ބިންވެރިޔާ ސްކީމްގައި ނުހިމެނޭ ބަޔަކަށް އެޗްޑީސީން ގޯތިތަކެއް ދިން ކަމަށް ތުހުމަތުވާ މައްސަލައިގައި، އޮޅުވާލައިގެން ހޯދަން އުޅުނު ކަމަށް ބެލެވޭ ގޯތީގެ އަދަދާއި މެދު އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ވާހަކަ އާއި ފުލުހުންގެ ވާހަކަ ދިމާ ނުވާކަން ހާމަވެއްޖެއެވެ.

އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދުގެ ބޭބެ މުޙައްމަދު ފަޒީލް ރަޝީދަށް ވަގަށް ދިން ގޯތި ވެރިފައި ކުރަން ހައުސިން މިނިސްޓްރީއަށް ފޮނުވީ އިންފާރު ރާނަން ހުއްދަ ވެސް ދީފަ ކަން ބުދަ ދުވަހުގެރޭ އެޗްޑީސީން ބޭއްވި ނޫސްވެރިންގެ ބައްދަލުވުމުގައި، ފާޒުލްގެ ވާހަކައިން ވަނީ ފަޅާ އަރާފައެވެ.

މި ނޫސްވެރިންގެ ބައްދަލުވުމަށްފަހު، ބައެއް ނޫސްވެރިން ވަނީ، ހައުސިން މިނިސްޓަރު ޑރ. އަލީ ހައިދަރަށް ފޮނުވާފައިވާ ސިޓީގައި އެ ބުނާ ހުޅުމާލެ ލޮޓް ނަންބަރު 20768, 1250 އަކަފޫޓުގެ ގޯތި ދީފައިވާ ސަރަހައްދަށް ގޮސްފައެވެ. އެ ބުނާ ގޯތީގައި ވަށާ ފާރު ރާނާފައިވާތަން ފެންނަ ހުރި އިރު، ބުދަ ދުވަހުގެ ނޫސްވެރިންގެ ބައްދަލުވުމުގައި ފަޒުލް ވަނީ ވަރަށް ބޮޑަށް އެކަން ދިފާއުކޮށް ވާހަކަ ދައްކަވަން މަސައްކަތް ކުރައްވާފައެވެ. ފަޒުލް ވިދާޅުވި ގޮތުގައި މައްސަލަ ޖެހިފައި ވަނީ 2 ލޮޓެއްގެ އެވެ. އަދި އެ މައްސަލަތަކުގައި ހިމެނެނީ ޖުމްލަ 6 މީހެކެވެ.

އެހެންނަމަވެސް ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ފުލުހުން ވަނީ ތިން ލޮޓެއްގެ މައްސަލަ މިހާތަނަށް ފާހަގަވާކަމަށް ބުނެފައެވެ. އެ މައްސަލަތަކާއި ގުޅިގެން ފޯޖުކޮށްފައިވާ ކަމަށް ޝައްކުކުރެވޭ ލިޔުންތަކެއް ހުށަހަޅާފައިވާކަން ފާހަގަވާ ކަމަށް ވެސް ފުލުހުން ވަނީ ބުނެފައެވެ.

އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި ގޮތުގައި ފުލުހުން މައްސަލަ ތަހުގީގު ކުރަން ފެށީ ލިޔެކިޔުންތައް ސައްހަތޯ ބެލުމަށެވެ. އަދި ޕޯޓަލް މެދުވެރިކޮށް ލިޔުން ހޯދުމަށް ބިން ލިބުނު ފަރާތްތަކުން ހުށަހަޅަމުންދާ އިރު އިރު އެ ލޮޓްތަކުގެ އިތުރު މައްސަލަތައް ފާހަގަވާ ކަމަށް ޝަރީފް ވަނީ ވިދާޅުވެފައެވެ.

އެގޮތުން ބައެއް ލޮޓްތަކާ ގުޅިގެން އިމާރަތް ކުރުމުގެ ހުއްދަ ހޯދުމަށް ޕޯޓަލް މެދުވެރިކޮށް ލިޔުން ހުށަހަޅާފައިވާ ކަމަށް ޝަރީފް ވިދާޅުވިއެވެ. އަދި އެކަމަށް އެދި ލިޔުން ހުށަހަޅާފައިވާ ގޮތަށް ބަލާ ނަމަ، އެއް ފަރާތަށް ވުރެ ގިނަ ފަރާތްތަކުގެ ނަމުގައި ލިޔުން ހުށަހަޅާފައިވާކަމަށް އޭނާ ވިދާޅުވިއެވެ.

މީގެ އިތުރުން ވެސް ފަޒުލް މި މައްސަލަ އާއި މެދު އިތުރުފުޅުހައްދަވާފައިވާ އެހެން ކަންކަން ވަނީ ފާހަގަކުރެވިފައެވެ.

އެގޮތުން ބުދަ ދުވަހުގެ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ފަޒުލް ވަރަށް ސާފުކޮށް ވިދާޅުވީ، މީގެ ތެރެއިން ގޯއްޗެއްގެ ރާނާފައި ނުވާ ކަމަށެވެ. ނަމަވެސް ފަޒުލްގެ ކޮއްކޮ ފަޒީލް އަށް ދިން ގޯތީގެ އިންފާރު ރާނާފައިވާކަން އެ ސަރަހައްދުގެ ފޮޓޯ އާއި ވީޑިއޯ އިން ސާފުކޮށް އެނގެއެވެ.

ހުޅުމާލެއިން ވަގަށް ގޯތިތަކެއް ދިން މައްސަލަ ފެންމަތިވެ ރައްޔިތުންގެ ފާޑުކިޔުން ބޮޑުވުން ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ފަޒުލް އަށް ޖަވާބެއް ދެވިފައެއް ނުވެއެވެ.