މި ސަރުކާރުން މަސައްކަތް ކުރަމުންދަނީ ދޮގު އިލްޒާމުތަކެއް ވަކި ބައެއްގެ ބޮލުގައި އެޅުމަށް
އެމްޑީޕީ ހަރުގެ ޖަލްސާގައި ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވާހަކަދައްކަވަނީ
މައްސަލަ ހުރި އޮޑިޓް ރިޕޯޓެއް 14 މިނެޓުން ނިންމާނުލެވޭނެ ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ ހަރުގެ ޖަލްސާގައި އޮޑިޓް ކުރެއްވުމުގެ މަސައްކަތުގައި އުޅުއްވާ އޮޑިޓަރ ޔައުގޫބް ވިދާޅުވީ މައްސަލައެއް ހުރި އެއްވެސް އޮޑިޓް ރިޕޯޓެއް 14 މިނިޓުން ދިރާސާކޮށް ނިންމާ ނުލެވޭނެ ކަމަށާއި، މިސަރުކާރުން މަސައްކަތް ކުރަމުންދަނީ ދޮގު އިލްޒާމުތަކެއް ވަކި ބައެއްގެ ބޮލުގައި އެޅުމަށް ކަމަށެވެ.
ނަމަވެސް 14 މިނެޓުން އޮޑިޓް ރިޕޯޓު ދިރާސާކޮށް ނިންމުމުން އަޅުވަން އުޅޭ ވައްކަމުގެ ދޮގު އިލްޒާމު އެޅުވުމުގެ އެއްވެސް ޖާގައެއް ނެތްކަން ހާމަވާ ކަމަށް އޭނާ ވިދާޅުވިއެވެ. އަދި ވިދާޅުވީ ދިރާސާ ކުރުމުގައި ބަލަނީ ވެސް އޮޑިޓަރ ޖެނަރަލް ދެއްވާ ލަފާގެ ދަށުން ފާހަގަކޮށްފައިވާ ކަންކަން ކަމަށެވެ.
މީގެ އިތުރުން ޔައުގޫބް ވިދާޅުވީ މާލިއްޔަތު ކޮމެޓީއަށް މައްސަލައެއް ނެތް އޮޑިޓް ރިޕޯޓެއް 14 މިނެޓުން ނިންމިދާނެ ކަމަށާއި، އެ ރިޕޯޓާ ގުޅޭގޮތުން މަޝްވަރާ ކުރާނެ އެއްވެސް ކަމެއް ނޯންނާނެ ކަމަށެވެ. އެ ރިޕޯޓާ ގުޅިގެން ދައްކާނެ ވާހަކައެއް ނޯންނާނެ ކަމަށާއި، އޮޑިޓަރ ޖެނަރަލް ފޮނުވާފައިވާ ރިޕޯޓު އެއޮތް ގޮތަށް ފާސްވީ ކަމަށް ވެސް ނިންމޭނެ ކަމަށް އޭނާ ވިދާޅުވިއެވެ. އަދި ވިދާޅުވީ މިދިޔަ ފަސް އަހަރުގެ ފަސް އޮޑިޓަރ ޖެނަރަލް ރިޕޯޓުގައި އެންމެ ގޯހެއް ވެސް ނޯންނާނެ ކަމަށެވެ. ގޯހެއް އޮތްނަމަ މިސަރުކާރުގެ ފުރަތަމަ އަހަރުގެ ތެރޭގައި ކުރީ ސަރުކާރުގެ އިސްބޭފުޅުން ފުލުހަށް އަދި އޭސީސީއަށް ހާޒިރުކޮށް ސުވާލު ކުރުމުގެ މަސައްކަތްތައް ކުރިއަށް ގެންދާނެ ކަމަށް ޔައުގޫބް ވިދާޅުވިއެވެ.
ޔައުގޫބް ވިދާޅުވީ ރައްޔިތުންނަށް ދޮގުހަދައި އޮޅުވާލައިގެން ރައްޔިތުންގެ މަޖިލީހުގެ މެންބަރު ކަމަށް އާދެވުނު ނަމަވެސް އޮޑިޓްގެ މަސައްކަތްތައް ކުރުމުގައި އެދާއިރާއިން އިލްމު ބޭނުންވާނެ ކަމަށެވެ. އެކޮމެޓީގެ ތެރޭގައި ކުރާ ފަންނީ ވަކި ކަހަލަ މަސައްކަތްތަކެއް ކުރުމުގައި ކޮންމެވެސް ވަރެއްގެ އިލްމާއި، ހުނަރާއި، ތަޖުރިބާގެ ލިބިގެން ނޫނީ ނުކުރެވޭނެ ކަމަށް އޭނާ ވިދާޅުވިއެވެ.
