ބްރެޒިލް ފުޓުބޯޅަ ފެޑެރޭޝަންގެ ރައީސްކަމަށް ރޮނާލްޑޯ ވާދަކުރަނީ

ބްރެޒިލް ފުޓުބޯޅަ ފެޑެރޭޝަންގެ ރައީސްކަމުގެ މަޤާމަށް، އެ ޤައުމުގެ ފުޓުބޯޅަ ލެޖެންޑު ރޮނާލްޑޯ ވާދަކުރަން ނިންމައި، އެކަން އިއުލާން ކޮށްފި އެވެ.

އުމުރުން 48 އަހަރުގެ ރޮނާލްޑޯ ވަނީ އެކަން ރަސްމީކޮށް އިއުލާން ކޮށްފަ އެވެ. ރޮނާލްޑޯ، އޭނާގެ ރަސްމީ އިންސްޓަގްރާމްގައި ކޮށްފައިވާ ޕޯސްޓެއްގައި ބުނެފައި ވަނީ ބްރެޒިލް ފުޓުބޯޅައިގެ ސަބަބުން އޭނާ އަށް މުޅި ދުނިޔޭގެ ދޮރު ހުޅުވިފައިވާ ކަމަށެވެ. ރޮނާލްޑޯ ބުނީ ހަަމައެކަނި އޭނާގެ ވާހަކަ ދައްކަން ބޭނުން ނުވާ ކަމަށާއި، އޭނާ އަށް ވުރެ ބްރެޒިލްގެ ފުޓުބޯޅަ މާ ބޮޑު ކަމަށެވެ. އަދި ބްރެޒިލްގެ ރީނދޫ ކުލައިގެ ޖާޒީ ލައިގެން ކުޅޭއިރު، އޭގެ ބުރަދަނުގެ ވާހަކަ ދައްކަން ބޭނުންވާ ކަމަށް އޭނާ ބުންޏެވެ. ދުނިޔޭގެ ކޮންމެ ހިސާބެއްގައި ވެސް ބްރެޒިލްގެ ފުޓުބޯޅަ އޮންނަން ބޭނުންވާ ކަމަށާއި، މީގެ ކުރިން ޤައުމު ތަމްސީލު ކުރުމުގައި ދައްކާފައިވާ ނަމޫނާ ބޭނުންވާ ކަމަށް އޭނާ ވަނީ ބުނެފަ އެވެ.

ރޮނާލްޑޯ އަކީ ބްރެޒިލްގެ އިތުރުން، ދުނިޔޭގެ އެކި ކަންކޮޅު ތަކުގައި ގިނަ ބައެއްގެ މަޤުބޫލުކަން ހޯދާފައިވާ ކުޅުންތެރިޔެކެވެ. އޭނާ ވަނީ ބްރެޒިލް އާއެކު 1994 ވަނަ އަހަރު އަދި 2002 ވަނަ އަހަރުގެ ފީފާ ވާރލްޑް ކަޕް ކާމިޔާބު ކޮށްފަ އެވެ. 1998 ވަނަ އަހަރުގެ ވާރލްޑް ކަޕްގެ ފައިނަލްގައި ކުޅެފައިވާއިރު، އެ އަހަރުގެ ފައިނަލްގައި ވަނީ ފްރާންސް އަތުން ބަލިވެފަ އެވެ. ރޮނާލްޑޯ އަކީ މަތީ ފަންތީގައި ފުޓުބޯޅަ ކުޅެފައިވާ ތަޖުރިބާކާރު ކުޅުންތެރިޔަކަށް ވާއިރު، އޭނާގެ ތަޖުރިބާ އަކީ ބްރެޒިލްގެ ބްރޭންޑު ރަމްޒުކޮށްދޭނެ ކަމެއް ކަމަށް ތަޖުރިބާކާރުން އަންނަނީ ބުނަމުންނެވެ. ބްރެޒިލްގެ ފުޓުބޯޅަ ފެޑެރޭޝަންގެ ހަލަނބޮލި މެނޭޖުމަންޓަށް ފާޑު ކިޔުންތައް އަމާޒުވެފައިވާއިރު، ރޮނާލްޑޯ ކުރަމުން އަންނަނީ އެކަން ބަދަލު ކުރުމުގެ މަސައްކަތް ކަމަށް ވެސް ތަޖުރިބާކާރުން ވަނީ ބުނެފަ އެވެ.

ގިނަ ބަޔަކު ފާހަގަކޮށްފައިވާ ގޮތުގައި ބްރެޒިލްގެ ފުޓުބޯޅަ ފެޑެރޭޝަންގެ ރައީސްކަމަށް ވާދަކުރަން ރޮނާލްޑޯ ނިންމާފައިވާ މި ދަނޑިވަޅަކީ ވަރަށް ނާޒުކު ވަގުތެކެވެ. ފުޓުބޯޅައިގައި ތާރީޚީ ކާމިޔާބީތަކާ އެކު ވެސް، މިހާރު ބްރެޒިލްގެ ފުޓުބޯޅަ އަށް ކުރިމަތިވެފައިވާ ގޮންޖެހުންތައް ވަރަށް ބޮޑު ކަމަށް ތަޖުރިބާކާރުން އަންނަނީ ބުނަމުންނެވެ. އެހެންކަމުން ރޮނާލްޑޯގެ އަމާޒަކަށް ވާނީ ލޯކަލް ކުލަބުތަކުގެ އިތުރުން، ޤައުމީ ޓީމުތަކުގެ ކުރިއެރުންތަކަށް ބޮޑެތި އިސްލާޙުތަކެއް ގެނައުން ކަމަށް ވެސް އެ ފަރާތްތަކުން އަންނަނީ ބުނަމުންނެވެ.

ބްރެޒިލްގެ ފުޓުބޯޅަ ފެޑެރޭޝަންގެ ރައީސްކަމަށް ވާދަކުރަން ރޮނާލްޑޯ ނިންމާފައިވާއިރު، ކުރީގެ މަޝްހޫރު ބައެއް ކުޅުންތެރިން ވަނީ އެ ޤައުމުތަކުގެ ފުޓުބޯޅަ ފެޑެރޭޝަންގެ ރައީސްކަމާ ހަވާލުވެފަ އެވެ. އެގޮތުން ބާސެލޯނާ އަށް ކުރިން ކުޅުނު ކެމަރޫންގެ ސަމުއެލް އެޓޫ ވަނީ، ކެމަރޫން ފުޓުބޯޅަ ފެޑެރޭޝަންގެ ރައީސް ކަމާއި ހަވާލުވެފައެވެ.