ފުލުހުން އިދާރާ ކުރިމައްޗަށް އެއްވުމަށް ގޮވާލި ކަމަށް ބުނެ އިލެކްޝަންސް ކޮމިޝަނުން ކުރި ޖޫރިމަނާއަށް އެމްޑީޕީއިން ހޫނު ރައްދެއް ދީފި އެވެ.

އިލެކްޝަންސް ކޮމިޝަނުން އެމްޑީޕީ 60،000 ރުފިޔާ (ފަސްދޮޅަސް ހާސް ރުފިޔާ) އިން ޖޫރިމަނާ ކޮށްފައި ވަނީ އެމްޑީޕީގެ މެމްބަރެއް ކަމަށްވާ ނައީމާ މުހައްމަދު (ނައީމާއްތަ) ފުލުހުންގެ އިދާރާ އަށް ހާޒިރުވުމަށް އެންގުމުން ފުލުހުންގެ އިދާރާ ކުރިމައްޗަށް އެއްވުމަށް ގޮވާލައި އެމްޑީޕީގެ ރަސްމީ ޓުވިޓާ އެކައުންޓުން ޓްވީޓް ކުރި ކަމަށް ބުނެ އެވެ. 

އިލެކްޝަންސް ކޮމިޝަނުން އެމްޑީޕީ އަށް ފޮނުވި ސިޓީގައި ބުނެފައި ވަނީ ޖޫރިމަނާ ކުރީ އެފަދަ ކަންކަން ނުކުރުމަށް ތަކުރާރުކޮށް އެމްޑީޕީ އަށް އެންގުމުން ވެސް އެފަދަ ކަންކަން ތަކުރާރުކޮށް ކުރަމުންދާތީ ކަމަށެވެ. އެ ސިޓީގައި ބުނެފައިވާ ގޮތުގައި ޖޫރިމަނާ ފައިސާ ހަތް ދުވަހުގެ ތެރޭގައި ދައްކަން ޖެހޭނެއެވެ.  

ޖޫރިމަނާ ކުރުމާ ގުޅިގެން އެމްޑީޕީގެ ސެކްރެޓަރީ ޖެނެރަލް އަނަސް އަބްދުއް ސައްތާރު ވިދާޅުވީ އިލެކްޝަންސް ކޮމިޝަނުން އެ ބުނާ ފަދަ ޓްވީޓެއް އެމްޑީޕީން ކޮށްފައިނުވާނެ ކަމަށާއި "އެޔެއް މިޔެއް ނުބަލާ ފިޔަވަޅު އެޅުމާއިގެން އުޅެންޏާ ވާނީ މިހެން" ކަމަށެވެ.

އަނަސް ވިދާޅުވީ ވާނުވާ ނުބަލާ ޕާޓީތައް ޖޫރިމަނާ ކުރުމަށް ވުރެ ޕާޓީތަކަށް ދޭންޖެހޭ ފައިސާ ދިނުން މާ ބޮޑަށް ރަނގަޅު ވާނެ ކަމަށެވެ. އެގޮތުން ޖޫރިމަނާ ހަތް ދުވަހުގެ ތެރޭގައި ދެއްކުމަށް އަންގާފައިވާއިރު، އަހަރުގެ ފުރަތަމަ ތިން މަސް ދުވަހުގެ ތެރޭގައި ޕާޓީތަކަށް ދޭންޖެހޭ ފައިސާ އަދިވެސް ދޫނުކުރާކަން އަނަސް ފާހަގަކުރެއްވި އެވެ.

އަނަސް ވިދާޅުވީ ސިޔާސީ ޕާޓީތަކާ މެދު ހަރުކަށިކޮށް ކަންތައް ކުރާއިރު، ފިނޭންސް މިނިސްޓްރީއަށް ޕްރެޝާ ކޮށްގެން ފައިސާ ދޫކުރުން މާބޮޑަށް ވެސް ރަނގަޅުވާނެ ކަމަށެވެ.

ސިޔާސީ ޕާޓީގެ ގާނޫނުގެ 35 ވަނަ މާއްދާގެ (ޅ) ގައި ބުނެފައިވަނީ ސިޔާސީ ޕާޓީތަކަށް ދައުލަތުގެ ބަޖެޓުން ދޭ ފައިސާގެ އެހީ، ދައުލަތުގެ ބަޖެޓު ނިސްބަތްވާ އަހަރުގެ ފުރަތަމަ ތިން މަސް ދުވަހުގެ ތެރޭގައި ސިޔާސީ ޕާޓީތަކާ ހަވާލުކޮށް ނިންމަންވާނެ ކަމަށެވެ. 

މިއަހަރުގެ ފުރަތަމަ ތިން މަސް ދުވަސް ފާއިތުވެގެން ގޮސް، އަށް ވަނަ މަސް ނިމެންދާއިރު ވެސް، ޕާޓީތަކަށް ފައިސާ ދޫކުރާނެ ދުވަހެއް ނުބުނެ އެވެ. މިދިޔަ އަހަރު ވެސް ޕާޓީތަކަށް ފައިސާ ދޫކޮށްފައި ވަނީ ގާނޫނުގައި ބުނާ ތިން މަސް ދުވަސް ފާއިތުވެ ދިޔަތާ އެތައް މަހެއް ފަހުން ނޮވެމްބަރުގަ އެވެ. 

އިލެކްޝަންސް ކޮމިޝަނުން ކުރިން ބުނަމުން އައީ ފައިސާ ދޫކުރުން ލަސްކުރީ، ޕާޓީގެ މެމްބަޝިޕް ފޯމުތަކުގައި ފިންގަޕްރިންޓް ޖެހުމާ ގުޅޭ ގޮތުން އުފެދުނު މައްސަލައިގައި ކޯޓުން ގޮތެއް ނުނިންމާތީ ކަމަށެވެ. އެ ސަބަބަކާ ގުޅިގެން ޕާޓީތަކުގެ މެމްބަރުންގެ އަދަދު ކަށަވަރު ނުވާތީ ފައިސާ ދޫނުކުރީ ކަމަށް އިލެކްޝަންސް ކޮމިޝަނުން ބުނެފައިވެ އެވެ.

ނަމަވެސް، މިއަހަރު ފައިސާ ދޫކުރުން ލަސްވަނީ ކޮން ސަބަބަކާ ގުޅިގެން ކަމެއް އިލެކްޝަންސް ކޮމިޝަނުން ހާމައެއް ނުކުރެއެވެ. އިލެކްޝަންސް ކޮމިޝަނުން ބުނީ ޕާޓީތަކަށް ފައިސާ ދޫކުރުމާ ގުޅޭގޮތުން ފިނޭންސް މިނިސްޓްރީއަށް ފޮނުވަންޖެހޭ ހުރިހާ ލިޔެކިޔުމެއް ފޮނުވާފައިވާ ކަމަށާއި ކޮމިޝަނުން ކުރަންޖެހޭ ކަންތައްތައް ކޮށް ނިމިފައިވާ ކަމަށެވެ.

ދައުލަތުގެ ބަޖެޓުން މިދިޔަ އަހަރު 23 މިލިޔަނަށް ވުރެ ގިނަ ރުފިޔާ ސިޔާސީ ޕާޓީތަކަށް ދޫކޮށްފައިވާއިރު، އޭގެ ތެރެއިން އެންމެ ގިނަ ފައިސާ ލިބުނީ، ޕީޕީއެމްއަށެވެ. އެގޮތުން 10 މިލިޔަނަށް ވުރެ ގިނަ ރުފިޔާ ސަރުކާރު ހިންގާ ޕާޓީ، ޕީޕީއެމަށް ލިބުނުއިރު އެމްޑީޕީއަށް ލިބުނީ ހަތް މިލިޔަން ރުފިޔާ އެވެ.

ޖުމްހޫރީ ޕާޓީއަށް ލިބުނީ 2.9 މިލިޔަން ރުފިޔާ އެވެ. ސަރުކާރުގެ ކޯލިޝަން ޕާޓްނަރު އެމްޑީއޭއަށް ދިނީ 2.8 މިލިޔަން ރުފިޔާ އެވެ. މެމްބަރުންގެ އަދަދު 10،000 އަށް ވުރެ ދަށް ވުމުން އަދާލަތު ޕާޓީ އާއި ޑީއާރުޕީ އަށް މިދިޔަ އަހަރު ފައިސާ ދުލެއް ނުކުރެ އެވެ.