ކޮފީ ޝޮޕްތަކަކުން 5 ބިދޭސީއަކު އިމިގްރޭޝަންގެ ބެލުމުގެ ދަށަށް
އިމިގްރޭޝަނުން ހިނގި ރެއިޑް އޮޕަރޭޝަނުގައި މިހާތަނަށް 1،300 އަށް ވުރެ ގިނަ ތަންތަން ބަލައި ފާސްކޮށް ޖުމުލަ 5،012 ބިދޭސީން ފުރުވާލާފައިވޭ
އިމިގްރޭޝަނުން މާލޭ ކޮފީޝޮޕްތަކުގަ ހިންގި ރެއިޑް އޮޕަރޭޗަނުގެ ތެރެއިން. ފޮޓޯ: އިމިގްރޭޝަން
ރާއްޖޭގައި ގަވައިދާ ހިލާފަށް އުޅެމުންދާ ބިދޭސީން ހޯދުމަށް މޯލްޑިވްސް އިމިގްރޭޝަނުން ކުރިއަށް ގެންދިއަ އޮޕަރޭޝަނުގެ ތެރެއިން ކޮފީ ޝޮޕްތަކަކުން 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
މިކަން ހާމަކޮށް އިމިގްރޭޝަނުން "އެކްސް" ގައި ކުރި ޕޯސްޓެއްގައި ބުނީ އެ މީހުން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ޓާސްކުފޯހުން މާލޭގެ ކޮފީ ޝޮޕްތަކަށް ހާއްސަކޮށްގެން ހޮނިހިރު ދުވަހު ހިންގި ރެއިޑު އޮޕަރޭޝަން ގައި ކަމަށެވެ.
ހޮނިހިރު ދުވަހުގެ ރެއިޑް އޮޕަރޭޝަނުން ކޮފީޝޮޕް ހިންގަމުންދާ 6 ތަނެއް ބަލައި ފާސްކޮށްފައިވާ ކަމަށް އިމިގްރޭޝަންގެ ޕޯސްޓުގައި ވަނީ ބުނެފައެވެ.
ކޮފީޝޮޕްތަކުން ފަސް މީހަކު ހައްޔަރުކޮށްފައިވާއިރު، އިމިގްރޭޝަންގެ ރެއިޑް މި ދުވަސްކޮޅު ބޮޑަށް އަމާޒުކުރަނީ ބިދޭސީންގެ ބޮޑު ނުފޫޒެއް އޮންނަ ސަރަހައްދުތަކަށެވެ.
ގަވާއިދާ ހިލާފަށް އުޅޭ ބިދޭސީންނަށް އަމާޒުކޮށް, ޓާސްކްފޯހުން ގިނަ އޮޕަރޭޝަންތަކެއް ހިންގާފައިވާއިރު، މާލެ ސަރަހައްދާއި ހުޅުމާލޭ ސަރަހައްދުގެ އޮޕަރޭޝަންތައް ކާމިޔާބުކަމަށް އިމިގްރޭޝަނުން ބުނެއެވެ.
މިހާތަނަށް ހިންގި އޮޕަރޭޝަންތަކުގައި 1،300 އަށް ވުރެ ގިނަ ތަންތަން ބަލައި ފާސްކޮށް ޖުމުލަ 5،012 ބިދޭސީން ފުރުވާލާފައިވާ ކަމަށް އިމިގްރޭޝަނުން އެންމެފަހުން އާންމުކޮށްފައިވާ ތަފާސް ހިސާބުތަކުން ދައްކަ އެވެ.
ރާއްޖެއިން ފުރުވާލި ބިދޭސީންގެ ތެރޭގައި ސައްހަ ވިސާ ނެތި އުޅެމުންދިޔަ މީހުންނާއި އެކި ކުށްތަކަށް އަރައިގަންނަމުންދިޔަ ބިދޭސީން ހިމެނޭއިރު، އޭގެ ތެރޭގައި މަސްތުވާތަކެތީގެ މައްސަލަތަކާއި ވައްކަމުގެ އިތުރުން ހަށިވިއްކުމުގެ ވިޔަފާރީގައި އުޅުނު ބިދޭސީން ވެސް ގިނަ އަދަދަކަށް ހިމެނެ އެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ބިދޭސީންގެ މައުލޫމާތު އެއްކުުރުމަށް ކުރިއަށްގެންދާ އޮޕަރޭޝަން, ކުރަނގީގެ ދަށުން މިހާތަނަށް 18,000 ގިނަ ބިދޭސީންގެ ބަޔޯމެޓްރިކް ޑޭޓާ ނަގާފައިވާކަމަށް އިމިގްރޭޝަނުން ބުނެއެވެ.
