އެމެރިކާގެ ކުރީގެ ރައީސް ޖޭމްސް އަރލް ކާޓަރ ޖޫނިއަރ، އަވަހާރަވުމާ ގުޅިގެން އެމެރިކާގެ ރައީސް ހިޒް އެކްސެލެންސީ ޖޯސެފް އާރް ބައިޑަން ޖޫނިއަރއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާގެ މެސެޖުގައި، އެމެރިކާގެ ކުރީގެ ރައީސް ކާޓަރގެ ޙަޔާތްޕުޅު ޚާއްޞަކުރެއްވީ ރިޔާސީ ދައުރުގައިވެސް އަދި ރިޔާސީ ޙަޔާތްޕުޅަށް ފަހުގައިވެސް އިންސާނިއްޔަތަށް ޚިދުމަތް ކުރެއްވުމަށްކަންވަނީ ފާހަގަކުރައްވާފައެވެ.

މީގެ އިތުރުން ލީޑަރެއްގެ ގޮތުގައި އަދި އިންސާނީ އެހީތެރިއެއްގެ ގޮތުގައި ރައީސް ކާޓަރ ދެއްކެވި ނަމޫނާ އަށް އަލިއަޅުވާލައްވާފައިވެއެވެ.

ހަމައެހެންމެ މުޅި ދުނިޔެއަށް މިސާލެއްގެ ގޮތުގައި ދެމިއޮންނާނެ ކަމަށް އުންމީދު ކުރައްވާކަމުގައިވެސް ރައީސުލްޖުމްހޫރިއްޔާގެ މެސެޖުގައި ވިދާޅުވެފައިވެއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައި ވަނީ، ރައީސް ކާޓަރގެ އާއިލާއާއި، އެމެރިކާގެ ސަރުކާރާއި، އެމެރިކާގެ ރައްޔިތުންނަށް އިޚްލާޞްތެރިކަމާއެކު ތަޢުޒިޔާ ވިދާޅުވަމުންނެވެ.

އެމެރިކާގެ ކުރީގެ ރައީސް ޖިމީ ކާޓަރ އަވަހާރަވި އިރު އުމުރުފުޅަކީ 100 އަހަރެވެ.

އޭނާގެ 100 ވަނަ އުފަންދުވަސް ފާހަގަ ކުރެއްވީ ހުސްވި އޮކްޓޯބަރު މަހުގައެވެ. 

ދުނިޔޭގެ އެކި ކަންކޮޅުތަކުގައި ޑިމޮކްރަސީ އާއި އިންސާނީ ޙައްޤުތަކަށް ވަކާލާތުކުރާ ކާޓަރ ސެންޓަރުން ހާމަ ކުރި ގޮތުގައި ކާޓަރ އަވަހާރަވެފައިވަނީ އާދީއްތަ ދުވަހުގެ މެންދުރުފަހު، ޖޯޖިއާގެ ޕްލެއިންސް ގައި ހުންނަ އޭނާގެ އަމިއްލަ ގެކޮޅުގައެވެ. 

ޑިމޮކްރެޓިކް ޕާޓީގެ މެމްބަރެއްގެ ގޮތުގައި ހުންނެވި ކާޓަރ ރައީސްކަން ކުރެއްވީ 1977 އިން 1981 އަށެވެ. މިއީ އިޤްތިޞާދީ މައްސަލަ ތަކާއި ޑިޕްލޮމެޓިކް މައްސަލަތައް ގިނަ ދުވަސްވަރެއްގެ ގޮތުގައި ފާހަގަ ކުރެވުނު ދުވަސް ތަކެކެވެ.