ބްރެޒިލް ފުޓުބޯޅަ ފެޑެރޭޝަންގެ ރައީސް މަގާމުން ދުރުކޮށް، އިންތިގާލީ ރައީސަކު އައްޔަންކޮށްފި
އިންތިޚާބު ބާތިލުކުރުމަށްފަހު ކޯޓުން ނިންމީ ވަގުތީ ރައީސަކަށް، ސުޕީރިއާ ކޯޓް އޮފް ސްޕޯޓްސްގެ ރައީސް ހޯސޭ ޕާޑިޒް ހަމަޖެއްސެވުމަށް
ބްރެޒިލް ފުޓުބޯޅަ ފެޑެރޭޝަންގެ ރައީސް، އެޑްނާލްޑޯ ރޮޑްރިގޭޒް
ބްރެޒިލް ފުޓްބޯލް ފެޑެރޭޝަން (ސީބީއެފް)ގެ ރައީސް އެޑްނާލްޑޯ ރޮޑްރިގޭޒް މަގާމުން ދުރުކޮށް، އިންތިގާލީ ރައީސަކު އެ ގައުމުގެ ސްޓޭޓް ކޯޓް އޮފް ޖަސްޓިސް އައްޔަން ކޮށްފިއެވެ.
އެ ކޯޓުން ވަނީ މިދިޔަ އަހަރު ބޭއްވި ބްރެޒިލް ފުޓުބޯޅަ ފެޑެރޭޝަންގެ އިންތިޚާބު ބާތިލުކުރަން ނިންމާފައެވެ. އެ އިންތިޚާބުގައި ރައީސްގެ މަގާމަށް ރޮޑްރިގޭޒް އިންތިޚާބުކުރީ 2026 ވަނަ އަހަރުގެ ނިޔަލަށެވެ. އެ އިންތިޚާބު ބާތިލުކުރުމަށްފަހު ކޯޓުން ނިންމީ ވަގުތީ ރައީސަކަށް، ސުޕީރިއާ ކޯޓް އޮފް ސްޕޯޓްސްގެ ރައީސް ހޯސޭ ޕާޑިޒް ހަމަޖެއްސުމަށެވެ. ކޯޓުގެ ހުކުމުގައި ވާގޮތުން، 30 ދުވަހުގެ ތެރޭގައި އާ އިންތިޚާބެއް ބޭއްވުމުގެ ޒިންމާ އުފުލަން ޖެހޭނީ ޕާޑިޒްއަށެވެ.
އެކަމާ ގުޅިގެން ބްރެޒިލް ފުޓުބޯޅަ ފެޑެރޭޝަންގެ ތަރުޖަމާނު ވަނީ ކޯޓުން އެފަދަ ނިންމުމެއް ނިންމާފައިވާކަން މީޑިއާތަކަށް ކަށަވަރު ކޮށްދެއްވާފައެެވެ. އަދި އެ ނިންމުމާ ގުޅިގެން، އެކަށީގެންވާ ފިޔަވަޅުތައް އެނަލައިޒް ކުރަމުން އަންނަ ކަމަށްވެސް ވަނީ ވިދާޅުވެފައެވެ.
ބްރެޒިލް ފުޓުބޯޅަ ފެޑެރޭޝަންގެ ހިންގުމަށް ކޯޓުން ނުފޫޒު ފޯރުވިކަމުގެ ތުހުމަތުގައި ދުނިޔޭގެ ފުޓްބޯޅައިގެ މައި އިދާރާ (ފީފާ)އިން އެ ގައުމު ސަސްޕެންޑުކުުރުމުގެ ފުރުސަތުވެސް އެބައޮތެވެ.
