އެޗްޑީސީގެ އެމްޑީ ފަޒުލް ސަސްޕެންޑްކޮށްފި
ޗެއަރމަން ނާސިފު ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ވެސް ވަނީ ސަސްޕެންޑް ކޮށްފައި
ނޫސްވެރިންގެ ބައްދަލުވުމެއްގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވާހަކަދައްކަވަނީ
ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ސަސްޕެންޑްކޮށްފިއެވެ.
ބުރާސްފަތި ދުވަހު ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ އެޗްޑީސީ ގުޅޭގޮތުން ފުލުހުން ކުރިއަށް ގެންދާ ތަހުގީގަށް ޖާގަދީ ފުރިހަމަ އެހީތެރިކަން ދިނުމުގެ ގޮތުން އެތަހުގީގު ނިންމި، ބޯޑުން ވަކި ގޮތެއް އަންގަންދެން ކުންފުނީގެ ޗެއަރމަން އަހުމަދު ނާސިފު ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން 19 ޑިސެންބަރު 2024 ވަނަ ދުވަހުން ފެށިގެން ސަސްޕެންޑް ކޮށްފައިވާ ކަމަށެވެ.
ޕީސީބީން ބުނީ ކުންފުނީގެ އެމްޑީ ފަޒުލް ވެސް މި ބޯޑުން ވަކި ގޮތެއް އަންގަންދެން އޮފީހަށް ނުނުކުމެވޭ ގޮތަށް ސަސްޕެންޑްކޮށްފައިވާ ކަމަށެވެ.
އެމްޑީ ފަޒުލް ސަސްޕެންޑްކޮށްފައިވާއިރު، 18 ޑިސެންބަރު 2024 ވަނަ ދުވަހު ސޯޝަލް މީޑިއާގައި ވަނީ އޭނާގެ އެއްބަނޑު އެއްބަފާ ބޭބެއަށް ނުލިބޭ ބިމެއް ހުޅުމާލެއިން ދިން މައްސަލަ ފެންމަތިވެފައެވެ. މިމައްސަލައާ ގުޅިގެން އެޗްޑީސީގައި ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި، ހުޅުމާލެއިން ދެ މީހަކަށް އެއް ބިމެއް ލިބުނު ގޮތް ސާފުކޮށް ނުދެވި، ގަވައިދާ ޚިލާފަށް ހުޅުމާލެ އިން ގޯތި ދޫކުރި މީހުންގެ ތެރޭގައި ބޭބެ ހިމެނުނީ އިއްތިފާގަކުން ކަމަށް ފަޒުލް ވިދާޅުވެފައިވެއެވެ. އަދި ނޫސްވެރިން ކުރި ސުވާލުތަކަށް ޖަވާބު ނުދެއްވާ ނޫސްވެރިންގެ ބައްދަލުވުން ވެސް ވަނީ ނިންމަވާލައްވާފައެވެ.
ފަޒުލްއަށް ގިނަ ތުހުމަތުތަކެއް ކުރެވޭއިރު، ގޯތި މައްސަލައިގައި މިހާތަނަށް މި ވައްކަމުގެ ތެރެއިން 50 އާ ގާތްކުރާ އަދަދަކަށް ގޯތިތައް ދޫކޮށްފައިވާ ތުހުމަތުކޮށްފައިވެއެވެ. އަދި ހުޅުމާލެއިން ބިން ވިއްކަމުންދާ އެވަރެޖު ރޭޓުގައި މި ބިންތައް އަގުކުރާއިރު ވިއްކާލި ބިންތަކުގެ އަގު 400 މިލިއަނަށް އަރާ ކަމަށް ހިސާބުތަކުން ދައްކައެވެ. މިއީ މި ހުރިހާ ގޯތިތަކަކީ 1250 އަކަފޫޓުގެ ގޯތިކަމުގައި ބަލައިގެން ހިސާބުކުރުމުން ޖެހޭ އަގު ކަމަށް ބައެއް މީޑިއާތަކުގައި ރިޕޯޓުކޮށްފައިވެއެވެ.
މިމައްސަލައާ ގުޅިގެން އެޗްޑީސީ ކުރިމަތީގައި ގިނަ ބަޔަކު މުޒާހަރާކޮށްފައިވެއެވެ. އަދި ފަޒުލްގެ އިސްތިއުފާއަށް ގިނަ ބަޔަކު ދަނީ ގޮވާލަމުންނެވެ.
