ޕީއެސްޖީން ބޭނުން ވަނީ ކޯލޯ މުއާނީ ދޫކޮށްލަން

ޕެރިސް ސެއިންޓް ޖާމަން (ޕީއެސްޖީ) އިން ބޭނުން ވަނީ އެ ކުލަބަށް ކުޅެމުން އަންނަ ފްރާންސްގެ ފޯވާޑު، ރަންޑަލް ކޯލޯ މުއާނީ ދޫކޮށްލަން ކަމަށް މީޑިއާ ރިޕޯޓުތައް ބުނެފި އެވެ.

އައިންޓްރަކްޓް ފްރޭންކްފާޓް ދޫކޮށްލުމަށްފަހު، އުމުރުން 26 އަހަރުގެ ކުޅުންތެރިޔާ ޕީއެސްޖީ އަށް ބަދަލުވީ 2023 ވަނަ އަހަރުގެ ސެޕްޓެމްބަރު މަހުގެ ތެރޭގަ އެވެ. އެ ކުލަބާ އެކު އޭނާ ސޮއި ކޮށްފައިވާ ފަސް އަހަރު ދުވަހުގެ އެއްބަސްވުމުގެ މުއްދަތު ހަމަވާނީ، 2028 ވަނަ އަހަރު އެވެ. އެ އެއްބަސްވުމުގައި ބާކީ ހަތަރު އަހަރު އޮތް ނަމަވެސް، ޕީއެސްޖީން ބޭނުން ވަނީ އޭނާ ދޫކޮށްލަން ކަމަށް ރިޕޯޓުތަކުގައި ވަނީ ފާހަގަ ކޮށްފަ އެވެ.

ފްރާންސްގެ މީޑިއާ ތަކުގައި ބުނެފައިވާ ގޮތުން ޕީއެސްޖީން ބޭނުން ވަނީ ކުރިއަށް އޮތް ޖަނަވަރީ ޓްރާންސްފާގައި ކޯލޯ މުއާނީ ދޫކޮށްލުމަށެވެ. އެކަމާ ގުޅޭ މަޝްވަރާތައް އެ ކުލަބުގެ އިސްވެރިންގެ ދެ މެދުގައި ކޮށްފައިވާއިރު، އެކަމުގައި މިހާރު ގޮތެއް ނިންމައިގެން ތިބި ކަމަށް ވެސް ވަނީ ބުނެފަ އެވެ. އަނެއްކޮޅުން ޕީއެސްޖީ އަށް އިރުޝާދު ދެމުން އަންނަ ސްޕެއިންގެ ލުއިސް އެންރީކޭގެ ޕްލޭންގައި ވެސް ކޯލޯ މުއާނީ ނުހިމެނޭ ކަމަށް ރިޕޯޓުތަކުގައި ވަނީ ބުނެފަ އެވެ.

ޕީއެސްޖީން ކޯލޯ މުއާނީ ދޫކޮށްލަން ބޭނުންވާއިރު، އޭނާ ހޯދުމުގެ ޝައުޤުވެރިކަން ބައެއް ކުލަބުތަކުން ގެންގުޅޭ ކަމަށް ވެސް ރިޕޯޓުކޮށްފައިވެ އެވެ. އެގޮތުން އިޓަލީ ލީގުގެ އޭސީ މިލާން އިން އޭނާ ހޯދުމަށް ޝައުޤުވެރިވާއިރު، ޖަރުމަނު ލީގުގެ ބައެއް ކުލަބުތަކުގެ އިތުރުން، އިނގިރޭސި ޕްރިމިއާ ލީގުގެ ބައެއް ކުލަބުތަކުގެ ޝައުޤުވެރިކަން ވެސް ކޯލޯ މުއާނީ އަށް އޮތް ކަމަށް ރިޕޯޓުތަކުގައި ބުނެފައިވެ އެވެ.

ޕީއެސްޖީ އަށް ބަދަލުވީ ފަހުން ކޯލޯ މުއާނީ ވަނީ މިހާތަނަށް އެ ކުލަބަށް ކުޅެދިން 54 މެޗުގައި 11 ލަނޑު ޖަަހައިފަ އެވެ. މިހާރު ކުރިއަށްދާ ސީޒަންގެ 14 މެޗެއްގައި އޭނާ ކުޅެފައިވާއިރު، ދެ ލަނޑު ވަނީ ޖަހައިފަ އެވެ. ޕީއެސްޖީން ކޯލޯ މުއާނީ ދޫކޮށްލަން ބޭނުންވާ އެންމެ ބޮޑު އެއް ސަބަބަކީ އެ ކުލަބުގައި އޭނާ އަށް ރަނގަޅު ކުޅުމެއް ނުދެއްކުން ކަމަށް ވެސް ރިޕޯޓުތަކުގައި ވަނީ ބުނެފަ އެވެ. އޭނާ ވަނީ ޕީއެސްޖީ އާއެކު ތިން ތައްޓެއް ކާމިޔާބު ކޮށްފަ އެވެ.