ކޮރަޕްޝަން އާއްމުވެ، ޕީއެންސީ ހިންގަމުންދަނީ ދައުލަތުގެ ފައިސާއިން: މެންބަރު ސަމީރު
28 ޑިސެމްބަރު 2024 | ހޮނިހިރު 09:52މިސަރުކާރުގެ ޕާޓީގެ ބޭފުޅުންނަށް ދީފައިވާ ސިޔާސީ މަގާމުތައް އިންތިހާއަށް އިތުރު
ފަލަސުރުހީ ޕްރޮގްރާމްގައި ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވާހަކަދައްކަވަނީ
މިސަރުކާރުގައި ކޮރަޕްޝަން އިންތިހާއަށް ބޮޑަށް އާއްމުވެ، ސަރުކާރުގެ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) ހިންގަމުންދަނީ ދައުލަތުގެ ފައިސާއިން ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން މެންބަރު ސަމީރު ވިދާޅުވީ ރައީސް ޑރ.މުހައްމަދު މުއިއްޒުގެ ސަރުކާރުގައި ކޮރަޕްޝަން މުޅި ގައުމުގައި އާއްމުވެފައިވާ ކަމަށާއި، މުޅިން ވެސް ފެންމަތިވަމުންދަނީ ހިޔާނާތުގެ ބޮޑެތި މައްސަލަތައް ކަމަށެވެ.
މެންބަރު ސަމީރު ވިދާޅުވީ ގައުމުގެ ކަންކަން ރަނގަޅު ކުރުމަށް އައި ސަރުކާރުން ހުރިހާ ކަމެއް ގޯސްކޮށްފައިވާ ކަމަށާއި، މިއަދު ސަރުކާރުގެ ޕާޓީ ޕީއެންސީ ހިންގަމުންދަނީ ދިވެހި ދައުލަތުގެ ފައިސާއިން ކަމަށެވެ. މިސަރުކާރުގެ ޕާޓީގެ ބޭފުޅުންނަށް ދީފައިވާ ސިޔާސީ މަގާމުތައް އިންތިހާއަށް އިތުރު ކަމަށާއި، އެބޭފުޅުން ކުރާނެ މަސައްކަތެއް ވެސް ނޯންނަ ކަމަށް މެންބަރު ސަމީރު ވިދާޅުވިއެވެ. އަދި ވިދާޅުވީ ފިންގަރ ޖެހުމަށްފަހު ސޯޝަލް މީޑިއާގައި ސަރުކާރު ޕްރޮމޯޓް ކުރުމުން މަސައްކަތް ނިމުނީ ކަމަށެވެ. އެއީ ޕީއެންސީ ޕްރޮމޯޓްކޮށް ޕާޓީގައި މަސައްކަތް ކުރާ ބޭފުޅުން ކަމަށް މެންބަރު ސަމީރު ވިދާޅުވިއެވެ.
މިސަރުކާރުގެ ބޭފުޅުން މިއަދުވެސް ކުރީ ސަރުކާރުގެ ބޮލުގައި ބައެއް ކަންކަން އެޅުވުމަށް މަސައްކަތް ކުރާތީ މެންބަރު ސަމީރު ވަނީ ފާޑު ވިދާޅުވެފައެވެ.
މެންބަރު ސަމީރު ވިދާޅުވީ ރައްޔިތުން ނުކުމެ ވެރިކަން ބަދަލުކުރީ އޭރުގެ ސަރުކާރު ކަމުނުދިޔަ ކަމަށް ބުނެއެ، ރައީސް މުއިއްޒަށް ވެރިކަން ހަވާލުކޮށް، ރައްޔިތުންގެ މަޖިލީހުގެ ބޮޑު މެޖޯރިޓީއެއް ދީފައިވަނީ ކަންކަން ރަނގަޅު ކުރުމަށް ކަމަށެވެ. ނަމަވެސް ރައްޔިތުންގެ އިތުބާރު ގެއްލުވާލައި، ކަންކަން ގޯސްކޮށް ކުރާނަމަ އެކަމާއި ދެކޮޅަށް ނުކުންނާނީ ރައްޔިތުން ކަމަށް މެންބަރު ސަމީރު ވިދާޅުވިއެވެ.
