ގެދޮރުވެރިޔާ އަދި ބިންވެރިޔާ ސްކިމުގެ ތަހުގީގާއި ގުޅޭގޮތުން މަޝްވަރާކޮށްފި

ގެދޮރުވެރިޔާ އަދި ބިންވެރިޔާ ސްކިމުގެ ތަހުގީގާއި ގުޅޭގޮތުން ފުލުހުން އެޗްޑީސީގެ މެނޭޖިންގ ޑިރެކްޓަރު މުޙައްމަދު މަޢުރޫފް ޖަމީލު އާއި މަޝްވަރާކުރައްވައިފިއެވެ.

ފުލުހުން ބުނީ އެޗްޑީސީގެ މެނޭޖިންގ ޑިރެކްޓަރ މުޙައްމަދު މަޢުރޫފް ޖަމީލް، ކޮމިޝަނަރ އޮފް ޕޮލިސް ޢަލީ ޝުޖާޢު އާ މިއަދު ބައްދަލުކުރައްވާފައިވާ ކަމަށެވެ. މި ބައްދަލުވުމަކީ އެޗްޑީސީގެ މެނޭޖިންގ ޑިރެކްޓަރުގެ މަޤާމާ އަލަށް ހަވާލުވެވަޑައިގަތުމަށްފަހު ތައާރަފު ވުމުގެ ގޮތުން ބޭއްވެވި ބައްދަލުވުމެއް ކަމަށް ވެސް ފުލުހުން ބުނެފައިވެއެވެ.

ފުލުހުން ބުނެފައިވަނީ މި ބައްދަލުވުމުގައި މިހާރު ކުރިއަށްދާ، ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ހިނގަމުންދާ ތަހުގީގާ ބެހޭގޮތުން ވެސް މަޝްވަރާ ކުރެއްވި ކަމަށެވެ.

އެޗްޑީސީން ވަގަށް ބިންތަކެއް ވިއްކާފައިވާ މައްސަލައިގައި ފުލުހުން އަންނަނީ ތަހުގީގެއް ހިންގަމުންނެވެ. އަދި މި މައްސަލައިގައި އެ ކުންފުނީގެ ބޯޑު ސަސްޕެންޑްކޮށްފައިވާއިރު، އެ ކުންފުނީގެ ކުރީގެ އެމްޑީ ފަޒުލް ވަނީ އިސްތިއުފާ ދެއްވާފައެވެ. އަދި ބައެއް ފަރާތްތަކުގެ ޕާސްޕޯޓުވެސް ވަނީ ހިފަހައްޓާފައެވެ.

މީގެ އިތުރުން ބިންވެރިޔާ ސްކީމާއި ގެދޮރުވެރިޔާ ސްކީމާއި ގުޅޭގޮތުން ފުލުހުން ކުރިއަށްގެންދާ ތަހުގީގާއި ގުޅިގެން އެޗްޑީސީގެ ބައެއް މުވައްޒަފުން ވަނީ ވަޒީފާއިންވެސް ވަކިކޮށްފައެވެ.