އެމްއެމްޕީއާރުސީ ގެ އެއްވެސް މައްސަލައެއް މުއިއްޒަކަށް ނުބެލޭނެ: ޔާމީން
30 ޑިސެމްބަރު 2024 | ހޯމަ 01:46މުއިއްޒުގެ ވެރިކަމަސް 14 މަސްވީ އިރު، ކަރަޕްޝަނުގެ އެއްވެސް މައްސަލައެއް ނުބެލުނު
ޕީއެންއެފް ފްރޮންޓް ޖަލްސާގައި ރައީސް ޔާމީން ވާހަކަފުޅު ދައްކަވަނީ
ރައީސް ޑރ. މުޙައްމަދު މުއިއްޒުގެ ވެރިކަމަށް 14 މަސްވެގެން ދިއައިރު މިހާތަނަށް އެމްއެމްޕީއާރުސީގެ އެއްވެސް މައްސަލައެއް ބެލިފައި ނުވާކަމަށާއި އަދި ނުވެސް ބެލޭނޭކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ އާދިއްތަ ދުވަހުގެރޭ ޕީއެންއެފުން ބޭއްވި ޖަގަހަ ޖަލްސާގައި ވާހަކަފުޅު ދައްކަވަމުންނެވެ.
ރައިސް މުއިއްޒުގެ މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވަމުން ރައީސް ޔާމީން ވިދާޅުވީ ރައީސް މުއިއްޒަކީ ބަހާއި އަމަލާ ދިމާވާ ބޭފުޅެއް ނޫންކަމަށާއި، މުއިއްޒު ދައްކަވާ އެއްވެސް ވާހަކައެއް ދެކޮޅުނުޖެހޭކަމަށެވެ. އެގޮތުން ގަރުދިޔަ ޖަގަހައިގައި އެމްއެމްޕީއާރުސީގެ މައްސަލައިގެ ވާހަކަ ވަރަށް ވަރުގަދައަށް ދެއްކެވިކަމަށާއި ނަމަވެސް އެ މައްސަލައިގެ ވާހަކަ ދެއްކުމުން އެތަނުގައި ތިބި އެކި މީހުންގެ ލޮލަށް އެރީ އެކިކުލަކަން ޔާމީން ވިދާޅުވިއެވެ.
ރައީސް ޔާމިން ވިދާޅުވީ ގަރުދިޔަ ޖަގަހައިގެ ތެރޭ އެމްއެމްޕީއާރުސީ މައްސަލައިގެ ވާހަކަ ދެއްކި ނަމަވެސް އެ މައްސަލަ ބަލަން އެއްވެސް މީހަކު ބޭނުން ނުވާކަމަށެވެ. އެގޮތުން ރައީސް މުއިއްޒުގެ މި ވެރިކަމަށް 14 މަސް ދުވަސް ފާއިތުވެގެން ދިޔައިރު، އެމްއެމްޕީއާރުސީގެ އެއްވެސް މައްސަލައެއް މިހާތަނަށް ބެލިފައި ނުވާކަމަށާއި އަދި އެ މައްސަލަ ރައީސް މުއިއްޒަށް ނުވެސްބެއްލެވޭނރ ކަމަށް ރައީސް ޔާމީން ވިދާޅުވިއެވެ.
މީގެ އިތުރުން ރައީސް ޔާމީން ވިދާޅުވީ ދިވެހި ތާރީޚުގައި ވެސް ކަރަޕްޝަން ހުއްޓުވަން ރައީސް މުއިއްޒު ވަރުމީހެއް ނެތްކަމަށް ބުނެ ވާހަކަދައްކަމުން ދާކަމަށާއި ނަމަވެސް މި ސަރުކާރަށް 14 މަސްވެގެން ދިޔައީރު، ހިނގާދިއަ ބޮޑެތި ވައްކަމާއި ހިޔާނާތާއި ކަރަޕްޝަނުގެ އެއްވެސް މައްސަލައެއް ބެލިފައި ނުވާކަމަށެވެ.
ޔާމީން ވިދާޅުވީ އެޗްޑިސީގެ ބޮޑު ވައްކަމާއި ހިޔާނާތުގެ މައްސަލައިގެ ތުހުމަތު ކުރެވުނު އެ ކުންފުނީގެ ކުރީގެ އެމްޑީ ފަޒުލް ރަޝީދާއި ފެނަ އެމްޑީ މުއާޒް މަގާމުން އިސްތިފާ ދިނީ ރައީސް މުއިއްޒު އަންގަވައިގެން ނޫން ކަމަށާއި އެ ބޭފުޅުން މަގާމުތަކުން އިސްތިއުފާދެއްވީ ރައްޔިތުން އަރައިގަތުމުން މަގާމުގައި އިތުރުރަށް ތިބެން ނުކެރުމުން ކަމަށެވެ. އަދި މުއިއްޒުއަށް މީގެން އެއްވެސް މީހެއްގެ މައްސަލައެއް ނުބެލޭނޭ ކަމަށާއި އެއީ މުއިއްޒުއަށް އެކަން ކުރަން ނުވެސް ކެރޭނޭ ކަމަށް ޔާމީން ވިދާޅުވިއެވެ.
