ކޮރަޕްޝަނުން ގައުމު ސަލާމަތްކުރުމަށް ބޭނުންވަނީ ހުރިހާ ރައްޔިތުންގެ އެއްބާރުލުން: ރައީސް މުއިއްޒު
ކުރިއަށް އޮތްތަނުގައި އެޗްޑީސީގެ ހިންގުން ވަރަށް ބޮޑަށް ރަނގަޅުވާނެ
ސަރުކާރަށް އެއްއަހަރު ފުރުން ފާހަގަކުރުމަށް ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވާހަކަފުޅު ދައްކަވަނީ
ކޮރަޕްޝަނުން ގައުމު ސަލާމަތްކުރުމަށް ބޭނުންވަނީ ހުރިހާ ރައްޔިތުންގެ އެއްބާރުލުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހު ބައެއް މީޑީއާތަކަށް ދައުވަތުދީގެން މިހާރު ހިނގައިގެން އުޅޭ އެޗްޑީސީ ގޯތީގެ ވައްކަމާއި ގުޅޭގޮތުން އެމަނިކުފާނު ވަނީ ވާހަކަދައްކަވާފައެވެ. ރައީސް އޮފީސް ކުރިމަތީގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން ރައީސް މުއިއްޒު ވިދާޅުވީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އަށް އައު މެނޭޖިން ޑިރެކްޓަރަކަށް މައުރޫފް ޖަމީލު އައްޔަން ކުރައްވާފައިވާ ކަމަށާއި، އެއީ ވަރަށް އިތުބާރު ކުރައްވާ ފުލް އިންޓަގްރިޓީ ހުރި ބޭފުޅެއް ކަމަށެވެ. އަދި ކުރިއަށް އޮތްތަނުގައި އެޗްޑީސީގެ ހިންގުން ވަރަށް ބޮޑަށް ރަނގަޅުވެގެންދާނެކަން ޔަގީން ކުރައްވާ ކަމަށް އެމަނިކުފާނު ވިދާޅުވިއެވެ.
އެޗްޑީސީގައި ހިނގާދިޔަ ގޯތީގެ ވައްކަން ފަދަ މައްސަލަތައް ތަކުރާރުނުވާނެތޯ ނޫސްވެރިޔަކު ސުވާލުކުރުމަށް ރައީސް މުއިއްޒު ވިދާޅުވީ މިފަދަ މައްސަލަތައް ހައްލު ކުރުމުގައި ހުރިހާ ރައްޔިތުންގެ އެއްބާރުލުން ބޭނުންވާ ކަމަށެވެ. އެއްވެސް މުއައްސަސާއެއް، މިނިސްޓްރީއެއް އަދި އޮފީހެއްގައި އެއްވެސް މީހަކަށް ކޮރަޕްޝަންގެ އަމަލެއް ހިންގުމަށް އެއްވެސް ފުރުސަތެއް ލިބެން ބޭނުންނުވާ ކަމަށް ރައީސް މުއިއްޒު ވިދާޅުވިއެވެ. އަދި ވިދާޅުވީ އެންމެންގެ ވެސް ނިޔަތަކަށްވާންޖެހޭނީ ވަރަށް ތެދުވެރިކަމާއި އަމާނާތްތެރިކަމާއެކު ރައްޔިތުންނަށް ކަންތައްތަކެއް ނުވަތަ ޚިދުމަތެއް ފޯރުކޮށްދިނުމަށް މަސައްކަތް ކުރުން ކަމަށެވެ.
އެޗްޑީސީއަށް ކުރެވޭ ހިޔާނާތްތަކަށް އިޝާރާތް ކުރައްވައި ރައީސް މުއިއްޒު ވިދާޅުވީ މިމައްސަލަތައް ފުލުހުން ތަހުގީގު ކުރަމުންދާ ކަމަށާއި، އުންމީދުކުރަނީ މިކަމުގެ ހަގީގަތް ހާމަވަގެންދާނެ ކަމަށެވެ. ހިޔާނާތެއް ހިންގާފައިވާނަމަ އެކަން ހާމަކޮށް، އެކަމުގައި ބައިވެރިވާ އެންމެންނަށް ފިޔަވަޅުތައް އެޅިގެންދާނެ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ އެޅި ކުރިއަށް އޮތްތަނުގައި މިފަދަ އަމަލުތައް ނުހިންގޭނެ ގޮތަކަށް ކަންކަން ބައްޓަންކުރާނެ ކަމަށެވެ.
