ދެކުނު ކޮރެޔާގައި މަތިންދާބޯޓެއް ވެއްޓި ހިނގި ހިތާމަވެރި ހާދިސާއާ ގުޅިގެން ރައީސްގެ ތައުޒިޔާ
30 ޑިސެމްބަރު 2024 | ހޯމަ 14:17މި ހާދިސާގައި މަރުވި މީހުންގެ އާއިލާތަކަށާއި ކޮރެއާ ސަރުކާރަށާއި ރައްޔިތުންނަށް ތައުޒިޔާ ވިދާޅުވެފައިވޭ
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
މުއާން އިންޓަރނޭޝަނަލް އެއަރޕޯޓަށް ކޮރެއާގެ މަތިންދާބޯޓެއް ވެއްޓި ހިނގާދިޔަ ހިތާމަވެރި ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ކޮރެއާގެ ވަގުތީ ރައީސް ޗޮއި ސަންގ-މޮކްއަށް ހަމްދަރުދީގެ މެސެޖެއް ފޮނުއްވައިފިއެވެ.
ރައީސް ފޮނުއްވި މެސެޖުގައި، މުއާން އިންޓަރނޭޝަނަލް އެއަރޕޯޓަށް މަތިންދާބޯޓު ވެއްޓި ހިނގާދިޔަ ހިތާމަވެރި ހާދިސާގެ ސަބަބުން އެތައް ބަޔަކު މަރުވި ޚަބަރު އެއްސެވީ ކުއްލި ހައިރާންކަމާއި ފުންހިތާމައާ އެކުގައި ކަމުގައި ވިދާޅުވެފައިވެއެވެ. އެ މަނިކުފާނުގެ މެސެޖުގައި، މި ހާދިސާގައި މަރުވި މީހުންގެ އާއިލާތަކަށާއި ކޮރެއާ ސަރުކާރަށާއި ރައްޔިތުންނަށް، ޚާއްސަގޮތެއްގައި މި ހާދިސާގެ ސަބަބުން އަސަރުކުރި ފަރާތްތަކަށް ވަރަށް އިޚްލާސްތެރިކަމާއެކު ތައުޒިޔާ ވިދާޅުވެފައިވެއެވެ.
ރައީސް މުއިއްޒު ފޮނުއްވި މެސެޖު ނިންމަވާލައްވާފައިވަނީ މި ހާދިސާގެ ސަބަބުން ދިމާވި ގެއްލުންތަކުން އަރައިގަތުމަށް ކުރެވެމުންދާ މަސައްކަތްތަކުން ކާމިޔާބު ލިބުމަށް އެދިވަޑައިގެން، އެކަމުން އަރައިގަތުމުގެ ހިއްވަރާއި ސާބިތުކަމަށް އެދިވަޑައިގަންނަވަމުންނެވެ.
މިހާދިސާގެ އެންމެފަހުގެ މައުލޫމާތަށް ބަލާއިރު، މިހާދިސާގައި 179 މީހަކު ވަނީ މަރުވެފައެވެ. އަދި ސަލާމަތްވީ ދެ ފަޅުވެރިން ކަމަށް ރިޕޯޓުކޮށްފައިވެއެވެ.
29 ޑިސެންބަރ 2024ވީ އާދިއްތަ ދުވަހު ހެނދުނު ހިނގި މި އެކްސިޑެންޓުގައި ޖެޖޫ އެއަރލައިންގެ މަތިންދާ ބޯޓެއް ކޮރެއާގެ މުއާން އިންޓަރނޭޝަނަލް އެއަރޕޯޓުގެ ރަންވޭ ގައި އިމަރޖެންސީގައި ގައި ޖައްސަން މަސައްކަތް ކުރަމުން ދަނިކޮށް ބޯޓު މަތަނުވެ ގޮސް އެއްޗެއްގައި ޖެހި ބޯޓު އަލިފާން ގުޅައަކަށް ބަދަލުވެގެން ދިޔަ މަންޒަރު ވަނީ ފެނިފައެވެ.
ދެކުނު ކޮރެއާގެ ޓްރާންސްޕޯޓް މިނިސްޓްރީން ބުނިގޮތުގައި، ތައިލެންޑުގެ ވެރިރަށް ބެންކޮކުން އައި ޖެޖޫ އެއަރގެ ފްލައިޓް 7C2216 ގައި 181 މީހުން ތިއްބެވެ. ބޯޓު އެއަރޕޯޓުގައި ޖެއްސުމަށް މަސައްކަތްކުރަމުން ދިޔައީ އެދުވަހުގެ ހެނދުނު 9 ޖަހާ ކަންހާ އިރުއެވެ.
