ގާޑިއޯލާ ބުނީ ޗެމްޕިއަންސް ލީގަށް ކޮލިފައިވުމުގައި ސިޓީ އޮތީ ރިސްކެއްގައި ކަމަށް

މިވަގުތު ނަތީޖާތައް ދަށްވެފައިވާ މެންޗެސްޓަރ ސިޓީ އޮތީ، ޔުއެފާ ޗެމްޕިއަންސް ލީގަށް ކޮލިފައިވުމުގައި ރިސްކެއްގެ ތެރޭގައި ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ ހަވާލުވީ ފަހުން މިއީ ސިޓީގެ ނަތީޖާތައް އެންމެ ބޮޑަށް ދަށްވެފައިވާ ފަހަރެވެ. ހުރިހާ މުބާރާތެއްގައި އެންމެ ފަހުން ސިޓީ ކުޅުނު 12 މެޗުގެ ތެރެެއިން އެ ޓީމު މޮޅުވެފައި ވަނީ އެންމެ މެޗަކުންނެވެ. ނުވަ މެޗަކުން ސިޓީ ވަނީ ބަލިވެފަ އެވެ. ލީގު ތާވަލްގައި ސިޓީ އޮތީ ވެސް ހަތް ވަނައިގަ އެވެ.

އެކަމާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ، ފާއިތުވި އަހަރުތަކުގެ ތެރޭގައި ޗެމްޕިއަންސް ލީގުގައި ދެމި އޮތް ޓީމުގެ ތަކުގެ ތެރޭގައި ސިޓީ ހިމެނޭނެ ކަމަށެވެ. އެހެން ނަމަވެސް، މިހާރު ސިޓީ އޮތީ ޗެމްޕިއަންސް ލީގަށް ކޮލިފައިވުމުގައި ރިސްކެއްގެ ތެރޭގައިކަން ފާހަގަކޮށް ގާޑިއޯލާ ބުނީ، އެއީ ވަރަށް ބޮޑު ކަމެއް ކަމަށެވެ. އޭނާ ބުނީ ކުރިއަށް ހުރި މެޗުތަކުން ރަނގަޅު ނަތީޖާތަކެއް ހޯދައި، ޕޮއިންޓުތަކެއް ހޯދަން ސިޓީ އަށް މަޖުބޫރު ކަަމަށާއި، އެ ނޫން ނަމަ އެ ޓީމުގެ ޗެމްޕިއަންސް ލީގަށް ކޮލިފައި ނުވާނެ ކަމަށެވެ.

މީގެ އިތުރުން ގާޑިއޯލާ ބުނީ ޗެމްޕިއަންސް ލީގުން ސިޓީ އަށް ފުރުސަތު ނުލިބިއްޖެ ނަމަ، އޭގޭ މާނައަކީ ސިޓީ އަށް އެކަން ހައްގު ނޫން ކަމަށެވެ. ޚާއްސަކޮށް އެއީ ސިޓީ އެކަމަށް ތައްޔާރު ނޫންކަން ދައްކުވައި ދޭނެ ކަމެއް ކަމަށާއި، ސިޓީ އަށް ބޮޑެތި މައްސަލަތަކެއް އޮތްއިރު، އެކަންކަމަށް ޙައްލު ހޯދަން ޖެހޭ ކަމަށް ވެސް ގާޑިއޯލާ ވަނީ ބުނެފަ އެވެ.

މި ސީޒަންގެ ލީގުގައި ސިޓީން ވަނީ މިހާތަނަށް 17 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ އަށް މެޗުންނެވެ. ހަ މެޗުން ބަލިވެފައިވާއިރު، ތިން މެޗުން ވަނީ އެއްވަރުވެފަ އެވެ. 27 ޕޮއިންޓާ އެކު ސިޓީ ހަތް ވަަނައިގައި އޮތްއިރު، ފަސް ވަަނައިގައި އޮތް ނޮޓިންހަމް ފޮރެސްޓާ ދެމެދު ހަތަރު ޕޮއިންޓުގެ ފަރަގެއް އެބަ އޮތެވެ. ގާޑިއޯލާގެ އިރުޝާދުގެ ދަށުން ސިޓީން ވަނީ 23-2022 ވަނަ ސީޒަންގެ ޗެމްޕިއަންސް ލީގު ކާމިޔާބު ކޮށްފަ އެވެ.