މިހާރުގެ ރައީސް ޑރ. މުޙައްމަދު މުއިއްޒު ގެންދަވަނީ ރައްޔިތުންގެ މަޖިލީހުގެ އަގްލަބިއްޔަތުގެ ބޭނުން ހިއްޕަވައިގެން ހުރިހާ ބާރެއް އަމިއްލަ މުށުތެރެއަށް ނެންގެވުމަށް ކަމަށް ދިއްދޫ ދާއިރާގެ ކުރީގެ މަޖިލިސް މެމްބަރު އަބްދުﷲ ވަހީދު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުންނެވެ.
މި ސަރުކާރުގެ އަމަލުތައް ހުރި ގޮތުން މިނިވަން މުއައްސަސާތަކުގެ ހަގީގީ ސިފަ ގެއްލިފައިވާކަން ފާހަގަކުރައްވާ އަބްދުﷲ ވަހީދު ވިދާޅުވީ މި ސަރުކާރުން ހިންގާ އެއްވެސް ކަމެއްގެ ތަހުގީގު މިހާރު މި އޮތް މިނިވަން މުއައްސަސާތަކަށް ނުހިންގޭނޭ ކަމަށާއި މިހާރު ފެންނަމުން މިދާ މަންޒަރުތަކުން އެކަން ވަރަށް ސާފުވާކަމަށެވެ.
ވަހީދު ވިދާޅުވީ ރައީސް ޑރ. މުއިއްޒު އެދިވަޑައި ގަންނަވާ ގޮތަކަށް ކަންކަން ކުރެއްވުމަށް ޓަކައި، އެމަނިކުފާނު ބޭނުންފުޅުވާ ބަޔަކު މިނިވަން މުއައްސަސާތަކަށް އައްޔަންކުރައްވަމުން ގެންދަވާ ކަމަށާއި އެހެންކަމުން ރައީސް އެދިވައިޑައިގަންނަވާ ކަންކަން ނިންމުުގެ ޖާގަ ވަރަށް ބޮޑަށް ފަހިވަމުން އަންނަކަމަށެވެ. އަދި ރައްޔިތުންގެ މަޖިލީހަށް ލިބިފައިވާ އަގްލަބިއްޔަތުގެ ބޭނުން ރައީސް ހިއްޕަވަމުން ގެންދަވަނީ ހުރިހާ ބާރެއް މުށުތެތެއަށް ލެއްވުމަށް ކަމަށް ވެސް އަބްދުﷲ ވަޙީދު ވިދާޅުވިއެވެ.
އަޅުގަނޑުމެންނަށް ވަރަށް ސާފުކޮށް މިއަދު އެބަ ފެނޭ، އެ މުއްއަސަސާތަކުން މިނިވަންކަމާއި އެކު ތަހުގީގުތައް ނުހިންގޭނެކަން. މިއަދު އެބޭފުޅުންނަށް، ރައީސުލްޖުމްހޫރިއްޔާ އެތަންތަނަށް ރައީސުން ލައްވައިގެން، ރައީސުލްޖުމްހޫރިއްޔާ ބޭނުންވާ ތާކަށް، ބޭނުންވާ ތަހުގީގެއް، ރައީސުލްޖުމްހޫރިއްޔާ އެދޭ ގޮތުގަ ކަންކަން ކުރެއްވުމަށް ޓަކައި އެ ޖާގަ މިއަދު އެދަނީ ފަހިކުރައްވަމުން. ރައްޔިތުންގެ މަޖިލީހުގަ ލިބިފަ އޮތް އަޣްލަބިއްޔަތު ބޭނުންކޮށްގެން އެ ހިއްޕަވަމުން އެ ގެންދަވަނީ އެ ބާރުތައް އަތައް ނެންގެވުމަށް ޓަކާ އިނގޭތޯ..އަބްދުﷲ ވަޙީދު ވިދާޅުވި
ވަހީދު ވިދާޅުވީ ވެރިކަން ކުރާ މައި ޕާޓީ، ޕީއެންސީ އަށް ރައްޔިތުން މަޖިލީހުން، ލިބިފައި އޮތް ބޮޑު އަޣްލަބިއްޔަތުގެ ބޭނުން ހިއްޕަވައިގެން ޤާނޫނު އަސާސީއަށް ބަދަލު ގެންނަވައިގެން އެ މަސައްކަތް ކުރައްވަނީ ހުރިހާ ބާރެއް މުށުތެރެއަށް ނެންގެވުމަށް ޓަކައި ކަމަށާއި ރައީސް މުއިއްޒުގެ ވެރިކަމުގައި ވޭތުވެ ދިއަ އެއް އަހަރުގައި ފެނިގެން ދިޔައީ އެ މަންޒަރުކަމަށެވެ. އަދި މި ވެރިކަމަށް އެއް އަހަރު ވީއިރު، ދިވެހި ރައްޔިތަކަށް އެއްވެސް ހެވެއް، ކަމެއް އަދި ލުޔެއް ލިބިގެން ދިޔަ މަންޒަރު ނުފެންނަކަމަށާއި ނަމަވެސް ބަރާބަރަށް ޤާނޫނު އަސާސީއަށް ބަދަލުތައް އެބަ ގެންނަވަމުން ގެންދަވާކަމަށް ވަޙީދު ވިދާޅުވިއެވެ.
ވަހީދު ވިދާޅުވީ ޤާނޫނު އަސާސީގެ ތެރެއިން ލިބިފައި މި ހުރި ޖާގައަކީ ދިވެހި ރައްޔިތުންނަށް ލުއިފަސޭހަތައް ގެނެސް، އުންމީދެއް ގެނައުންކަމަށާއި ނަމަވެސް ޤާނޫނު ތަކާއި ޚިލާފަށް މިނިވަން މުއައްސަސާތަކަށް ބަދަލުގެނައުމަކީ އެއްވެސް ކަމެއްގައި މިިނިވަން ކަމާއި އެކު ތަހުގީގެއް ކޮށް، ނުވަތަ ކަމެއް ބެލޭނެ ޖާގަ އޮތް ކަމެއް ނޫންކަމަށެވެ. އަދި އެފަދައިން ކަންކަން ކުރުމަކީ އެފަދަ ކަންކަން މިނިވަންކަމާއި އެކު ކުރުމުގެ ފުރުސަތު ގެއްލުވާލުން ކަމަށް ވެސް ވަހީދު ވިދާޅުވިއެވެ.
ވަހިދު އިތުރަށް ވިދާޅުވީ މިނިވަން މުއައްސަސާތަކުގައި އިންސާފުވެރިކަމާއި އެކު ކަންކަން ނުހިނގާނެ ކަމަށާއި މިނިވަން މުއައްސަސާތަކަށް ދިވެހިރައްޔިތުންނަށް އޮތް އިތުބާރު ގެެއްލިގެން ގޮސްފައިވާ ކަމަށެވެ.
