ރައީސް މުއިއްޒު ވަޒީރުންނަށް އިތުބާރު ނުކުރައްވާ، މިފަދަ ސަރުކާރެއްގައި ރައްޔިތުންނަށް ރަނގަޅު ޚިދުމަތެއް ނުދެވޭނެ: މެންބަރު އަހުމަދު ދީދީ
ވަޒީރަކާ ބައްދަލު ކުރުމަށް ބުރަ މަސައްކަތްތަކެއް ކުރަންޖެހުނު
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަދައްކަވަނީ
ރައީސް ޑރ.މުހައްމަދު މުއިއްޒު ވެސް ކެބިނެޓްގެ ވަޒީރުންނަށް އިތުބާރު ނުކުރައްވާ ކަމަށާއި، މިފަދަ ސަރުކާރެއްގައި ރައްޔިތުންނަށް ރަނގަޅު ޚިދުމަތެއް ނުދެވޭނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި މެންބަރު އަހުމަދު ދީދީ ވިދާޅުވީ ރައީސް މުއިއްޒު ކަންކަމުގައި ވަޑައިގަންނަވަނީ ގިނިކަންޏާ ކަމަށާއި، ގައުމުން އެކަން ފެނިގެންދާ ކަމަށެވެ. އަދި ރައީސް މުއިއްޒުގެ އަމަލުފުޅުތަކުން ވެސް ވެސް ކެބިނެޓްގެ ވަޒީރުންނަށް އިތުބާރު ނުކުރައްވާކަން ހާމަވާ ކަމަށެވެ.
މިސަރުކާރުގެ ވަޒީރުންނަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ، ދާއިރާގެ މައްސަލަތަކާއި، ރައްޔިތުންގެ ކަންބޮޑުވުންތައް ހިއްސާކުރުމަށް ކަމާގުޅުން ހުރި ވަޒީރާ ބައްދަލު ކުރުމަށް ބުރަ މަސައްކަތްތަކެއް ކުރަންޖެހުނު ކަމަށެވެ. އަދި ވަޒީރާ ބައްދަލުވާ ގޮތް މެދުވެރިވީ ރައްޔިތުންގެ މަޖިލީހަށް ހާޒިރު ކުރުމަށް ނޯޓިސް ފޮނުވުމުން ކަމަށެވެ. އަދި މެސެޖެއް ވެސް އީމެއިލް ވެސް ނުލިބޭކަން ހާމަކޮށް، ވަޒީރު ދޮގު ހެއްދެވި ކަމަށް މެންބަރު އަހުމަދު ދީދީ ވިދާޅުވިއެވެ.
ސާފުކޮށް ފެންނަން ހުންނަ ކަންކަމުގައި މިސަރުކާރުގެ ބޭފުޅުން ދޮގު ހައްދަވާކަން ފާހަގަކުރައްވައި މެންބަރު އަހުމަދު ދީދީ ވިދާޅުވީ މިކަހަލަ ސަރުކާރެއްގައި ރައްޔިތުންނަށް ރަނގަޅު ޚިދުމަތެއް ލިބޭނެކަމާމެދު ސުވާލު އުފެދޭ ކަމަށެވެ. ރައްޔިތުންނަށް ރަނގަޅަށް ޚިދުމަތް ނުކުރެވޭނެ ކަމަށާއި، ރައްޔިތުންނާއި ދޭތެރޭގައި ފަރުވާލެއް ނުހުންނާނެ ކަމަށް މެންބަރު އަހުމަދު ދީދީ ވިދާޅުވިއެވެ. އަދި ވިދާޅުވީ މިސަރުކާރުން ރައްޔިތުން މަޖިލީހުގެ މެންބަރުން ޖަވާބުދާރީ ކުރުވޭނެ މަގު ވެސް ބަންދުކޮށްފައިވާ ކަމަށެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ ރައީސް މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި އެއްވެސް ވައުދެއް ނުފުއްދާ ކަމަށާއި، ނަމަވެސް ރާއްޖޭގެ އެންމެ ބޮޑު ދެ ސިނާއަތް ހަލާކުކޮށްލުމުގެ މަސައްކަތް ފަށާފައިވާ ކަމަށެވެ. އެގޮތުން މަސްވެރިކަމާއި، ފަތުރުވެރިކަމުގެ ސިނާއަތް ފުޑާލުމުގެ މަސައްކަތް ފަށާފައިވާ ކަމަށް މެންބަރު އަހުމަދު ދީދީ ވިދާޅުވިއެވެ. އަދި ވިދާޅުވީ މިސަރުކާރާމެދު ރައްޔިތުން ވަރަށް ބޮޑަށް ސަމާލުވާންޖެހޭ ކަމަށެވެ.
