށް ބަލަހައްޓާނޭ ކަމަށް ވިދާޅުވެ، އެތައް ހުވަޔަކާއި ވައުދެއް ވެވަޑައިގެން ހުންނެވި ބޭފުޅެއް ކަމަށެވެ. އަދި ރައްޔިތުންގެ އެކަންކަން އެންމެ ޒިންމާދާރުކަމާއި އެކު ބަލަހައްޓާނެ ކަމުގެ ވައުދާއި އެކު، މާތް ﷲ ގަންދީ ހުވާކުރައްވައިގެން ވެރިކަމަށް ވަޑައިގެން ހުންނެވި ބެފޫޅެއް ކަމަށް ވެސް އޭނާ ވިދާޅުވިއެވެ.
އިހުސާން އިތުރަށް ވިދާޅުވި ހަމަ އެއްގޮތަކަށް ވެސް ތިމަންނައަށް ނޭގެއޭ ވިދާޅުވެ، ނިންމާލައިގެން، ރެކިވަޑައިގަނެގެން ނުހުންނެވޭނޭ ކަމަށާއި އެއީ އެއްގޮތަކަށް ވެސް ގަބޫލު ކުރެވޭނޭ ކަމެއް ނޫން ކަމަށް އިހުސާން ވިދާޅުވިއެެވެ.
