މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން އިންތިޒާމްކޮށްގެން ބާއްވާ 2025 ވަނަ އަހަރުގެ އެންމެ ބޮޑު ގްލޯބަލް ކެމްޕޭން "ވާރލްޑް ބިގަސްޓް ގިވްއަވޭ" ރަސްމީކޮށް މިއަދު ފަށައިފިއެވެ.

ޑަބްލިއުޓީއެމް ލަންޑަންގައި ނޮވެމްބަރު މަހުގެ ފަސް ވަނަ ދުވަހު އިއުލާނުކުރި މި ހަރަކާތުން ބުދަ ދުވަހުން ފެށިގެން މި އަހަރުގެ ކޮންމެ ހަފުތާއަކަށް އެއް ޗުއްޓީ ދަތުރު ގިވްއަވޭގެ ގޮތުގައި ދިނުމަށް ވަނީ ހަމަޖެހިފައެވެ. އެގޮތުން މި އަހަރު ޖުމްލަ 52 ޗުއްޓީ ދަތުރު ގިވްއަވޭގެ ގޮތުގައި ދޭނެއެވެ.

ސޯޝަލް މީޑިއާ މެދުވެރިކޮށް ކުރިއަށް ގެންދާ މި ގިވްއަވޭގައި ބައިވެރިވާން ޖެހެނީއޮންލައިންކޮށެވެ.

އެމްއެމްޕީއާރުސީއިން ބުނިގޮތުގައި ކޮންމެ ގިވްއަވޭއެއް ކުރިއަށް ގެންދިއުމުގައި ރާއްޖޭގެ ރީތި ގޮނޑުދޮށްތަކާއި ސާފު މޫދާއި، ގުދުރަތީ ރީތިކަމުން ފެށިގެން ރާއްޖޭގެ މުއްސަނދި ސަގާފަތާއި ތަފާތު ކަނޑުގެ ދިރުންތައް ފަދަ އެކިއެކި ކަންކަމަށް އަލިއަޅުވާލާނެއެވެ. އަދި ރޮމޭންސް، ލަގްޒަރީ، ފެމިލީ، ޑައިވިން އަދި އެހެނިހެން ހިތްގައިމު ތަފާތު ސެގްމެންޓްތަކަށް އަލިއަޅުވާލެވިގެންދާނެ ކަންވެސް ވަނީ ފާހަގަކޮށްފައެވެ.

މި މުބާރާތްތަކުގައި ބައިވެރިވުމުން ފަތުރުވެރިންނަށް ރާއްޖޭގެ ތަފާތު ހިތްގައިމުކަން ދެނެގަނެވި، ލިބޭ ތަފާތު ތަޖުރިބާތައް ހިއްސާކޮށް، ރާއްޖެއަކީ އަހަރުގެ ކޮންމެއިރަކުވެސް ޒިޔާރަތްކުރެވޭނެ މަންޒިލެއްގެ ގޮތުގައި އިޝްތިހާރު ކުރެވޭނެ ކަމަށް އެމްއެމްޕީއާރުސީއިން ބުނެއެވެ. ރާއްޖެއަކީ އެންމެ މަޤްބޫލު ޓްރެވަލް ޑެސްޓިނޭޝަންގެ ގޮތުގައި ހޭލުންތެރިކަން އިތުރުކޮށް, ރާއްޖެއާ ގުޅޭ ތަފާތު މައުލޫމާތުތައް ޓޫރިސްޓުންނާ ހިއްސާ ކުރާނެ ކަމަށްވެސް އެ ކޯޕަރޭޝަނުން ބުނެއެވެ.

ވިޒިޓް މޯލްޑިވްސްއިން މަސައްކަތްކުރަމުން ގެންދަނީ ދިވެހިރާއްޖޭގެ ވާރލްޑް ލީޑިން ޑެސްޓިނޭޝަންގެ މަގާމު ދެމެހެއްޓުމަށ ކަމަށާއި އެގޮތުން މި އަހަރުގެ އަމާޒަކީ، ހޫނު މޫސުމުގައި ބޮޑެތި ކެމްޕޭންތަކާއެކު ހަރަކާތްތައް ކުރިއަށް ގެންދިއުންކަމަށް އެފަރާތުން ބުނެއެވެ.

"ވާރލްޑް ބިގަސްޓް ގިވްއަވޭ "ކެމްޕޭންގެ މައިގަނޑު މަޤްސަދަކީ ސޯޝަލް މީޑިއާގެ ޒަރީއްޔާއިން ބައިނަލްއަގްވާމީ ފަރާތްތަކުގެ ބައިވެރިވުމާއެކު ރާއްޖެއަށް ގިނަ ފަތުރުވެރިން އައުމަށް ޝައުގުވެރި ކުރުވުމެވެ.