ކާވާ ކުލަބު ޗެމްޕިއަންޝިޕް: ސެމީ ފައިނަލްގައި އެޗްޑީސީ އަށް ނާކާމިޔާބު
14 ޑިސެމްބަރު 2024 | ހޮނިހިރު 03:40ސެމީ ފައިނަލް އިން ބަލިވެ އެޗްޑީސީ އަށް ޖެހެނީ މުބާރާތުގެ ތިން ވަނަ ހޮވާ މެޗުގައި ވާދަކުރާށެވެ. އެ މެޗުގައި އެޗްޑީސީ ނިކުންނާނީ އިރާން ކުލަބާ ދެކޮޅަށެވެ.
މުބާރާތުގެ ސެމީ ފައިނަލްގައި އެޗްޑީސީން ކުޅުނު މެޗުގެ ތެރެއިން
މިހާރު ކުރިއަށްދާ ސެންޓްރަލް އޭޝިއާ ވޮލީބޯޅަ އެސޯސިއޭޝަން (ކާވާ) ފިރިހެން ކުލަބު ޗެމްޕިއަންޝިޕްގެ ސެމީ ފައިނަލްގައި ވާދަކޮށް، ރާއްޖޭގެ ކުލަބު އެޗްޑީސީ އަށް ނާކާމިޔާބާ ކުރިމަތިލާން ޖެހިއްޖެ އެވެ.
ނާޕޭލްގެ ކަތަމަންޑޫގައި ކުރިއަށްދާ މުބާރާތުގެ ސެމީ ފައިނަލްގައި އެޗްޑީސީ ވާދަކޮށްފައި ވަނީ ހެލްޕު ނޭޕާލް ސްޕޯޓްސް ކުލަބާ އެވެ. ހުކުރު ދުވަހުގެ ހަވީރު ކުޅުނު ސެމީ ފައިނަލް މެޗު ހެލްޕު ނޭޕާލް އިން ކާމިޔާބު ކުރީ ސީދާ ތިން ސެޓުންނެވެ.
މެޗުގެ ފުރަތަމަ ސެޓު ހެލްޕު ނޭޕާލް އިން ކާމިޔާބު ކުރީ 25-16 އިންނެވެ. އަދި ދެ ވަނަ ސެޓު އެ ޓީމުން ކާމިޔާބު ކުރީ 25-18 އިންނެވެ. ފުރަތަމަ ދެ ސެޓާ ޚިލާފަށް ތިން ވަނަ ސެޓުގައި ވާދަވެރި ކުޅޫމެއް ފެނުނެވެ. ނަމަވެސް މި ސެޓުގައި ވެސް ހެލްޕު ނޭޕާލް އިން ވަނީ ރަނގަޅަށް ކުޅެ 25-21 އިން ސެޓު ކާމިޔާބު ކޮށްފަ އެވެ.
މުބާރާތުގައި އެޗްޑީސީން މޮޅުވެފައި ވަނީ އެންމެ މެޗަކުންނެވެ. އެއީ މުބާރާތުގެ ލީގު ބުރުގައި ގަންޑާކީއާ ދެކޮޅަށް ކުޅުނު މެޗުންނެވެ. މުބާރާތުގެ ލީގު ބުރުގައި އެޗްޑީސީން ދެން ކުޅުނު ތިން މެޗުން ވެސް އެ ޓީމު ވަނީ ބަލިވެފަ އެވެ. ސެމީ ފައިނަލް އިން ބަލިވެ އެޗްޑީސީ އަށް ޖެހެނީ މުބާރާތުގެ ތިން ވަނަ ހޮވާ މެޗުގައި ވާދަކުރާށެވެ. އެ މެޗުގައި އެޗްޑީސީ ނިކުންނާނީ އިރާން ކުލަބާ ދެކޮޅަށެވެ.
