އެމްޓީސީސީ އާއި ސޭވްދަ ބީޗް ގުޅިގެން ހިރިލަންދޫގައި ސާފުކުރުމުގެ ހަރަކާތްތަކެއް ކުރިއަށް ގެންގޮސްފި
ތ. ހިރިލަންދޫ ކައުންސިލަށް ވަނީ 10 ޑަސްޓްބިން އެމްޓީސީސީން ހަދިޔާ ކޮށްފަ
އެމްޓީސީސީ އާއި ސޭވްދަ ބީޗް ގުޅިގެން ހިރިލަންދޫގައި ސާފުކުރުމުގެ ހަރަކާތް
އެމްޓީސީސީ އާއި އަމިއްލަ ޖަމިއްޔާއެއް ކަމަށްވާ ސޭވްދަ ބީޗް ގުޅިގެން، ތ. ހިރިލަންދޫގައި ސާފު ކުރުމުގެ ޙަރަކާތެއް ހޮނިހިރު ދުވަހު ކުރިއަށް ގެންގޮސްފިއެވ
މި ހަރަކާތް ކުރިއަށް ގެންގޮސްފައި ވަނީ ހިރިލަންދޫ ބޯޓްޔާރޑްގެ ގޮނޑުދޮށް ސަރަހައްދުގައެވެ. މި ހަރަކާތުގައި ހިރިލަންދޫ ސްކޫލްގެ ދަރިވަރުންނާއި ޓީޗަރުންނާއި، ރަށު ކައުންސިލްގެ މުވައްޒަފުންނާއި މޯލްޑިވްސް ޕޮލިސް ސާރވިސްގެ މުވައްޒަފުން ވަނީ ބައިވެރިވެފައެވެ.
ހަސަތޭކަ ސާޅިސް ކިލޯގެ ކުނި ހިރިލަންދޫގެ އެކި ސަރަހައްދުތަކުން ވަނީ ހޮވާފައެވެ. އަދި އެމްޓީސީސީ ގެ ފަރާތުން ތ. ހިރިލަންދޫ ކައުންސިލަށް ވަނީ 10 ޑަސްޓްބިން ވެސް ހަދިޔާ ކޮށްފައެވެ.
އެމްޓީސީސީގެ ފަރާތުން ސާފުކުރުމުގެ ޕްރޮގްރާމްތައް ހިންގަމުން އަންނަތާ 3 އަހަރު ވަނީ ވެފައެވެ. މިދިޔަ ދެ އަހަރު ވެސް މި ޕްރޮގްރާމް ހިންގައިފައި ވަނީ ވިލިމާލޭގައެވެ.
ރާއްޖޭގެ ރަށްތަކުގައި މި ޙަރަކާތް ހިންގުމުގެ މަޤްސަދަކީ ތިމާވެށީގެ މުހިންމުކަން ރާއްޖޭގެ އެކި ކަންކޮޅުތަކުގައި އުޅުއްވާ ފަރާތްތަކުގެ ހޭލުންތެރިކަން އިތުރު ކުރުން ކަމުގައި އެމްޓީސީސީން ވަނީ ބުނެފައެވެ.
މި ޙަރަކާތުގެ ބައިވެރިންނަށް އެކި ބާވަތްބާވަތުގެ ކުންޏާ އެތަކެތި ނައްތާލަންޖެހޭ ގޮތް ތަކާއި އެތަކެތިން ލިބޭ ގެއްލުން އަދި ދެވަނަ ފަހަރަށް ބޭނުން ކުރެވޭ ކުނީގެ މައުލޫމާތު ވަނީ ފޯރުކޮށްދީފަ އެވެ.
މި ހަރަކާތުގައި ޖުމްލަ 80 ފަރާތަކުން ވަނީ ބައިވެރިވެފައެވެ.
