އެޗްޑީސީން ބްލޫސް ވެސް ބަލިކޮށްފި

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ބްލޫސް ފޯ ވޮލީބޯލްއާ ދެކޮޅަށް ކުޅުނު މެޗުން ވެސް، އެޗްޑީސީ ކުލަބު މޮޅުވެއްޖެ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ކުޅުނު މެޗު އެޗްޑީސީން ކާމިޔާބު ކުރީ ސީދާ ތިން ސެޓުންނެވެ. އެ މެޗާ ކުރިމަތިލީއިރު، ލީގުގައި ކުރިން ޕޮލިސް ކުލަބު އަދި ސްޕޯޓްސް ކުލަބު ސިޓީއާ ދެކޮޅަށް ކުޅުނު މެޗުން ވެސް އެޗްޑީސީ ވަނީ މޮޅުވެފަ އެވެ. ބްލޫސް ވަނީ ޕޮލިސް ކުލަބު އަތުން މޮޅުވެފަ އެވެ. އަނެއް ދެ މެޗުން އެ ޓީމު ވަނީ ބަލިވެފަ އެވެ. އެޗްޑީސީއާ ދެކޮޅަށް ކުޅުނު މެޗަކީ ލީގުގައި ބްލޫސްގެ ފަހު މެޗެވެ.

މެޗުގެ ސެޓުތައް އެޗްޑީސީން ކާމިޔާބު ކުރީ 25-23، 25-15 އަދި 25-18 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ބިދޭސީ ކުޅުންތެރިޔާ މުބައްޝަރު ރަޒާ އެވެ.

މޮޅާއެކު އެޗްޑީސީން ނުވަ ޕޮއިންޓު ހޯދާފައިވާއިރު، އެންމެ ފަހުގެ ޗެމްޕިއަން ދިވެހި ސިފައިންގެ ކުލަބަށް ވެސް ލިބެނީ ނުވަ ޕޮއިންޓެވެ. ދެ ޓީމު ވެސް ވަނީ މިހާތަނަށް ކުޅުނު ތިން މެޗުން ވެސް މޮޅުވެފަ އެވެ. ލީގުގައި ފަހު މެޗުގައި ބުރާސްފަތި ދުވަހުގެ ރޭ ބައްދަލު ކުރާނީ ވެސް އެޗްޑީސީ އާއި ސިފައިންނެވެ. ލީގުގެ ޗެމްޕިއަންކަން ލިބޭނީ އެ މެޗުން މޮޅުވާ ޓީމަކަށެވެ.