ސަރުކާރުގެ ޚިދުމަތުން ރިޓަޔާ ކުރެއްވި ޝަކީބު ޕީއެސްއެމް ގެ އެމްޑީ އަކަށް އައްޔަނު ކޮށްފި

ޕަބްލިކް ސާރވިސް މީޑިއާ (ޕީއެސްއެމް) ގެ މެނޭޖިންގް ޑިރެކްޓަރުގެ މަގާމަށް އަހްމަދު ޝަކީބް (ޝަކީއްބެ) އައްޔަނު ކޮށްފި އެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ބުނީ، ޕީއެސްއެމް ގެ ޑިރެކްޓަރުން ގެ ބޯޑުގެ މެނޭޖިންގް ޑިރެކްޓަރު ގެ މަގާމަށް، އަހްމަދު ޝަކީބު ބުދަ ދުވަހު އައްޔަނު ކޮށްފައިވާ ކަމަށެވެ.

ޝަކީބް އެ މަގާމަށް އައްޔަނު ކޮށްފައި ވަނީ ޕީއެސްއެމް ގެ މެނޭޖިން ޑިރެކްޓަރުގެ މަގާމުގައި އެންމެ ފަހުން ހުންނެވި އިބްރާހިމް ނަސްރީން މަގާމުން އިސްތިއުފާ ދެއްވުމުންނެވެ.

އެއް އަހަރާއި ހަފްތާއެއްގެ މުއްދަތަށް ޕީއެސްއެމްގެ އެމްޑީގެ މަގާމުގައި ހުންނެވި ނަސްރީން އިސްތިއުފާ ދެއްވީ ސަރުކާރުގެ އެހެން މިނިސްޓްރީއަކުން ވަޒީފާ އެއް ލިބިވަޑައިގަތުމުންނެވެ.

އޭގެ ފަހުން ނަސްރީން އައްޔަނު ކޮށްފައި ވަނީ ޔޫތު މިނިސްޓްރީގެ ޑެޕިއުޓީ މިނިސްޓަރުގެ މަގާމަށެވެ.

ޝަކީބް އަކީ ރައީސް ޑރ. މުހައްމަދު މުއިއްޒުގެ ސަރުކާރުގައި ޕީއެސްއެމްގެ އެމްޑީގެ މަގާމަށް އައްޔަންކުރި ހަތަރު ވަނަ އެމްޑީ އެވެ. މީގެ ކުރިން އެ މަގާމު ފުރުއްވާފައި ވަނީ ނަސްރީން ގެ އިތުރުން، ޒީނާ ޒާހިރާއި މުހައްމަދު ސައީދް އެވެ.

ޕީއެސްއެމް ގެ އެމްޑީ ގެ މަގާމަށް އައްޔަނު ކުރި އަހްމަދު ޝަކީބް ސަރުކާރުގެ ޚިދުމަތުން ރިޓަޔާ ކުރެއްވީ މިދިއަ 2024 ވަނަ އަހަރުގަ އެވެ. ޝަކީބް ވަނީ ތައުލީމީ ދާއިރާ އާއި މީޑިއާގެ ދާއިރާގައި 35 އަހަރަށް ވުރެ ދިގު މުއްދަތަކަށް ޚިދުމަތް ކުރައްވާފަ އެވެ.

ޝަކީބް އެންމެ ފަހުން ހުންނެވީ ނޭޝަނަލް އިސްޓިޓިއުޓް އޮފް އެޑިއުކޭޝަން (އެންއައިއީ) ގެ ޑިރެކްޓާ ޖެނެރަލްގެ މަގާމުގަ އެވެ. އޭގެ ކުރިން ހުންނެވީ ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ)ގެ ޑިރެކްޓާ ޖެނެރަލްގެ މަގާމުގަ އެވެ. އެ މަގާމުގައި ޝަކީބް ވަނީ 16 އަހަރު ސަރުކާރަށް ޚިދުމަތް ކުރައްވާފަ އެވެ.

ޝަކީބު މަގާމަށް އައްޔަނު ކުރެއްވި އިރު ގެންދެވީ ރައީސް މުއިއްޒު ޕްރޮމޯޓު ކުރުމަށް ޕޮޑްކާސްޓް ސިލްސިލާ އެއް "ރައްޔިތުންނާ އެކު" ނަމުގައި ހޮސްޓް ކުރައްވަމުންނެވެ.