ކާވާ ކުލަބު ޗެމްޕިއަންޝިޕް: ތިން ވަނަ ހޮވަން ކުޅުނު މެޗުން އެޗްޑީސީ ބަލިވެއްޖެ

ސެންޓްރަލް އޭޝިއާ ވޮލީބޯޅަ އެސޯސިއޭޝަން (ކާވާ) ފިރިހެން ކުލަބު ޗެމްޕިއަންޝިޕްގެ ތިން ވަނަ ހޮވަން ކުޅުނު މެޗުގައި އިރާންގެ ކުލަބާ ވާދަކޮށް، ރާއްޖޭގެ ކުލަބު އެޗްޑީސީ ބަލިވެއްޖެ އެވެ.

ހޮނިހިރު ދުވަހު ނާޕޭލްގެ ކަތަމަންޑޫގައި ކުރިއަށްދާ މުބާރާތުގެ ތިން ވަނަ ހޮވާ މެޗުގައި އިރާންގެ ކުލަބު އަތުން އެޗްޑީސީ ބަލިވެފައި ވަނީ ސީދާ ތިން ސެޓުންނެވެ. ސީދާ ތިން ސެޓުން ބަލިވި ނަމަވެސް، މެޗުގައި އެޗްޑީސީން ވަނީ ރަނގަޅު ކުޅުމެއް ދައްކައި، ރަނގަޅު ވާދައެއް ކޮށްފަ އެވެ.

މެޗުގެ ފުރަތަމަ ސެޓު ފަށައިގެން ދެ ޓީމުގެ ފަރާތުން ވެސް ފެނުނީ ހަމަހަމަ ކުޅުމެކެވެ. ނަމަވެސް ސެޓުގެ ވަކި ހިސާބަކުން އެޗްޑީސީން ވަނީ ލީޑު ވެސް ހޯދައިފަ އެވެ. އެޗްޑީސީން ހޯދި ހަތަރު ޕޮއިންޓުގެ ލީޑު އެ ޓީމަށް ނުހިފޭއްޓި، އިރާން ކުލަބުން ނަތީޖާ ހަމަހަމަ ކުރި އެވެ. އޭގެ ފަހުން ލީޑު ހޯދައި އިރާން ކުލަބުން ފުރަތަމަ ސެޓު ކާމިޔާބު ކުރީ 25-21 އިންނެވެ.

ދެ ވަނަ ސެޓު ފަށައިގެން ވެސް ލީޑުގައި އޮވެ ކުޅެމުން ދިޔައީ އިރާން ކުލަބުންނެވެ. ނަމަވެސް އެޗްޑީސީން އިން ވަކި ހިސާބަކުން ނަތީޖާ ހަމަހަމަކޮށް، ލީޑު ވެސް ހޯދި އެވެ. ނަމަވެސް މި ސެޓުގައި ވެސް އެޗްޑީސީ އަށް އެ ލީޑު ހިފެހެއްޓޭ ގޮތެއް ނުވި އެވެ. އިރާން ކުލަބުން ލީޑު ނެގި ފަހުން ވެސް، ދެ ޓީމުގެ ފަރާތުން ހަމަހަމަ ކުޅުމެއް ފެނުނެވެ. ވަކި ހިސާބަކުން އިރާން ކުލަބުން ވަނީ ލީޑު ފުޅާ ކޮށްފަ އެވެ. ނަމަވެސް އެޗްޑީސީން ވަނީ ފަހަތުން އަރައި 22-22 އިން ނަތީޖާ ހަމަހަމަ ކޮށްފަ އެވެ. އޭގެ ފަހުން އެޗްޑީސީން 22-24 އިން ލީޑު ވެސް ހޯދައިފަ އެވެ. އޭގެ ފަހުން އިރާން އިން ނަތީޖާ ހަމަހަމަ ކުރިއިރު، އެޗްޑީސީ އަށް ސެޓު ނިންމާނެ ފުރުސަތު ވެސް ލިބުނެވެ. ނަމަވެސް އެ ފުރުސަތުގެ ބޭނުން ނުކުރެވި، އިރާން ކުލަބުން ވަނީ 27-25 އިން ދެ ވަނަ ސެޓު ކާމިޔާބު ކޮށްފަ އެވެ.

ތިން ވަނަ ސެޓު ފަށައިގެން އެޗްޑީސީން ވަނީ ލީޑުގައި އޮވެ ކުޅެފަ އެވެ. މި ސެޓުގައި އެޗްޑީސީން ހޯދި ލީޑުގައި އޮވެ ކުޅެމުން ގޮސް އެ ޓީމުން ވަނީ 11-17 އަށް ލީޑު ފުޅާ ކޮށްފަ އެވެ. އޭގެ ފަހުން އިރާން ކުލަބުން ފަރަގު ކުޑަ ކުރަމުން ދިޔައިރު، ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނެވެ. މި ސެޓުގައި އެޗްޑީސީން ވަނީ ސެޓު ޕޮއިންޓު ވެސް ހޯދައިފަ އެވެ. ނަމަވެސް އިރާން ކުލަބުން ވަނީ ފަހަތުން އަރައި 24-24 އިން ނަތީޖާ ހަމަހަމަ ކޮށްފަ އެވެ. އޭގެ ފަހުން 25-25 އިން ވެސް ނަތީޖާ ހަމަހަމަވީއިރު، އިރާން ކުލަބުން ތިން ވަނަ ސެޓު ކާމިޔާބު ކުރީ 27-25 އިންނެވެ.

މުބާރާތުގައި އެޗްޑީސީން މޮޅުވެފައި ވަނީ އެންމެ މެޗަކުންނެވެ. އެއީ މުބާރާތުގެ ލީގު ބުރުގައި ގަންޑާކީއާ ދެކޮޅަށް ކުޅުނު މެޗުންނެވެ. މުބާރާތުގެ ލީގު ބުރުގައި އެޗްޑީސީން ދެން ކުޅުނު ތިން މެޗުން ވެސް އެ ޓީމު ވަނީ ބަލިވެފަ އެވެ. މުބާރާތުގެ ސެމީ ފައިނަލްގައި އެޗްޑީސީ ބަލިވެފައި ވަނީ ހެލްޕު ނޭޕާލް ސްޕޯޓްސްއާ ވާދަކޮށެވެ. އެ ތިން ވަނަ ހޮވާ މެޗުގައި އިރާން ކުަލަބާ ވާދަކުރަން އެޗްޑީސީ އަށް ޖެހުނީ އެ މެޗުން ބަލިވުމުންނެވެ.