އެޗްޑީސީގެ އާ މެނޭޖިން ޑިރެކްޓަރަކަށް މައުރޫފް ޖަމީލު އައްޔަނުކޮށްފި
އޭނާ އެ މަޤާމަށް އައްޔަންކޮށްފައި މި ވަނީ ކޮރަޕްޝަނާއި ހިޔާނާތުގެ ގިނަ ތުހުމަތުތަކެއް އެ ކުންފުންޏަކާ ގުޅޭގޮތުން ކުރެވެމުންދާ ދަނޑިވަޅެއްގަ
މައުރޫފް ޖަމީލް
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ އާ މެނޭޖިން ޑިރެކްޓަރަކަށް މައުރޫފް ޖަމީލު އައްޔަނުކޮށްފިއެވެ.
އޭނާ އެ މަޤާމަށް އައްޔަންކޮށްފައި މިވަނީ އެޗްޑީސީގެ އެމްޑީއަކަށް ހުންނެވި އިބްރާހިމް ފަޒުލް ރަޝީދުގެ މައްޗަށާއި، އެ ކުންފުންޏަށް ކޮރަޕްޝަނާއި ހިޔާނާތުގެ ގިނަ ތުހުމަތުތަކެއް ކުރެވެމުންދާ ދަނޑިވަޅެއްގައެވެ.
މައުރޫފް އެ މަޤާމަށް އައްޔަންކުރީ އާދިއްތަ ދުވަހުއެވެ.
އާކިޓެކްޓެއް ކަމަށްވާ މައުރޫފް އަކީ ހުޅުމާލެ ތަރައްގީކުރުމުގެ މަޝްރޫޢުގައި އިސްކޮށް އުޅުއްވި ބޭފުޅެކެވެ.
މައުރޫފް އަކީ މި ސަރުކާރުން އެކުލަވާލާފައިވާ ހައުސިން ކޮމިޓީގެ މެންބަރެކެވެ. އަދި އޭނާ އަކީ ރައީސް މައުމޫނު ގެ ކެބިނެޓްގައި ކޮންސްޓްރަކްޝަން އެންޑް ޕަބްލިކްވާރކްސް މިނިސްޓަރު ކަން ކުރެއްވި ބޭފުޅެއްވެސް މެއެވެ.
އެ މަޤާމަށް މައުރޫފް އައްޔަންކުރައްވާފައި މި ވަނީ އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު މަޤާމުން އިސްތިއުފާދެއްވިތާ 24 ގަޑިއިރުވެސް ނުވަނީހެވެ. ފަޒުލް އިސްތިއުފާދެއްވާފައި ވަނީ ހޮނިހިރު ދުވަހުއެވެ. އޭރު ވެސް އޭނާ ހުންނެވީ ސަސްޕެންޝަންގައެވެ.
އޭނާ ފޮނުއްވި އިސްތިއުފާގެ ސިޓީގައި ބުނެފައި ވަނީ އެ މަޤާމުގައި ހޭދަކުރި މުއްދަތުގައި އޭނާ އާއި މެދު ތަފާތު އެކި ތުހުމަތުތައް ކޮށް ސޯޝަލް މީޑިއާގައި ދައުރުވަމުންދާ ހުރިހާ ތުހުމަތަކަށް އިންކާރުކުރައްވާ ކަމަށެވެ. އޭގެ ތެރޭގައި ސޯޝަލް މީޑިއާ އާއި އެހެން ޕްލެޓްފޯމްތަކުގައި ކުރާ ތުހުމަތުތައް ހިމެނޭ ކަމަށް ފަޒުލް ވިދާޅުވިއެވެ.
ފަޒުލް ވިދާޅުވީ އޭނާ މަޤާމަށް އައްޔަންކުރި ފަހުން ކުންފުނީގެ ފަރާތުން ކޮށްފައިވާ ހުރިހާ މުއާމަލާތެއް ކޮށްފައި ވަނީ ކުންފުނީގެ ބޯޑުގެ ނިންމުންތަކާއި ކުންފުނީގެ ޕޮލިސީތަކުގެ މަތިން ކަމަށެވެ. އަދި ހުރިހާ މަސައްކަތެއް ކުރީ ކުންފުނީގެ މަސްލަހަތު އިސްކޮށްގެން ކަމަށް ވަނީ ފާހަގަކޮށްފައެވެ.
ބިންވެރިޔާ ސްކީމާއި ގުޅިގެން ކުންފުންޏަށް އަމާޒުވެފައިވާ ތުހުމަތުތަކަކީ ކުންފުންޏާއި ގުޅުމެއް ނެތް ތުހުމަތުތަކެއް ކަމަށް ވެސް ފަޒުލް ވަނީ ވިދާޅުވެފައެވެ. އެ ތުހުމަތުގެ ހަގީގަތް ވީހާވެސް އަވަހަކަށް ހާމަވުމަކީ އެދިވަޑައިގަންނަވާ ގޮތް ކަމަށް ވެސް ފަޒުލްގެ ސިޓީގައިވެއެވެ. އަދި އެކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮތުމަކީ އެދިވަޑައިގަންނަވާ ގޮތް ނޫންކަމަށް ފަޒުލް ވަނީ ފާހަގަކުރައްވާފައެވެ.
